Tan hori a Kownoekondre wánfasi foe wi
1 Gado Kownoekondre na wan troetroe tiri di abi krakti nanga tirimakti. A ben de a thema foe Jesus preikiwroko (Mat. 4:17). A gi di a ben gi trawan leri èn a gi di a ben gi kotoigi foe a Kownoekondre waarheid, ben de a moro prenspari pisi foe Jesus diniwroko. A ben leri wi foe begi foe a Kownoekondre èn foe tan soekoe en fosi (Mat. 6:9, 10, 33). Te wi tan krosibei na Jehovah nanga en organisâsi èn e doe a preikiwroko di wi kisi foe doe, èn e hori wisrefi aparti foe grontapoe, dan wi man foe tan hori wi Kownoekondre wánfasi. Wi e sori nanga den sani di wi e doe èn e taki, dati wi de na a sei foe a Kownoekondre.—Joh. 18:37.
2 Sensi 1914, a Kownoekondre tron wan troetroe sani gi miljoenmiljoen borgoe. A wánfasi di den borgoe disi foe a Kownoekondre e sori, e difrenti krinkrin foe a grontapoe di no de ini wánfasi. Efoe wi wani, taki a Kownoekondre de wan krakti di e tai wi kon na wán, dan wi moesoe meki a Kownoekondre tron wan troetroe sani na ini wi libi. San e meki a de wan troetroe sani gi wi?
3 Neleki tra tiri, a Kownoekondre abi wan lo wet. Ma a difrenti de, taki den wet foe en de foe feni na ini bijbel. Foe leisi Gado Wortoe doronomo e memre wi foe den sani di de fanowdoe èn di wi leki borgoe foe a Kownoekondre moesoe doe. Persoonlijk studie foe den poeblikâsi foe wi èn a tiri di wi e kisi foe „a getrow èn koni srafoe” e jepi wi foe fiti Gado wet na ini wi aladei libi (Mat. 24:45). Te wisrefi fiti den sani disi na ini wi libi, dan moro nanga moro a Kownoekondre e kon tron wan troetroe sani gi wi, èn a e tjari wi moro krosibei kon na makandra na ini a bradafasi na heri grontapoe, èn a e meki wi de wán famiri foe anbegiman di de na ondro a tiri foe Jesus.
4 Wánfasi nanga jepi foe a Kownoekondre preikiwroko: A wroko di wi kisi foe doe na foe preiki a boen njoensoe foe a Kownoekondre „te na den moro fara pisi foe grontapoe” (Tori. 1:8). A preiki di wi e preiki „nanga wán prakseri”, e tai wi kon na wán te wi e meki foeroe moeiti foe gi Jehovah „glori” (Rom. 15:5, 6). Foe di wi abi wan fajafaja prati nanga wi kompe wrokoman na heri grontapoe, meki wi bribi e kon tranga èn a jeje foe Jehovah e wroko nanga jepi foe wi, foe doe en wani. Efoe wi „abi foeroe foe doe ini a wroko foe Masra”, dan dati e meki wi „stanfaste, kánkan”.—1 Kor. 15:58.
5 Na foeroe kondre, Satan e proeberi foe broko a wánfasi foe wi, foe di a e gens a preikiwroko foe wi. A e gebroiki ala sani san a abi, foe meki pratifasi kon èn foe meki wi no e froestan makandra boen, foe proeberi foe tjari strei nanga trobi kon (Odo 6:19; Gal. 5:19-21, 26). A ben sa wani taki wi kon abi foe doe nanga den trobi foe grontapoe èn srefi foe wi teki sei na ini politiek nanga sociaal afersi (Jak. 3:14-16). Bijbel e froemane wi foe kakafoetoe gi a krakti di a abi tapoe sma; noso a sa soekoe foe swari wi (1 Petr. 5:8, 9). Wi no moesoe meki a de di a Kownoekondre howpoe de wan troetroe sani gi wi, komoto gowe safrisafri na wi ati nanga froestan.
6 Wi abi wan gosontoe froestan nanga koni foe hemel fanowdoe foe tan hori a wánfasi foe wi. Te problema kon, spesroetoe efoe a abi foe doe nanga wi brada, dan wi moesoe sori a froktoe foe a jeje foe tan hori a vrede. Den eigifasi foe grontapoe soleki heimemre, djaroesoe, nanga a prakseri di sma e prakseri densrefi nomo, e tjari pratifasi kon èn wi moesoe doe moeiti foe wini den (Ef. 4:1-3; Kol. 3:5-10, 12-14). Wi moesoe foeroe wi froestan nanga positief prakseri di e bow wi. A Kownoekondre na wan troetroe sani na ini wi libi! Ma wi moesoe de na ai foe hori en na so wan fasi!—Ef. 6:11, 13.
7 A de di a toemoesi moi Kownoekondre howpoe foe wi de wan troetroe sani, e tai wi kon na wán ini wan denki foe wánfasi di no sa kaba noiti.—Ps. 133:1.