Meki kontakti nanga trowpatna di no de kotoigi
1 A e gi foeroe prisiri te den trowpaar de ini wánfasi na ini a troe anbegi. Ma na ini foeroe osofamiri soso wán foe den trowpatna teki a pasi foe waarheid. Fa wi kan meki kontakti nanga den trowpatna disi di no de Kotoigi èn gi den deki-ati foe anbegi Jehovah makandra nanga wi?—1 Tim. 2:1-4.
2 Froestan fa den e denki: Ala di wan toe foe den trowpatna di no de Kotoigi kande e gens, tokoe a de moro foeroe so, taki a problema na taki den abi wan mi-no-ke fasi noso taki den no e froestan sani na a joisti fasi. Wan sma kan denki taki sma no abi belangstelling gi en, noso a e djaroesoe tapoe a njoen jeje sani di a trowpatna foe en abi belangstelling gi. „Te mi ben de mi wawan na ini na oso, mi ben firi taki sma ben gowe libi mi”, na so wan masra e memre. „Mi ben firi taki mi wefi nanga den pikin ben gowe libi mi”, wan trawan e taki. Son mansma e denki kande taki den e lasi na osofamiri foe den na ini wan relisi. (Loekoe De Wachttoren 15 augustus 1990, bladzijde 20-23.) Foe dati ede a ben sa moro boen, efoe a kan, te a masra de nanga en wefi na ini na oso-bijbelstudie na a bigin kaba.
3 Wroko leki wan team: Wan trowpaar di de Kotoigi ben wroko makandra nanga boen bakapisi foe jepi sma di trow, kon na ini a waarheid. Na baka di a sisa ben bigin wan studie nanga a wefi, a brada ben sa fisiti a masra. Foeroetron a ben man foe bigin wan studie nanga a masra.
4 Abi switifasi èn lobi foe ontfanga sma boen: Den osofamiri na ini a gemeente kan jepi te den e sori belangstelling gi den osofamiri di no de na ini wánfasi na ini a troe anbegi ete. Wan toe switi fisiti kan jepi a trowpatna di no de Kotoigi foe si Jehovah Kotoigi leki kresten di abi waran firi èn di e broko den ede gi a boen foe ibriwan sma.
5 Wawan leisi den owroeman kan loekoe den moeiti di doe no so langa ete foe meki kontakti nanga den trowpatna di no de Kotoigi èn foe si san kan doe moro na ini a howpoe foe wini den gi Jehovah.—1 Petr. 3:1, foetoewortoe.