Den kisi foeroe—Den sa aksi foeroe foe den baka
1 Fa a de wan grani gi wi taki wi abi a waarheid! Foe di wi gi wisrefi abra na Jehovah, a ben „froetrow wi nanga a boen njoensoe” (1 Tes. 2:4). Disi e poti wan moro bigi frantiwortoe na wi tapoe. Jesus ben taki: „Foe ibri sma di ben kisi foeroe, den sa aksi foeroe foe en baka.”—Luk. 12:48b.
2 Fa den wortoe disi de troe! Foe di Gado blesi wi alamala nanga a sabi foe en Wortoe, wan toemoesi moi demakandra foe brada, èn wan toemoesi moi howpoe, dati meki wi kan taki troetroe dati wi kisi foeroe sani. A de reidelek, taki den e froewakti foeroe foe wi baka.
3 Tan hori wan joisti fasi foe si sani te a e go foe sani di den e aksi foe wi: Son sma ben kon na a bosroiti taki den e froewakti toemoesi foeroe foe wi. Leki Edeman foe a kresten gemeente, Jesus Krestes e bepaal „san de fanowdoe” foe meki sani na ini a gemeente waka boen (Ef. 4:15, 16). A e gi wi a djaranti taki ’a tjatjari foe en safoe èn en lai lekti’ (Mat. 11:28-30). Na wan lobi fasi a e hori den wan di skotoe na prakseri (Luk. 21:1-4). Efoe wi e gi a moro boen sani foe wi, a no abi trobi o foeroe dati de, dan wi sa kisi blesi.—Kol. 3:23, 24.
4 Aksi joesrefi: ’Den Kownoekondre afersi e kon leki den fosi sani na ini mi libi? Mi e gebroiki mi ten èn den sani di mi abi na so wan fasi, taki den e tjari prèise na a nen foe Gado èn taki den e tjari wini gi trawan? Mi feni taki moro foeroe foe mi prisiri e kon foe a dini foe Jehovah, na presi foe a prakseri di mi e prakseri mi eigi prisiri di e kon foe materia sani?’ Na opregti piki foe wi na tapoe den aksi disi e tjari kon na krin den reide di e boeweigi wi na ini wi ati.—Luk. 6:45.
5 Wai pasi gi a tesi foe doe san takroe: Noiti bifo den sortoe tesi nanga kwinsi ben de, di abi foe doe nanga gridifasi, a abi di sma abi belangstelling gi densrefi nomo, èn lobi gi prisiri di abi foe doe nanga sekslostoe. Ibri dei wi e miti tjalensi tapoe a gron foe boen gwenti nanga wet, ala di wi e kisi tesi foe meki wan skeki. Foe kakafoetoe gi den tjalensi disi nanga boen bakapisi, wi moesoe aksi Jehovah foe jepi wi (Mat. 26:41). Nanga jepi foe en jeje, a kan meki wi kon tranga (Jes. 40:29). A leisi di wi e leisi Gado Wortoe ibri dei de wan bigi jepi (Ps. 1:2, 3). A gi di joe e gi joesrefi tranga leri èn a dwengi di joe e dwengi joesrefi, e plei wan bigi ròl toe.—1 Kor. 9:27.
6 A no de nofo foe lobi san boen—wi no moesoe wani si na ai san takroe toe (Ps. 97:10). Disi wani taki, dati wi no moesoe kweki wan angri gi den sani di de takroe. Odo 6:16-19 e kari seibi sani di Jehovah no wani si na ai. A de krin taki wan sma di wani plisi Jehovah, no moesoe wani foe si den sani disi na ai toe. Foe di Gado blesi wi nanga wan soifri sabi foe waarheid, dan wi moesoe wani foe handri akroederi a sabi dati, ala di wi e hori wi prakseri na tapoe den sani di boen.
7 A fiti foe begi gi situwâsi di de boen foe „alaten abi foeroe foe doe na ini a wroko foe Masra” (1 Kor. 15:58). Foeroe sma si taki, efoe den abi wan druk schema na ini a diniwroko foe Jehovah, dan dati na wan kibri gi den foe di a no e gi den foeroe ten foe feti na baka sani di no warti noti.
8 Ala nanga ala, san Jehovah e aksi foe wi de toemoesi reidelek (Mika 6:8). Wi abi ala reide foe de nanga tangi gi ibri dienstgrani (Ef. 5:20). Foe dati ede, wi e go doro foe „wroko tranga èn span wisrefi”, nanga a froetrow taki wi paiman sa de moro bigi pasa ala sani di Jehovah e aksi foe wi.—1 Tim. 4:10.