Presteri na boen njoensoe — Te wi e tjari gobaka na sma di ben teki na Tégo Libi-boekoe
1 A no de wan span tori foe sabi dati doesoen-doesoen sma kaba ben teki na njoen boekoe Joe kan libi foe tégo ini wan paradijs na grontapoe? Ala sani e sori a tapoe dati na wrokosani disi foe bijbelstudie sa de wan toemsi warti wrokosani ini na tjari komakandrawroko ini na veld. — Jesaja 60:8, 22.
2 Ma na prati foe na boekoe de soso na fosi stap. Wi moe bow go moro fara nanga gobaka èn osobijbelstudie di e go na fesi. Foe di na Tego-libi-boekoe de foe na hori foe bijbelstudie, no poti na meki gobaka na a sma di abi belangstelling na wan tra ten.
3 Aladi den ben teki a boekoe, na belangstelling kan go na baka foe na druk foe na libi foe aladé èn den span di e komoto foe dati, soleki e agersi moi ini na agersitori foe Jezus foe na saiman (Matt. 13:28). Difrenti gobaka kan de fanowdoe foe meki wan studie bigin na son sma, ma foeroe prékiman abi te now ete boen winimarki foe di na a fosi fisiti den e presteri wan oso-bijbelstudie foe soso.
Praktis rai
4 Ma fa na belangstelling foe na Tégo libi-boekoe ben sa kan gro? Ini bepaalde presi foe wi kondre foe eksempre wi ben sa kan taki: „A boekoe disi e piki foeroe foe den fundament aksi di sma foeroe tron e aksi foe na bijbel. . . . Foeroe bribi e leri foe eksempre taki na hel na wan presi foe tégo faja pina gi den ogri sma. San joesrefi e prakseri foe dati? (Gi okasi foe taki.) Opregti sma e froewondroe te den ben jere taki Gado égi manpikin Jezus Kristus ben go na hel! (Efoe joe abi wan dan joe kan gebroiki wan foe den owroe Statenvertaling èn lési èn taki foe Tori. 2:31). Efoe wi ben sa teki na prakseri disi foe hel di sma abi ini algemeen, dan wi moe bribi dati Gado volmaakti Manpikin Jezus ben de wan ogrisma. A Wortoe foe Gado no ben sa ferteri na waarheid dan. Na a tra sé a sa abi joe belangstelling foe sabi na troe foe na Bijbel tapoe na aksi ’sortoe presi hel de?’” (A Tégo-libi blz. 81) Te joe kon tapoe a punt disi dan son prékiman e feni en wan switi sani foe kenki boekoe nanga na ososma, sodati en e gebroiki wan boekoe nanga strépi na ondro den piki. Poti prakseri baka den fosi dri paragraaf tapoe na difrenti mindri a boekoe foe en nanga di foe joe èn sori tapoe na winimarki èn na fanowdoe foe sreka joesrefi a fesi.
5 Wan tra fasi fa joe ben kan doe: „Joe ben prakseri oiti taki tégo libi de wan sani di kan? (Gi okasi foe gi piki.) A no de foe taki dati foeroe sma no abi na prakseri dati kwetkweti, te joe loekoe na pina, na ogri, èn na angri di wi alamala abi foe doe nanga den.” Joe kan naki na blz. 11 te nanga 13 opo èn taki: „Ma kow taki dati joe ben kan libi foe tégo na ondro den sortoe omstandigheden dati — dati no ben sa de wan switi sani”? (Gi okasi foe gi piki?) „Ma foe disi wan sani e aksi wel foe wi. Loekoe pikinso san paragraaf 19 e taki (Lési.) Meki mi sori joe now pikinso fa a boekoe disi joisti kan jepi joe nanga disi.”
6 Joe ben prati wan ofoe moro Tégo libi-boekoe? Efoe a de so, go séker baka èn poti prakseri moro na a sma di abi belangstelling. Sondro degedege joe sa si dati den foeroe moi sani foe na boekoe disi sa meki en makriki gi joe foe opo wan bijbelstudie di e go na fesi, awinsi noiti ete joe ben hori wan studi. Aksi Jehovah foe jepi joe èn doe na pisi foe joe te joe o gebroiki na njoen jepi disi foe bijbelstudie boen foe jepi wan tra sma foe leri sabi na howpoe tapoe tégo ini na paradijs na grontapoe.