Go baka na ala den sma di sori belangstelling gi a boen foe den
1 San na a moro prenspari sani di sa jepi wi foe bosroiti efoe wi sa libi wan poeblikâsi gi wan sma noso efoe wi no sa doe dati? A moro prenspari sani na a sori di a sma e sori belangstelling! Na so a de toe nanga a meki di wi e meki gobaka. Te wan sma sori pikinso belangsteling nomo gi a Kownoekondre boskopoe, dan wi wani doe ala sani di wi man foe jepi a sma dati. So boen, wi e meki gobaka nanga a marki foe kweki a belangstelling foe a sma èn foe bigin wan oso-bijbelstudie. Disi na a marki foe wi, srefi efoe wi no e libi wan poeblikâsi na baka. Fa wi kan doe disi?
2 Efoe na ini a takimakandra di joe ben abi fosi, joe ben taki foe den problema na ini a trowlibi na foeroe presi nojaso èn joe ben libi na „Eeuwig leven”-boekoe (Libi foe têgo-boekoe) na baka, dan joe kan bigin joe takimakandra na a fasi disi:
◼ „Na mi fosi fisiti, wi ben taki foe a trowlibi nanga praktis bijbel rai di kan jepi wi foe feni moro kolokoe. A no de so, taki srefi na ini den moro boen osofamiri, problema e opo ede kon ten na ten? [Gi okasi foe piki.] Bijbel e gi wi toemoesi boen rai di kan jepi wi loesoe problema na ini na osofamiri. Wan osofamiri kan kisi blèsi efoe den e studeri bijbel makandra.” Drai go na bladzijde 246 èn taki foe paragraaf 23. Leisi Johanes 17:3, èn taki dati joe wani jepi na osofamiri foe bigin studeri bijbel na oso.
3 Efoe joe ben taki foe pikin-nengre èn a abi di den abi leri fanowdoe, dan kande joe ben kan go doro nanga joe takimakandra na a fasi disi:
◼ „A lasti leisi wi ben taki dati pikin-nengre abi leri na jejefasi fanowdoe èn fa papa nanga mama kan jepi den na ini disi. Moro foeroe foe den papa nanga mama nanga soema mi ben taki, e broko den ede nanga na ogri fasi fa den jongoe sma e tjari densrefi nojaso. San joe e prakseri foe . . . ? [Kari wan eksempre foe wan ogri fasi fa jongoewan e tjari densrefi foeroetron na ini joe libimakandra. Gi okasi foe piki.] Meki mi sori joe son praktis rai di bijbel e gi.” Drai go na paragraaf 22 tapoe bladzijde 246 na ini na Eeuwig leven-boekoe (Libi foe têgo-boekoe), taki foe a prenspari penti, èn leisi Efeisesma 6:4. Sori na tapoe taki, te joe e loekoe en boen, dan foeroe pikin-negre wani kisi tranga leri èn wani, taki wan sma tiri den. Te papa nanga mama e gi den pikin foe den, den sani disi fajafaja, dan den pikin de moro kolokoe èn den e tjari densrefi na wan moro lespeki fasi. Tjari kon na krin fa wi e studeri bijbel nanga den pikin foe wi.
4 Efoe a tori foe joe takimakandra ben de a paradijs grontapoe, dan joe ben kan taki disi foe wiki a belangstelling foe a sma baka:
◼ „Wi ben loekoe wan toe prenki na ini a boekoe disi, di ben sori wi fa a grontapoe sa de te Gado e meki en tron wan paradijs. A no ben sa wani taki foeroe gi wi, efoe wi no ben sa man njan boen foe en nanga den lobiwan foe wi. A no so a de?” Gi okasi foe piki. Baka dati, drai go na bladzijde 162 na ini na Eeuwig leven-boekoe (Libi foe têgo-boekoe). Leisi Openbaring 21:3, 4, èn tjari kon na krin fa den lobiwan foe wi kan de nanga wi gi ala ten. Efoe a sma e piki boen, dan leisi Johanes 5:28, 29 foe sori taki den dedewan sa kon na libi baka. Sori na tapoe a fesisei kafti foe a boekoe èn taki: „Na so a de troetroe—wi kan libi foe têgo na ini wan paradijs na grontapoe!” Seti sani foe fisiti a sma wan tra leisi foe taki nanga en foe san ede wi sabi taki a paradijs de krosibei.
5 A prenspari reide foe san ede wi e go baka, na foe jepi den sma di abi belangstelling foe kisi wini foe a Kownoekondre boskopoe. Moro foeroe foe den sma abi wan sma fanowdoe foe gi den deki-ati di kan jepi den foe kisi angri gi jeje sani. Meki den poti prakseri na tapoe spesroetoe penti di abi praktis waarde na ini den poeblikâsi, ala di joe e poti krakti na tapoe fa a kan jepi den foe froestan bijbel moro boen. Den gobaka di e doro den marki disi, sa jepi trawan foe kisi wini gi densrefi na a moro boen fasi.