Bow tapoe belangstelling di sma ben sori, foe di joe e tjari gobaka di abi boen bakapisi
1 Ibri lezing di sreka boen na fesi, abi wan inleiding di e wiki a belangstelling, wan mindripisi di e gi foeroe bodoi, èn wan kabapisi di e poesoe sma foe doe wan sani. Na inleiding e hori a belangstelling foe den arkiman, ma sondro a mindripisi nanga a kabapisi, a lezing no ben sa de dorodoro. A srefi gronprakseri e fiti gi wi diniwroko. A de wan moi sani foe wiki a belangstelling foe na ososma na a fosi fisiti, ma wi moesoe tan bow tapoe a belangstelling dati, foe di wi e tjari gobaka di abi boen bakapisi.
2 Foe san ede Gado e gi pasi foe sma e pina? Fa na aksi dati e poesoe a denki foe sma! Joe no e agri taki foeroe sma ini a ten disi e denki foe a tori disi? Dati meki, ini na artikel na tapoesei, den ben gi leki idea taki joe e opo na aksi disi na a kaba foe a fosi fisiti, so taki joe kan gi piki na tapoe en te joe e go baka.
3 Joe ben sa kan taki disi:
◼ „Hallo. A lasti leisi di wi ben taki, wi ben taki foe a pasi di Gado e gi foe sma e pina, èn mi ben pramisi taki mi ben o kon baka na joe nanga son bodoi. Foeroe sma e firi taki efoe Gado troetroe e broko ede nanga wi, a ben sa tjari wan kaba kon na pina. Kande joe ben firi a srefi fasi. [Gi ososma okasi foe piki.] Bijbel e gi wi na seikerfasi taki Gado troetroe e broko ede nanga wi. [Leisi 1 Johanes 4:8.] Gado abi boen reide san ede a e gi pasi taki sma e pina te leki now. Den e taki foe wan foe den reide na 2 Petrus 3:9. [Leisi.] Den e taki krinkrin foe tra reide ini a brochure disi.” Baka dati, drai go na bladzijde 12-14 foe a brochure Gado e broko ede nanga wi troetroe? èn taki foe wan penti gi san a sma abi belangstelling.
4 Son ososma kan abi moro belangstelling gi wan dorodoro froeklari, èn wan toe gobaka kan de fanowdoe bifo den satisferi dorodoro nanga na piki. A boekoe Libi—Fa a doe kon? Nanga jepi foe evolutie noso foe di Gado meki sani?, abi wan kapitel di joe kan gebroiki leki gron foe tra takimakandra foe a tori.
5 Te joe e tjari a takimakandra na wan kaba, opo wan tra aksi èn taigi na ososma taki joe ben sa breiti foe prati son moi bodoi nanga en te joe e kon baka. Foeroe sma wani sabi san e pasa nanga wan sma te a dede. Foe san ede joe no e seti sani foe taki foe a tori dati na wan ten di fiti?
6 A sa de wan jepi gi joe foe hori dri gronprakseri ini prakseri. No de steifi. A kan taki a ososma no gwenti foe poti wan spesroetoe ten na wan sei gi wan bijbel takimakandra. No de langabere. No tan toemoesi langa noso no taki foe toemoesi foeroe penti a fosi leisi. Foeroetron, sma sa piki moro switi tapoe den fisiti foe joe efoe joe e taki foe wan toe penti nomo ini wan sjatoe pisi ten. De waran èn nanga switifasi. Sori a ososma taki joe abi belangstelling gi en leki wan aparti sma.
7 Na marki di wi wani doro na foe meki a ososma teki prati na wan bijbel takimakandra. Baka dati wi wani bigin wan oso-bijbelstudie nanga boen bakapisi ini wan poeblikâsi di fiti, so leki a Libi foe têgo-boekoe. Joe kan abi a prisiri dati efoe joe e bow tapoe belangstelling di a sma ben sori a fosi leisi, foe di joe e tjari gobaka di abi boen bakapisi.