Hori bijbelstudie ini a Libi foe têgo-boekoe
1 Ala di a ben e taki foe a Libi foe têgo-boekoe, wan oema ben froeklari: „Boiti a bijbel srefi, mi ben feni taki a boekoe disi na a moro soifri wan, di e naki sma ati èn e gi boen reide foe doe sani, di mi ben leisi wanten!” Wi alamala e agri taki a boekoe disi na wan foe den moro moi wan di kon na doro wanten foe jepi sma foe froestan a bijbel èn spesroetoe foe gi den reide foe kon tron sma di e prèise Jehovah fajafaja.
2 Ini 1982, a jari di a Libi foe têgo-boekoe ben kon a doro, 773 preikiman ben e hori 620 bijbelstudie ini Sranan. Nojaso 1644 preikiman e hori 2325 bijbelstudie. Te leki now, wan nomroe foe 62 miljoen foe a Libi foe têgo-boekoe ben druk ini 115 tongo. Fa a boekoe disi abi bigi krakti na tapoe a grontapoelontoe wroko foe wi!
3 Poti marki di joe wani doro: A kefarlek bigi gro disi na a bakapisi foe a blesi foe Jehovah èn foe di en pipel de fajafaja foe asisteri opregtiwan nanga a bijbel boskopoe di e kibri libi (Rom. 10:13-15; 1 Tim. 2:4). Wi e erken taki a ten e kon sjatoe èn a fanowdoe foe meki Gado Kownoekondre bekènti fajafaja.
4 Ala di na organisâsi e go na fesi, fa wi leki aparti sma e meki en? Wi e teki a bosroiti foe abi wan dorodoro prati na a toemoesi prenspari wroko foe meki disipel? Foe kan doe disi, wi moesoe poti marki di wisrefi wani doro? Wi kan gi wisrefi nanga moro faja foe go baka na sma di sori belangstelling? San ede wi no e poti wan marki foe bigin wan njoen bijbelstudie ini a moen februari?
5 Soema kan hori wan bijbelstudie?: Someni preikiman nanga difrenti background ben abi na prisiri foe hori wan bijbelstudie ini a Libi foe têgo-boekoe. A makriki fasi fa a skrifi e meki a hori foe a studie moro makriki, foe di a e meki srefi moro njoen preikiman abi wan prati na a prenspari wroko disi. Boiti dati, foeroe foe oenoe ben studeri en oensrefi, èn foe dati ede, wi de bekènti nanga den tori di de na ini. Wan preikiman di no ben e hori bijbelstudie bifo a ben gebroiki a Libi foe têgo-boekoe, ben skrifi foe warderi ede: „Mi abi dri studie èn a di foe fo de foe bigin. Mi no kan taki tangi nofo foe di oenoe meki a hori foe bijbelstudie so makriki.”
6 Srefi jongoewan abi wan fajafaja prati na a bijbelstudie wroko foe di den e gebroiki a Libi foe têgo-boekoe. Wan jongoe brada e libi a boekoe na tapoe en tafra na skoro. Disi ben opo a pasi gi boen takimakandra èn difrenti bijbelstudie. Son jongoewan ben gebroiki na wantewante fasi foe bigin, foe di den ben aksi papa nanga mama di den ben miti na a oso-foe-oso wroko primisi foe abi wan bijbelstudie nanga den pikin foe den. Den pikin foe oenoe noiti no jongoe toemoesi foe taki foe Jehovah pramisi foe têgo libi ini wan paradijs na grontapoe.
7 Efoe joe jongoe noso owroe, wan foe den moro bigi prisiri di iniwan sma kan abi ini a diniwroko, na foe hori wan oso-bijbelstudie. So boen meki ibriwan foe oenoe begi foe a jepi foe Jehovah èn graboe iniwan okasi foe meki a howpoe foe wi bekènti na poebliki. Leri trawan nanga jepi foe a Libi foe têgo-boekoe fa den kan abi wan prati na a prèise foe oenoe Gado, Jehovah. — Psalm 148:12, 13.