A gemeente fu yu abi wan bigi kontren fu wroko?
1 Fu den foto na ini Yudea te go miti den boiti presi na Galilea, Yesus ben e preiki fayafaya na ini a heri bigi kontren fu Israel fu owruten (Mark. 1:38, 39; Luk. 23:5). Wi tu musu taki fu a bun nyunsu nanga so furu sma leki wi man (Mark. 13:10). Ma disi kan de wan bigi tyalensi. Fu san ede?
2 Furu gemeente na ini Sranan abi fu wroko na kontren di de na boiti presi èn di de sosrefi na mindri foto. Son leisi den abi dorpu noso tra farawe presi na ini a kontren fu den tu. Toku a e pasa taki den man wroko a kontren fu den wan tu leisi na ini wan yari. Ma tra gemeente di abi wan bigi kontren fu wroko tu, no man du dati so bun. San wi kan du fu yepi den sma di e libi na ini den farawe kontren dati fu kon leri sabi den tru tori fu Yehovah, fu Yesus, nanga fu a Kownukondre?
3 Seti sani bun na fesi: A dienstopziener nanga a dinari di e sorgu fu den karta fu a kontren pe unu e wroko, musu teki fesi fu seti sani na so wan fasi taki unu kan wroko a kontren so bun leki a kan. Kande sani kan seti fu gebroiki wan tu satra, te moro furu fu den preikiman kan de na ini a preikiwroko a heri dei. Te yu e go wroko na kontren di fara, dan sreka sani fu tan moro langa na ini a preikiwroko efu a kan. Kande yu kan tyari nyanyan di yu kan nyan na brekten. Kande sani kan seti fu bigin a preikiwroko konmakandra moro fruku leki san unu gwenti so taki nofo ten de fu teki waka go na a kontren pe unu sa go wroko, noso unu kan hori a preikiwroko konmakandra krosibei fu a kontren dati. No poti tumusi furu preikiman na ini wán wagi, so taki ala sma abi nofo presi fu wroko. Seti sani fu wroko den boiti presi na wan pisi ten fu a yari te a weer bun èn te den pasi no takru.
4 Den wan di e go na sma di e taki tra tongo kan gebroiki den ten moro bun efu den sorgu taki den abi den yoisti nen fu den sma di den sa miti èn den yoisti presi pe den e tan, èn sosrefi wan bun karta di kan sori den fa fu doro drape. Seti sani na so wan fasi taki den grupu fu preikiman kan go na ala den sma fu a kontren di den kisi fu preiki.
5 Sorgu taki yu tyari nofo buku nanga tra sani fu prati. Efu a kontren na wan presi pe unu no e wroko so furu, dan a bun kande fu libi wan traktaat noso wan moro owru tijdschrift pe sma no de na oso. Efu yu abi a traktaat Yu Ben Sa Wani Sabi Moro fu Bijbel? na ini a tongo fu yu, dan pristeri en na ibri sma di yu e miti, èn libi wan fu a traktaat dati na ala oso pe yu no miti sma.
6 Wroko makandra fayafaya: Efu yu wani wroko wan kontren di bigi, dan dati wani taki dati ala sma na ini a gemeente musu wroko bun nanga makandra. Te a de fanowdu fu gebroiki wagi noso boto fu go fu a wan presi na a trawan, dan a bun fu yepi fu pai den kostu fu a oli. Te yu miti nanga sma di wani arki, dan a prenspari fu sori koni. Hori na prakseri taki a de fanowdu fu miti nanga ala sma na ini a kontren pe unu e wroko, èn hori den wan na prakseri tu di e waka nanga yu na ini a srefi wagi noso boto. Kande yu wani taki pikin moro langa nanga wan sma. We yu denki taki sani kan seti so taki den trawan di de na ini a grupu fu yu kan wroko go doro?
7 Seti sani bun fu go baka na ala den sma di wani sabi moro. Boiti a nen fu a strati nanga a nomru fu na oso fu a sma di yu miti, dan a bun fu aksi fu a telefon nomru fu a sma tu. Na so fasi yu kan meki muiti fu miti en baka èn fu preiki gi en nanga yepi fu telefon. Efu den strati fu den boiti presi no abi nen èn efu den oso no abi nomru, dan pruberi fu meki wan karta gi yusrefi. Sosrefi yu kan skrifi fa fu doro na a sma di wani sabi moro te yu sa go baka na en wan tra leisi.
8 A de wan bigi grani gi wi fu du san Yesus ben taigi wi: ’Awinsi na sortu foto noso na sortu dorpu unu e go, suku suma de drape di warti’! (Mat. 10:11) A no de fu taki dati Yehovah sa blesi den muiti di yu e du, efu yu tan pristeri yusrefi fu du a wroko disi di e tyari bigi blesi kon!