Soekoe den sma di wani teki leri
1 „No wan sma kan kon na mi, boiti efoe a Tata di ben seni mi kon, e hari en kon” (Joh. 6:44). Jehovah di e ondrosoekoe na ati sa pai den wan di wani teki leri èn e doe san den e leri (Jer. 17:10; Joh. 6:45). Wi abi a grani foe de en kompe wrokoman te wi e soekoe den safri-ati sma di e angri foe wan njoen grontapoe.—Ps. 37:11; 1 Kor. 3:9.
2 Jesus ben taki foe den disipel foe en leki „fisiman foe libisma” (Mat. 4:19). Ala di son tron a sortoe wroko dati kan aksi foeroe foe wi, tokoe den boen bakapisi di wi e kisi e gi wi foeroe satisfaksi. Na presi foe wroko gi wi eigi wini, wi e jepi den „fisi” foe no kisi wan pori di sa kon seiker. Wan boen fisiman moesoe sabi san a moesoe doe foe hari a fisi. Na a srefi fasi, wi moesoe pristeri a Kownoekondre boskopoe na wan switi fasi di e wiki a belangstelling foe den wan di e arki wi. Disi de spesroetoe so te wi e tjari gobaka. San wi kan taki?
3 Efoe wan sma ben sori belangstelling gi den „Waktitoren” artikel di e taki foe relisi, dan joe ben sa kan taki:
◼ „A lasti tron di mi ben de djaso, wi ben taki foe a tori foe san ede sma no lobi taki foe relisi. Joe no feni taki disi na wan freimde sani, foe di foeroe foe wi birtisma e taki dati den na kresten? Kande joe e aksi joesrefi foe san ede a tori foe relisi na wan sani di e tjari prati nanga trobi kon.” Gi okasi foe piki. Go na bladzijde 359 foe wi Redeneren-boekoe (Taki-go-taki-kon-boekoe) èn prati wan toe prakseri nanga a sma ondro na ede „Waarom zijn er zoveel religies?” (Foe san ede so foeroe relisi de?)
4 Joe ben sa kan gebroiki a srefi fasi disi foe bigin wan takimakandra ini a tori foe relisi:
◼ „Wan fasi de foe wi kan de seiker taki wi abi a troe relisi? [Gi okasi foe piki.] Foe di so foeroe difrenti relisi de, foeroe sma broeja èn den no de seiker.” Go na a Redeneren-boekoe (Taki-go-taki-kon-boekoe), bladzijde 365, 366, pe den e taki foe na aksi „Hoe kan men weten welke religie juist is?” (Fa wan sma kan kon sabi sortoe relisi na a joisti wan?). Gi wan sjatoe piki tapoe aksi nomroe 5, „Heerst er onderlinge liefde?” (Den memre e sori troetroe lobi gi makandra?) Froeklari fa a kan leri moro nanga jepi foe wan persoonlijk bijbelstudie.
5 Efoe a sori leki na ososma e broko en ede nanga a grontapoe situwâsi, dan joe ben sa kan proeberi disi:
◼ „Soleki fa a sori, dan joe e broko joe ede nanga den takroe situwâsi di wi abi foe kakafoetoe gi, di abi foe doe nanga a sorgoe nanga a kweki foe wi pikin. Bijbel e tjari wan toemoesi moi pramisi kon na krin di Gado sa meki kon troe na ini a ten di de na wi fesi di de krosibei.” Leisi Odo 2:21, 22, èn froeklari fa Jehovah pramisi wan grontapoe nanga vrede di sa tan.
6 Te wi e tjari gobaka, baka di a wroko foe prati a spesroetoe Kownoekondre njoensoe bigin, dan grantangi sorgoe foe libi wan eksemplaar foe a Kownoekondre njoensoe na den ososma di no abi wan. Na ini Wi Kownoekondre Dienst foe mei, wi sa taki foe san joe ben kan taki na gobaka pe joe ben libi a Kownoekondre njoensoe.
7 Foe di a Wortoe foe Gado „abi krakti”, dan wi moesoe proeberi foe gebroiki en ini den pristeri foe wi (Hebr. 4:12). Sorgoe taki joe gi na ososma deki-ati foe leisi a bijbel foe en. (Teki gersi Tori 17:11.) Efoe wi e doe fajafaja san wi moesoe doe, dan Jehovah sa blesi den moeiti foe wi.