Prèise Jehovah ala ten
1 Foeroe aktiviteit no de di de so prenspari taki den moesoe hari wi prakseri ala ten. Na mindri den sortoe prenspari aktiviteit dati joe abi a njan di wi e njan, a bro di wi e bro, èn a sribi di wi e sribi. Den sani disi de prenspari efoe wi wani sorgoe a skin foe wi. Na apostel Paulus ben poti a preiki foe a boen njoensoe na mindri den srefi sortoe aktiviteit disi di a ben gi tranga: „Meki wi tjari wan srakti-ofrandi foe prèise gi Gado ala ten” (Hebr. 13:15). So boen, foe prèise Jehovah na wan sani di moesoe hari wi prakseri ala ten. A de wan sani di wi moesoe proeberi foe doe ibri dei, e prèise wi hemel Tata ala ten.
2 Di tra sma ben proeberi foe poeroe Jesus en prakseri foe poti en tapoe tra sani, a ben piki: „Mi moesoe meki a boen njoensoe foe Gado kownoekondre bekènti” (Luk. 4:43). Na ini a dri-nanga-afoe-jari diniwroko foe Jesus, ala sani di a ben doe ibri dei, ben abi langalanga na a wán noso tra fasi, foe doe nanga a gi di a ben gi Gado glori. Wi sabi taki na so Paulus ben firi, efoe wi e loekoe san a ben taki na 1 Korentesma 9:16: „Heloe foe mi efoe mi no ben meki a boen njoensoe bekènti!” Tra getrow kresten ben kisi a deki-ati foe ala ten de srekasreka foe opo taigi trawan foe a howpoe foe den (1 Petr. 3:15). Na ini a ten disi, hondro doesoen tron hondro doesoen fajafaja pionier nanga miljoenmiljoen gemeente preikiman e meki moeiti foe waka baka den sortoe moi eksempre disi.
3 Te wi e prakseri a faja di Jesus Krestes, wi Model, ben sori nanga en heri ati, dan dati e troesoe wi foe waka soifri ini den foetoemarki foe en wantewante (1 Petr. 2:21). Son tron wi kan lasi-ati te wi e kisi foe doe nanga den problema foe na aladei libi. Fa wi kan meki boen gebroiki foe na okasi foe prèise Jehovah ala dei te wi abi wan foeroeten grontapoe wroko? Èn tapoe a srefi ten wi no kan libi den frantiwortoe di wi abi na ini na osofamiri èn di e teki foeroe foe wi ten. Foeroe jongoe sma moesoe gi foeroe foe den ten na skoro ala dei. Son wan ben sa kan firi taki a no kan taki wan sma e prèise Jehovah na poebliki ibri dei. Son tron, son wan kan meki wan heri moen pasa, sondro foe den prati a boen njoensoe na a wán noso tra fasi.
4 Jeremia ben de wan sma di no ben man tapoe foe froeteri a boen njoensoe. Te a ben misi foe taki na ini a nen foe Jehovah gi wan sjatoe ten, dan a ben firi wan faja e bron na inisei foe en di ben moro en (Jer. 20:9). Ala di Jeremia ben kisi foe doe nanga sani di ben gersi hebi gens di ben o teki en abra, tokoe ala ten Jeremia ben feni wan fasi foe taigi tra sma a boskopoe foe Jehovah. Wi kan waka baka Jeremia en eksempre foe deki-ati, èn tan soekoe okasi foe prèise wi Mekiman ibri dei?
5 Wi no moesoe taki foe Jehovah tapoe fasti ten wawan, di a gemeente seti foe gi kotoigi nanga tra preikiman na ini a gebied di a gemeente kisi. So langa wan sma e arki wi, dan wi kan taki foe Jehovah. Ibri dei wi e miti nanga tra sma—den e kon na wi oso, wi e wroko nanga den na wi wrokope, wi e tanapoe na ini wan rij nanga den na wenkri, noso wi de nanga den na ini a srefi bus. San de fanowdoe, na wan switi taki odi nomo èn wan aksi di e hari a sma en prakseri noso foe taki wan sani nanga san joe kan bigin wan takimakandra. Foeroe sma feni taki a fasi disi foe gi kotoigi, na a fasi di abi a moro boen bakapisi. Te wi abi foeroe okasi foe taki nanga trawan foe a boen njoensoe, dan wi no ben sa denki srefi foe meki wan heri moen pasa sondro foe gi kotoigi foe a Kownoekondre.
6 A grani di wi abi foe prèise Jehovah noiti o kaba. Soleki fa a psalm singiman ben sori, dan ibri sani di e bro, moesoe prèise Jehovah, èn seiker wi wani de na ini a groepoe dati toe (Ps. 150:6). Efoe wi ati e troesoe wi foe doe so ala ten, dan ala dei wi sa meki boen gebroiki foe den okasi di wi abi foe taki foe Jehovah nanga en Wortoe.