Jepi denwan di abi belangstelling na wan lobifasi
1 Di na engel foe Jehovah ben tjari Filipus na wan Etiopiasma di ben abi belangstelling, dan na wan lobifasi a disipel Filipus ben aksi en foe jepi en froestan san a ben leisi (Tori. 8:26-39). Wi e meki spesroetoe moeiti foe jepi denwan di sori belangstelling? Wi moesoe doe so, foe di Gado gi wi a komando foe meki disipel (Mat. 28:19, 20). San wi kan doe foe jepi den?
2 Poti ten na wan sei ibri wiki foe tjari gobaka. Seti sani so, taki joe kan go na den sma di ben sori belangstelling èn proeberi foe go doro nanga a bijbel takimakandra di joe ben bigin na a fosi fisiti foe joe. Abi na prakseri foe san ede wi e bigin wan bijbelstudie. Doronomo go baka foe pristeri den lasti tijdschrift foe A Waktitoren nanga Ontwaakt! Te joe feni opregti belangstelling, dan joe kan pristeri abonnement.
3 Efoe, na joe fosi fisiti, joe ben taki foe a waarde di bijbel abi, dan joe ben sa kan go doro nanga a takimakandra, ala di joe e gebroiki bladzijde 76, 77 foe a „Redeneren”-boekoe („Taki-go-taki-kon”-boekoe) èn joe kan taki wan sani leki disi:
◼ „Sonwan e firi taki sma no kan gebroiki a rai di bijbel e gi ini a modern grontapoe foe wi. Fa joe e firi foe dati? [Gi okasi foe piki.] Joe no ben sa agri taki wan boekoe di e gi gosontoe rai, èn di kan jepi wi foe abi wan kolokoe osofamiri libi, na wan sani di wi kan gebroiki? [Gi a sma okasi foe taki wan sani.] Sani di sma e leri èn sani di sma gwenti foe doe ini a tori foe na osofamiri libi, kenki èn den bakapisi di wi e si nojaso, no boen. Ma, te joe loekoe en boen, dan den osofamiri di e fiti a rai foe bijbel ini den libi, na osofamiri di no e degedege èn di de kolokoe. Leisi Kolosesma 3:18-21. Pristeri a traktaat Waarom u in de bijbel kunt geloven (Foe san ede joe kan bribi bijbel), èn tjari kon na krin taki wi e pristeri wan fri bijbelstudie-programa.
4 Joe ben sa kan bigin wan takimakandra di e taki foe a kondisi foe den dedewan, na a fasi disi:
◼ „Sma ben taki foeroe kaba foe a kondisi foe den dedewan. San joe e prakseri e pasa nanga wi te wi e dede? [Gi okasi foe piki.] Foeroe relisi e leri taki wi e tan libi na wan noso tra fasi. Foeroe sma ben froewondroe foe leri san bijbel e taki foe na afersi disi. [Leisi Preikiman 9:5.] Ala di den dedewan no sabi notinoti, tokoe sma no frigiti den. Gado pramisi kaba foe tjari den kon na libi baka ondro a tiri foe en Kownoekondre.” Sori go na tapoe A Waktitoren foe 15 oktober 1994 (Bakratongo) noso go na bladzijde 162 foe na Eeuwig leven-boekoe (Libi foe têgo-boekoe), èn taki foe den bijbeltekst nanga den prenki. Seti sani foe meki wan tra gobaka, nanga a froewakti foe bigin wan bijbelstudie.
5 Efoe joe wani foe gi moro froeklari foe a fasi fa wan kresten e si orlokoe tori na mindri den nâsi, dan kande joe wani taki wan sani leki disi:
◼ „Son sma e bribi taki feti na a wan-enkri fasi foe seti den trobi foe den. Fa joe e firi foe dati? [Gi okasi foe piki.] Bijbel e sori taki Gado wani foe sma libi makandra ini vrede. [Leisi Romesma 12:17, 18.] Dati sa tron wan troe tori na heri grontapoe na ondro a tiri foe Gado Kownoekondre.” Sori go tapoe a brochure Bekommert God zich werkelijk om ons? (Gado e broko en ede troetroe nanga wi?), bladzijde 25-26. Aksi a sma foe kon baka foe tjari kon na krin, foe san ede Jesus ben leri wi foe begi meki ’a wani foe Gado moesoe pasa na grontapoe èn so srefi na ini hemel’. — Mat. 6:10.
6 Na eunuch foe Etiopia ben sabi taki a no ben o man froestan sani, sondro foe wan sma jepi en (Tori 8:31). Na wan lobifasi Filipus ben gi en a jepi di a ben abi fanowdoe. Wi kan sori wi troetroe lobi gi trawan, foe di wi e jepi den na a srefi fasi.