Bigin bijbelstudie nanga a Libi foe têgo-boekoe
1 Lobi gi sma moesoe troesoe wi foe go baka wantewante foe jepi den wan, di e angri èn di abi dreiwatra foe a waarheid (Mat. 5:6). Wi moesoe foe man si èn wi moesoe foe kweki iniwan pikinso belangstelling di wi feni kande, efoe wi no wani si a belangstelling disi dede gowe. A sreka di wi e sreka wisrefi, na a sroto foe abi boen bakapisi.
2 A marki foe wi moesoe de foe bigin nanga bijbelstudie (Mat. 28:20). Den fosi eksemplaar foe a Libi foe têgo-boekoe, ben abi a komentaar disi na ini na inleiding: „Foe troe, disi na wan toemoesi moi boekoe foe gebroiki te joe e studeri nanga iniwan sma, jongoesma noso owroesma, a no abi trobi osortoe leri den kisi.” A skrifi na so wan fasi, taki wi kan hori bijbelstudie moro makriki, èn a e meki taki den moro njoen preikiman srefi kan abi wan prati. A boen bakapisi di wi sa abi foe bigin njoen studie, e anga foe oboen wi de ini a meki di wi e meki den gobaka.
3 Fa wi kan bigin den studie? Te wi e go baka, dan foeroetron a boen foe meki a takimakandra foe wi, abi foe doe nanga wan toe penti noso aksi di wi ben kari na a fosi fisiti foe wi. Kande joe ben taki makandra foe san e pasa nanga den dedewan, èn joe ben libi na aksi: „Sortoe howpoe de gi den lobiwan foe wi di dede?” Tjari kon na krin taki na opobaka, a no wan howpoe sondro wan fondamenti; bijbel e taki foe foeroe eksempre foe opobaka di pasa kaba. Loekoe baka na den prenki na tapoe bladzijde 167-169. Baka dati, taki makandra foe den sani di skrifi ini paragraaf 1 nanga 2 na tapoe bladzijde 166. Efoe a sma abi belangstelling, dan taigi en taki joe wani kon baka foe taki moro fara.
4 Kande joe ben taki nanga wan papa noso mama, di ben sori taki a e broko en ede nanga den problema di e kon moro bigi èn di den e ondrofeni te den e kweki pikin. Joe ben sa kan taki nanga joe eigi wortoe, wan sani leki disi:
◼ „Ala papa nanga mama wani a moro boen sani gi den pikin foe den. Bijbel abi rai di kan jepi papa nanga mama foe leri den pikin foe den foe feni wan libi di e gi satisfaksi èn di wani taki wan sani èn di abi wan marki. Foe dati ede, wi e gi den osofamiri tranga foe studeri bijbel makandra. [Sori go na paragraaf 23 na tapoe bladzijde 246.] A sabi di joe sa kisi, sa tjari têgo blesi kon gi a heri osofamiri.” Leisi Johanes 17:3. Sori na osofamiri taki joe wani foe kon baka foe sori den fa den kan bigin nanga a studie foe den.
5 Efoe joe na wan jongoe preikiman noso wan njoen preikiman èn efoe joe ben taki sjatoe foe a howpoe foe a paradijs na a fosi fisiti, dan taki nomo foe wan sani leki disi, ala di joe boekoe opo tapoe bladzijde 3:
◼ „Bijbel e pramisi taki den wan di e doe a wani foe Gado, kan froewakti foe libi na tapoe wan grontapoe leki a wan disi, pe kolokoe nanga vrede sa de. A boekoe disi e sori san wi abi foe doe foe njan boen foe a blesi dati.” Taki sjatoe foe a fasi fa wi e hori bijbelstudie, èn aksi a sma efoe joe kan sori en fa wi e doe dati.
6 Leki disipel foe Jesus, wi abi a plekti foe jepi sma (Rom. 10:14). Efoe wi ben libi poeblikâsi na baka noso efoe wi ben abi wan boen takimakandra nomo, dan wi abi a frantiwortoe foe kweki a belangstelling (Mat. 9:37, 38). Efoe wi e doe a toewijzing disi heri boen, dan ala sma kan abi wan prati ini den blesi di sa kon leki wan bakapisi foe dati. — 1 Tim. 4:16.