Prèise Jehovah ala dei
1 A Gado foe wi, Jehovah, na wan toemoesi aparti lobi Mekiman, a Fonten foe ala libisani nanga kolokoe. Te wi e loekoe o bigi a de, dan troetroe a e froedini prèise foe ala den mekisani foe en. Ibriwan foe wi persoonlijk wani foe taki leki fa a psalm singiman ben taki: „Mi wani poti moro tapoe a prèise foe joe. Mi eigi mofo sa froeteri foe a regtfardikifasi foe joe, èn taki a heri dei foe a froeloesoe foe joe” (Ps. 71:14, 15). Foe doe disi, wi moesoe soekoe fasi foe prèise Jehovah ala dei èn kisi deki-ati foe taki boen foe en, a regtfardikifasi foe en èn den sani di a sreka foe froeloesoe sma.
2 Den fosi krestensma ben poti wan boen eksempre na ini a tori foe prèise Jehovah. Foe den 3000 sma di ben dopoe na a Pinksterfesa wi e leisi na Tori foe den Apostel 2:46, 47: „Dei foe dei den ben de doronomo na a tempel na ini wánfasi, . . . e prèise Gado èn ala sma ben lobi den . . . [èn] Jehovah ben tan meki den wan di ben kisi kibri, moksi nanga den ala dei.” Den ben leri den toemoesi moi waarheid foe Jehovah nanga en Mesias. A prisiri foe den ben meki trawan prisiri toe, èn na so wan fasi den ben e gi ete trawan deki-ati foe arki èn foe leri èn foe prèise Jehovah.
3 Den okasi disi de ala dei: Na ini a ten disi foeroe sma e si taki den kan prèise Jehovah ala dei foe di den e doe okasi preiki. Te den e teki sreka na fesi, dan dati e jepi den foe abi moro boen bakapisi. Wan sisa di ben teki a bosroiti foe abi wan prati na ini okasi preiki ben ondrofeni taki wan sma ben broko toe grasi foe en oto foe kan broko go na ini. A ben bèl wan presi pe den e doe reparatie wroko foe seni wan sma kon, èn baka dati a ben teki sreka foe gi a wrokoman kotoigi. A teki di a ben teki sreka ben abi na ini so srefi wan begi foe kisi a tiri foe Jehovah. A bakapisi ben de taki, a ben gi a wrokoman wan joeroe langa kotoigi èn ben libi a Libi foe têgo-boekoe na baka gi en.
4 Wan tra sisa ben miti doronomo nanga wan birfrow te den ben tjari den dagoe foe den go koiri. Wan leisi di den ben miti, dan den ben abi wan serjoesoe taki foe den problema foe a libi èn dati ben meki moro takimakandra kon. No langa baka dati, den ben bigin wan bijbelstudie. A warti foe froeteri, taki a birfrow ben erken bakaten taki a no ben o arki na Jehovah kotoigi efoe den ben klòp na en oso, foe di a no ben bribi na ini Gado noso na ini bijbel.
5 Son sma e feni makriki foe gi kotoigi te sma di e seri sani noso tra sma, e kon na den oso. Wan sisa na Ierland ben kisi fisiti foe wan man di e sroto levensverzekering. A sisa ben froeteri en taki a ben e loekoe go na fesi foe njan boen foe têgo libi. Disi ben de wan heri njoen idea gi a man disi di ben gro kon na ini Lomsoe relisi. A ben teki a Libi foe têgo-boekoe, ben fisiti wan konmakandra a wiki na baka èn ben agri foe kisi wan bijbelstudie. Now a salesman disi na wan dopoe brada.
6 Wi alamala moesoe de na ai gi den okasi foe prèise Jehovah ala dei. A boen foe hori wan toe tijdschrift noso traktaat pe sma kan si den èn di makriki foe pristeri gi fisitiman. Na ini son kontren, joe ben kan kisi difrenti okasi foe gi kotoigi efoe joe gebroiki pikinso ten foe sidon na tapoe wan bangi foe wan park, èn gi kotoigi na sma di e stòp foe bro wan toe miniti. Son jongoe kotoigi na skoro e poti bijbelpoeblikâsi na tapoe den tafra foe den èn na so wan fasi den kan bigin wan takimakandra nanga wan sma di e si den èn e poti aksi. Hori wan noso toe tekst na prakseri di joe kan sori. Aksi Jehovah foe jepi joe. Joe sa kisi blesi te joe e doe dati.—1 Johanes 5:14.