Gebroiki prenspari jepisani na wan konifasi
1 Te joe e gi kotoigi oso-foe-oso, joe marki moesoe de foe meki ibri ososma teki prati na wan bijbel takimakandra di e bow den nanga jepi foe bijbel nanga tra prenspari jepisani. (Teki gersi 2 Korentesma 6:1; 2 Timoteus 2:15.) Nanga san den sma ini joe kontren e broko-ede den dei disi? Den e broko-ede nanga na ekonomia situwâsi èn a go di a osofamiri libi e go na baka? Wan toe bigin wortoe tapoe iniwan foe den tori disi kan meki taki joe kan abi wan switi bijbel takimakandra.
2 Joe ben sa kan taki:
◼ „Ini den ten disi di de wan tjalensi, foeroe sma e feni en tranga foe pasa a libi nanga den hei kostoe. Joe denki taki libisma tiri sa loesoe den moni problema foe wi na wan eerlijkfasi gi ibri sma? [Arki san na ososma e piki.] A prakseri disi ben de gi misrefi wan deki-ati . . . ”
3 Baka dati joe kan leisi Psalm 72:12-14 èn taki foe moro penti foe di joe e teki ete wan tekst na mindri denwan di joe kan feni tapoe bladzijde 352-353 foe a Taki-go-taki-kon boekoe. Noso baka te joe leisi wan tekst, joe kan sori go na wan paragraaf ini a traktaat Libi ini wan vrede njoen grontapoe. Foeroe preikiman—so srefi jongoewan—e bigin bijbelstudie, nanga boen bakapisi, nanga wan foe den traktaat foe di den e leisi wan paragraaf èn e aksi na ososma dan foe taki fa en e denki foe san ben leisi di djonsrode.
4 Ini son libimakandra kande joe wani foe gebroiki a fasi disi:
◼ „Foeroe sma ben sa wani si taki na osofamiri libi e drai go baka na den gwenti foe fositen. Joe denki taki ibriwan sma moesoe bepaal san den gwenti dati moesoe de, noso wan lin moesoe de gi ibriwan sma? [Gi okasi foe piki.] Foeroe sma e agri taki efoe sma ben waka baka a koni rai di bijbel e gi, joe ben sa si fa a osofamiri libi ben o kon moro boen.”
5 Te joe doro a marki disi kande joe kan bigin taki foe san na apostel e taki na Kolosesma 3:12-14 noso doe moeiti foe bigin wan oso-bijbelstudie na a fosi fisiti foe di joe e gebroiki penti ondro „Sortoe pasi foe abi boen bakapisi?” ini a traktaat Njanboen foe a osofamiri libi.
6 Efoe a ososma e sori taki a abi belangstelling, sori en o warti a boekoe Libi—Fa a doe kon? Nanga jepi foe evolutie noso foe di Gado meki sani? de di wi e pristeri a moen disi. Efoe joe no sabi omeni belangstelling a abi, gebroiki tra prenspari jepisani na wan konifasi foe di joe e sori en wan penti, ini wan traktaat, wan tijdschrift noso wan brochure di fiti.
7 Efoe joe man bigin wan bijbelstudie na a fosi fisiti, meki fasti mofo foe go doro nanga a takimakandra wan tra dei. Kande joe kan poti na fondamenti foe a tra fisiti foe joe, foe di joe e froeteri a ososma taki te joe e kon baka joe wani foe sori en na piki tapoe na aksi di someni sma e poti: „Foe san ede Gado e gi pasi foe sma e pina?” Na artikel na ondrosei, sa gi idea fa joe kan taki go doro foe a tori disi te joe e go baka.