Jepi trawan foe densrefi feni winimarki
1 Jehovah e pramisi wi taki a sa leri wi san wi moesoe sabi. A e gi wi a djaranti na Psalm 32:8: „Mi sa gi joe inzicht èn mi sa leri joe a pasi di joe moesoe waka. Mi sa gi joe rai nanga mi ai na joe tapoe.” A djaranti disi na wan bigi winimarki gi wi. Sondro foe wi prakseri wi eigi wini nomo, wi wani sori trawan fa densrefi kan kisi wini te den e doe san a koni rai foe bijbel e taki (Jes. 48:17). Na ini september wi kan doe disi foe di wi e pristeri na Eeuwig leven-boekoe (Libi foe têgo-boekoe). Te wi e pristeri san wi wani pristeri, dan difrenti fasi de fa wi kan sori a praktis waarde foe bijbel.
2 Foe di na ala sei, foeroe problema de na ini a trowlibi nojaso, dati meki joe ben kan froekisi foe poti spesroetoe prakseri na tapoe disi foe na „Eeuwig leven”-boekoe (Libi foe têgo-boekoe):
◼ „Moro foeroe foe den sma nanga soema mi taki, e broko den ede troetroe nanga a de di sma no de kolokoe na ini a trowlibi èn nanga a broko di sma e broko trow, wan sani di e gro toemoesi gaw na foeroe presi. Fa joe e si a problema disi? [Gi okasi foe piki.] Foeroe sma misi foe kon froestan san na den reide foe san ede den sani disi e pasa. Efoe den e meki opregti moeiti, dan a no de so nomo taki trowpaar kan sorgoe taki a trowlibi foe den e tan, ma den kan feni so srefi troetroe kolokoe na ini a trowlibi toe. A sroto foe meki a trowlibi waka boen, de foe feni na ini a fiti di sma e fiti den rai di de na ini bijbel, na ini den libi.” Leisi Efeisesma 5:28, 29, 33. Drai go na bladzijde 243, taki nanga a sma foe paragraaf 16 nanga 17, èn baka dati pristeri a boekoe.
3 Pikin-nengre abi boen ten nanga leri fanowdoe foe den papa nanga mama. Te joe e pristeri na „Eeuwig leven”-boekoe (Libi foe têgo-boekoe), dan joe ben kan taki:
◼ „Wi alamala e broko wi ede nanga a waka di sani moesoe waka boen nanga den jongoe sma foe wi na ini a ten di e kon. San joe prakseri de a moro boen fasi fa papa nanga mama kan jepi den pikin foe den foe feni wan seiker tamara? [Gi okasi foe piki.] Arki a rai foe wan bijbel odo di skrifi so wan 3000 jari pasa. [Leisi Odo 22:6.] Ala di den pikin foe wi kan kisi foeroe winimarki foe den sani di den e leri na skoro, tokoe a moro warti leri den e kisi foe den papa nanga mama na oso. A e aksi foe den papa nanga mama taki den gi den ten, gi den lobi, èn poti prakseri tapoe den pikin foe den, ma a warti ala moeiti di den e doe.” Drai go na bladzijde 245, taki nanga a sma foe den paragraaf 20 nanga 21, èn baka dati froeklari fa a boekoe kan gebroiki gi wan osofamiri studie foe bijbel.
4 Kande joe wani pristeri na „Eeuwig leven”-boekoe (Libi foe têgo-boekoe) foe di joe e sori fa grontapoe sa kon tron wan paradijs:
◼ „Mi de seiker taki joe wani sabi fa joe libi sa de na ini a ten di e kon. Na ini a Begi foe Masra, Jesus ben leri wi foe begi taki a wani foe Gado pasa na grontapoe neleki fa dati e pasa na hemel. Fa grontapoe sa de te disi pasa? [Gi okasi foe piki.] Djaso wan artiest meki wan prenki foe wan paradijs grontapoe. [Sori a prenki tapoe bladzijde 12 nanga 13. Baka dati leisi Jesaja 11:6-9, di de foe feni na ini paragraaf 12.] A no ben sa moi foe libi na ini so wan grontapoe? A boekoe disi sa sori joe fa joe nanga joe osofamiri kan libi na ini wan paradijs soleki a disi.”
5 A sreka di joe e sreka den sani di joe wani pristeri na fesi, na wan prenspari sani di sa meki joe abi boen bakapisi te joe taki nanga sma na den doro. Bifo joe naki tapoe den doro foe sma oso, sorgoe taki joe abi wan spesroetoe sani foe wan bijbeltekst na prakseri di joe wani taki nanga den sma. So srefi, joe moesoe abi na prakseri foe taki sjatoe foe wan sani di kan hari den sma belangstelling èn di teki foe a tijdschrift noso a traktaat di joe wani pristeri den sma, te den no wani teki a boekoe. Meki boen gebroiki foe ibri okasi di joe abi foe sai den siri foe Kownoekondre waarheid na ini september (Preik. 11:6). Joe sa jepi trawan foe kisi winimarki di sa tan foe têgo.