Gobaka nanga wan marki ini prakseri
1 Te joe e go baka na sma, dan joe moesoe meki moeiti foe gebroiki wan bijbeltekst di sa jepi a sma sabi moro foe a bijbel tori di joe ben taki a lasti leisi di joe ben drape.
2 Wán foe den marki te wi e go baka na presi pe wi ben prati tijdschrift, na foe bigin nanga wan tijdschriften route. Wan eenvoudig pristeri leki a disi, kan abi boen bakapisi:
◼ „Mi howpoe taki joe ben njan boen foe na artikel na ini a Waktitoren di mi ben libi gi joe, èn di ben tjari kon na krin foe san ede wi moesoe frede Gado. Tide mi tjari wan artikel foe na Ontwaakt! gi joe, di e aksi: ’Foe san ede a libi sjatoe so?’ Dati na wan boen aksi, a no so?” Joe ben sa kan go doro foe di joe e taki: „Den bekènti wortoe foe Jesus na Johanes 3:16 e gi a pramisi foe têgo libi. Grantangi teki a tijdschrift disi èn kisi deki-ati foe a steifi howpoe di Gado Wortoe e pristeri.” Baka dati tjari kon na krin taki joe sa kon baka foe tjari den moro njoen tijdschrift èn kande joe kan taki moro fara foe san Gado pramisi den libisma di e gi jesi na en. Memre taki ibri tron dati joe e tjari den tijdschrift, joe kan teri dati leki wan gobaka.
3 Efoe joe ben libi na artikel „Wan grontapoe sondro orlokoe—O ten?” na baka, dan joe kan taki:
◼ „Fa a libi ben o de na tapoe a grontapoe disi te orlokoe no ben de moro? [Gi okasi foe piki.] Meki mi sori joe san Gado pramisi foe doe.” Leisi Psalm 37:10, 11, èn sori fa a sa de te a wani foe Gado e doe djaso na grontapoe. Memre a sma sortoe sani Jesus ben leri den disipel foe en foe begi soleki fa skrifi na Mateus 6:9, 10. Jepi a sma foe prakseri boen foe san den wortoe foe Jesus wani taki. Efoe a sma abi oprègti belangstelling, dan joe kan pristeri wan abonnement tapoe A Waktitoren noso Ontwaakt! èn joe kan seti sani so taki joe kan kon baka foe taki moro fara.
4 Efoe joe go baka foe taki moro fara foe na artikel ’Foe san ede a libi sjatoe so?’, dan joe kan bigin tapoe a fasi disi:
◼ „A lasti leisi di mi ben taki nanga joe, wi ben taki o langa libisma kan libi. Sondro tweifri joe ben si na ini den artikel foe Ontwaakt!, dati sabidensiman no abi foeroe howpoe taki den man jepi wi foe libi moro langa leki 70 noso 80 jari. Ma fa joe e prakseri foe san bijbel e pramisi? [Gi okasi foe piki.] Bijbel e sori taki Gado abi wan moro boen sani na prakseri gi libisma.” Baka dati leisi Johanes 17:3 èn tjari kon na krin fa a teki di sma e teki sabi, kan tjari den go na a libi foe têgo. Te joe doro so fara, dan kande joe kan pristeri wan oso-bijbelstudie noso seti sani foe taki moro fara foe wan tra bijbeltori.
5 Foe bigin nanga wan bijbelstudie, na wan prenspari marki na ini wi diniwroko. Kande joe fisiti wan sma di ben teki den tijdschrift difrenti leisi kaba. Foe san ede joe no e proeberi a fasi disi foe bigin, a tra leisi te joe e go baka?:
◼ „Sma abi so foeroe difrenti idea foe relisi nanga a waarde foe en na ini a disiten libi foe wi. Sma e bribi sani di no e kroederi nanga makandra, sani soleki foe san ede Gado gi pasi taki ogridoe de noso foe san ede wi e owroe èn e dede. Son sma ben sa wani sabi fa den moesoe begi èn fa Gado kan jere den.” Opo wán foe den poeblikâsi foe wi di wi e gebroiki foe studeri bijbel, èn sori na ososma wán foe den tori di joe denki sa abi a belangstelling foe na ososma, èn sori sjatoe fa wi e hori wan bijbelstudie.
6 Jehovah na wan Gado nanga wan marki ini prakseri. Meki wi waka baka en na ini oktober, foe di wi e go baka nanga wan marki ini prakseri.