Now a ten doro
1 Di na apostel Paulus ben skrifi a di foe toe brifi foe en gi den Korentesma, a ben memre den taki den ben bosroiti foe doe wan toemoesi moi wroko foe jepi den kompe-bribiman foe den na Jerusalem. Ma wán jari ben pasa kaba, èn den no ben kaba ete nanga a wroko di den ben bigin. Dati meki a ben gi den deki-ati: „Go doro èn kaba en; de nanga a srefi faja foe kaba a schema foe joe, neleki fa joe ben faja di joe ben teki a schema.” — 2 Kor. 8:11, The New English Bible.
2 Ten na ten, wi alamala poti marki gi wisrefi. Kande wi teki a bosroiti foe doe moro ini a velddienst, foe kon sabi den brada foe wi moro boen, foe kon de bekwaam gi wan diniwroko grani, noso foe wini wan swakifasi foe wi. Ala di wi ben bigin nanga boen marki na ini prakseri, tokoe kande wi no go doro foe tjari a marki di wi ben poti, kon na wan kaba. Fosi wi ben man denki, dan wiki, moen, noso jari srefi kan pasa sondro foe wi go na fesi na a wan noso tra fasi. A kan de so taki wisrefi moesoe fiti a rai foe „go doro èn kaba” nanga san wi ben bigin?
3 Tjari den marki di wi ben poti na wan kaba: A makriki foe teki wan persoonlijk bosroiti, ma a de wan tra sani foe doro a marki dati. Te wan sma e draidrai, dan dati kan tapoe iniwan go na fesi. Wi moesoe sabi san wi wani foe doe èn baka dati abi a fasti bosroiti foe doe fajafaja moeiti foe go na fesi, sondro foe wan sani hori wi na baka. Na orga di wi e orga den persoonlijk afersi foe wi, na wan prenspari sani. A de prenspari foe poti a ten na wan sei di o de fanowdoe foe doe a wroko èn a de prenspari foe sorgoe taki wi e gebroiki a ten soso gi a marki dati. A de wan boen idea foe poti wan fasti ten gi wisrefi èn baka dati oefen wisrefi nanga a dwengi di wi moesoe dwengi wisrefi foe de seiker taki wi doro en.
4 Te wi e kisi problema foe doro den marki foe wi di wi ben poti, dan a de makriki foe go denki na so wan fasi: ’Na wan tra ten mi sa doe en.’ Ma wi no sabi san o pasa tamara. Odo 27:1 e froeklari: „No djaf foe a tra dei, bika joe no sabi sortoe sani a tra dei sa tjari.” A disipel Jakobus ben warskow foe no de toemoesi seiker foe a tamara, bika „joe no sabi fa joe libi sa de tamara. . . . Efoe wan sma sabi fa foe doe wan sani di boen èn tokoe a no e doe en, dan dati na wan sondoe gi en”. — Jak. 4:13-17.
5 Nanga someni sani di e hari wi prakseri èn nanga someni sani di tra sma e aksi wi foe doe, wi kan meki taki wi no si den marki di wi ben poti so krin moro. Ala di wi sabi foe san ede wi e doe dati, wi moesoe meki moeiti foe tan hori den marki foe wi boen na prakseri. Te wi e tan poti na afersi na ini begi, dan dati sa de wan jepi gi wi. Te wi e aksi trawan di de krosibei mati foe wi, foe jepi wi poti prakseri na tapoe den marki èn foe gi wi deki-ati, dan dati kan meki wan difrenti. Te wi e skrifi en na tapoe a kalender foe wi, dan dati sa memre wi foe loekoe fa wi e go na fesi. Wan sma moesoe sabi san a wani foe doe, foe „doe neleki fa a ben bosroiti na ini en ati”. — 2 Kor. 9:7.
6 A moen oktober e gi wi wan moi okasi foe poti prakseri tapoe den marki foe wi. Wi sa pristeri eksemplaar foe A Waktitoren nanga Ontwaakt! Wi kan pristeri abonnement tapoe den toe tijdschrift disi, te sma abi troetroe belangstelling, èn dati de moro foeroe na den gobaka. Wi kan poti wan toe reidelek marki foe doro? Fa a de nanga a proeberi di wi kan proeberi foe prati moro tijdschrift? Reidelek marki di foeroe sma kan poti, na foe meki moro gobaka nanga foe bigin wan njoen bijbelstudie.
7 A no de wan koni sani foe hori prenspari sani na baka gi wan tra ten, foe di „a grontapoe” disi „e pasa gowe” (1 Joh. 2:17). Spesroetoe grani nanga blesi de foe kisi ini a diniwroko foe Jehovah nownow de. A e anga foe wi, foe kisi wini foe den.