Sori taki joe e broko joe ede troetoe gi ala belangstelling di joe feni
1 A meki di a Kownoekondre moesoe meki bekènti na heri grontapoe sa kon na wan kaba heri esi, èn baka dati, ala den sma „di no sabi Gado” sa kisi pori (2 Tes. 1:7-9). Foe dati ede, troetroe broko-ede gi a libi foe tra sma, e boeweigi a pipel foe Jehovah foe miti so foeroe sma leki den kan nanga a Kownoekondre boskopoe.—Sef. 2:3.
2 Ibri moen, miljoenmiljoen joeroe e gebroiki foe soekoe den sma di wani jere a ’boen njoensoe foe wan moro boen sani’ (Jes. 52:7). Leki wan bakapisi foe a poeblikâsi di wi e pristeri now, foeroe sma teki eksemplaar foe A Waktitoren nanga Ontwaakt! noso a brochure San Gado e aksi foe wi? Troetroe broko-ede gi den sma disi, moesoe boeweigi wi foe tan kweki ala belangstelling di wi feni.—Odo 3:27.
3 Skrifi raport soifri: Joe sa man doe moro te joe e skrifi wan boen èn soifri raport foe a belangstelling èn den sani di joe libi na baka. Bodoi soleki a nen èn a tanpresi foe na ososma, a dei nanga a joeroe di joe ben fisiti en, poeblikâsi di joe libi na baka, èn a tori foe san oenoe ben taki, sa jepi joe foe abi moro boen bakapisi te joe e go baka. So srefi, efoe joe e skrifi wan toe sani di na ososma ben taki na joe fosi takimakandra, dan joe kan taki foe den baka na wan boen fasi te joe e go doro nanga a takimakandra na a gobaka.
4 Tjari gobaka wantewante: Omeni foe den sma di ben teki poeblikâsi foe joe a moen di pasa, joe proeberi foe fisiti baka? A ben de so, taki foeroe wiki ben pasa sondro taki joe abi kontakti nanga den moro? Troetroe broko-ede gi a têgo boen foe den moesoe boeweigi joe foe go baka so esi leki joe kan, èn a ben sa de moro boen foe doe dati na ini wan toe dei, so taki a takimakandra sa de krinkrin ete na ini a froestan. Te joe e gobaka wantewante foe wiki a belangstelling moro fara, dan a kan taki joe sa man foe gens den moeiti foe Satan bifo a „e kon èn e poeroe a wortoe di ben sai na ini den”.—Mark. 4:15.
5 A de toemoesi prenspari foe sreka: A boen bakapisi foe joe te joe e tjari gobaka, abi langalanga foe doe nanga o boen joe e sreka joesrefi. Prakseri na fesi fa joe o taki bifo joe e go. A bladzijde na bakasei foe Wi Kownoekondre Dienst foe april 1997 e gi difrenti pristeri di joe kan gebroiki nanga boen bakapisi, te joe e pristeri den tijdschrift noso a San Gado e aksi-brochure. A tra sani di joe moesoe doe, na taki joe moesoe abi wan toe prakseri na ede di joe wani prati nanga a sma te joe e go baka. San joe kan taki te joe e go baka na wan sma di ben sori belangstelling? Fa joe kan bigin wan bijbelstudie?
6 Te joe e go doro nanga wan takimakandra di e taki san sa de fanowdoe foe krin grontapoe èn foe meki a tron wan moro betre presi foe libi, joe ben sa kan taki:
◼ „Na a lasti fisiti foe mi, wi ben agri taki serjoesoe sani moesoe doe bifo grontapoe kan meki kon tron wan paradijs di abi vrede. Joe denki taki libisma abi san de fanowdoe foe man doe a wroko disi? [Gi okasi foe piki.] Grantangi, loekoe foe san ede a sa de fanowdoe taki Gado e kon na ini den afersi foe libisma.” Leisi Psalm 37:38. Baka dati, drai go na lès 5 na ini a San Gado e aksi-brochure, èn gebroiki aparti pisi foe paragraaf 4 nanga 5 foe sori fa Gado sa meki a profeititori disi kon troe. Go doro foe pristeri wan bijbelstudie foe di joe e gebroiki a brochure.
7 Efoe joe ben taki foe a Kownoekondre foe Gado èn joe ben libi a „San Gado e aksi”-brochure na a fosi fisiti, dan te joe e go baka, joe ben kan taki wan sani soleki disi:
◼ „Di wi ben taki a lasti leisi, wi ben si taki Gado Kownoekondre de wan troetroe tiri di sa tiri heri grontapoe. Bijbel e sori taki Krestes Jesus sa de a tiriman foe a Kownoekondre. Joe kan prakseri foe iniwan winimarki te wi abi a sortoe tiri èn fesiman disi?” Gi okasi foe piki. Opo a San Gado e aksi-brochure na lès 6. Ala di joe e gebroiki aparti penti na ini paragraaf 6 nanga 7 nanga a prenki na tapoe bladzijde 13, sori san Gado Kownoekondre sa doe gi a libisma famiri na ini a ten di e kon. Leisi Danièl 2:44, èn efoe a e fiti, sori a Sabi-boekoe èn pristeri wan bijbelstudie.
8 Efoe joe ben feni wan sma di ben erken taki den relisi foe a grontapoe ben meki problema gi a libisma famiri, joe ben sa kan aksi en disi na a gobaka:
◼ „Oiti joe aksi joesrefi fa wi kan kon sabi sortoe relisi Gado e feni boen? [Gi okasi foe piki.] A brochure disi, San Gado e aksi foe wi?, e gi den marki fa foe kon sabi a troe relisi.” Drai go na lès 13, èn poti krakti na tapoe den feifi penti di skrifi skoinsi na ini paragraaf 3-7. Joe kan go doro foe taki: „Boiti taki wi moesoe feni a troe relisi, wi moesoe kon sabi san Gado e aksi foe ibri sma aparti.” Leisi Johanes 4:23, 24. Aksi na ososma foe taki moro fara foe disi. Drai go na lès 21 na ini a brochure, èn sori fa wi e studeri.
9 Te joe e go baka foe go doro nanga wan takimakandra foe osofamiri kolokoe, joe ben kan taki wan sani leki disi:
◼ „Di wi ben miti a fosi leisi, mi ben froeteri joe san na a sroto gi wan kolokoe osofamiri, di de a gebroiki di wi moesoe gebroiki a rai di de foe feni na ini a Wortoe foe Gado, bijbel. Te a abi foe doe nanga den sani di wan disiten osofamiri abi fanowdoe, joe denki dan taki bijbel na wan owroeten boekoe noso taki a e fiti na ini a ten disi?” Gi okasi foe piki. Pristeri a Sabi-boekoe. Drai go na kapitel 2, èn leisi a sani di wan sma taki na ini paragraaf 13. Pristeri wan osofamiri bijbelstudie foe di joe e gebroiki den penti na ini paragraaf 3.
10 Te wi e skrifi den raport na wan soifri fasi, e sreka den sani di de prenspari, èn wi e go baka wantewante foe kweki a belangstelling foe den moro fara, dan wi kan sori a lobi di wi abi gi wi kompe libisma di kan hari den go na a pasi foe froeloesoe.—Mat. 22:39; Gal. 6:10.