Soekoe Gado Kownoekondre fosi — Foe di joe e tjari wan slakti-ofrandi foe prèise ala ten
1 Denwan di e soekoe a Kownoekondre fosi, ala ten de na ai foe taki foe Jehovah nanga a Kownoekondre foe en (Ps. 145:11-13). Ibri dei den okasi de foe blesi en nen èn foe taki foe a boen njoensoe (Ps. 96:2). Foe prèise Jehovah ben de wan prisiri sani gi a psalm singiman, di ben froeklari: „Na ini Gado wi sa gi prèise heri dei” (Ps. 44:8). Efoe wi e firi a srefi fasi, dan wi sa de fajafaja foe abi wan doronomo prati ini a Kownoekondre diniwroko.
2 Jehovah no poti spesroetoe sani di e taigi wi omeni ten wi moesoe gi na a diniwroko, ma a e gi wi deki-ati foe prèise en „ala ten” (Heb. 13:15). Efoe den persoonlijk omstandigheid foe wi e gi pasi foe dati, dan wi moesoe poti leki wan marki gi wisrefi foe gi ibri wiki pikinso ten foe prèise Jehovah. Denwan di e doe dati kaba, kande kan seti den afersi foe den so, taki den kan dini leki wan jepipionier son tron, noso dini srefi leki wan jepipionier doronomo. Sonwan di ben njan boen foe a jepipionier-wroko, kande kan tron gewoon pionier.
3 Awansi fa den persoonlijk omstandigheid foe wi de, a kan, taki wi e meki a slakti-ofrandi foe prèise foe wi, kon moro foeroe? A faja di wan sma faja, e kon foe a warderi di a abi. Persoonlijk studie foe a Wortoe foe Gado e bow warderi. Den gemeente konmakandra e boeweigi wi foe sori a warderi dati na tapoe fasi di e wroko boen. Krosibei demakandra nanga tra fajafaja sma di e gi prèise, kan ’tranga wi foe doe toemoesi boen wroko’ (Heb. 10:24). Foe di wi e gebroiki den sani doronomo di a gemeente e gi, dan kande wi kan meki a slakti-ofrandi foe prèise foe wi kon moro foeroe.
4 Na oema-profeiti Ana ben gi wan moi eksempre ini a dini di wan sma e dini Jehovah. Ala di a ben owroe 84 jari, tokoe „noiti” a „ben misi ini a tempel, ala di a ben doe santa diniwroko dei nanga neti” (Luk. 2:37). Foe di Ana ben abi foe doe nanga den aktiviteit foe a gemeente, nanga en heri sili, meki a ben de troetroe tevrede nanga ensrefi. A bijbel tori foe a getrow diniwroko foe en, e gi wi deki-ati in a ten disi.
5 Paulus ben rikomanderi taki denwan „di tranga, moesoe tjari a swakifasi foe denwan di no tranga” (Rom. 15:1). A kan de so, taki sonwan ini a gemeente foe joe, ben sa man kisi wini foe a switi jepi nanga deki-ati foe joe. Wan kari di joe e gi den foe wroko nanga joe ini velddienst, kande na joisti san den abi fanowdoe. Kande wan preikiman kande abi vervoer fanowdoe noso kande a abi wan sma fanowdoe foe wroko nanga en. Nanga wan trawan kande a problema de taki a lasi-ati, èn kande joe na a wan di kan gi a jepi di e bow a sma, foe wiki a faja foe en gi a Kownoekondre diniwroko baka (1 Tes. 5:14). A wani di joe wani foe „abi wan prati makandra nanga den santawan akroederi den sani di den abi fanowdoe”, e sori na opregti angri foe joe foe gi moro prèise na a nen foe Jehovah. — Rom. 12:13.
6 Wi no ben o man bigin foe kari ala den sani di Jehovah doe kaba gi wi èn ala den sani di a sa doe ete. Na no wan fasi wi kan pai en baka gi den blesi disi. Someni krakti reide de, foe ’ibriwan sani di e bro gi Jehovah prèise’! — Ps. 150:6.