Aksi boksoe
◼ San na a joisti fasi foe gebroiki den wortoe „brada” nanga „sisa”?
Te wi e loekoe a fasi fa den e gebroiki den wortoe „brada” nanga „sisa” troetroe, dan a e sori go na sma di abi den srefi papa nanga mama. A natoeroe banti disi nofo tron e meki wan waran firi kon, èn a krosibei banti di den sma disi abi e kon moro tranga nanga jepi foe den banti na sociaal sei èn emotioneel sei èn so srefi a banti di kon foe di den gro makandra na ini a srefi presi.
Jesus ben leri den disipel foe en foe kari Jehovah na ini begi „Wi Tata”. Foe di den e gebroiki den wortoe disi, dan disi wani taki dati leki kresten, wi alamala na memre foe wan krosibei osofamiri banti, pe wi kan njan boen foe wan toemoesi boen matifasi na jejefasi. Disi ben de san Jesus ben poti moro krakti na tapoe di a ben taigi den bakaman foe en taki „oen alamala na brada”. — Mat. 6:9; 23:8.
Foe di wi abi wan krosibei jeje banti na ini na osofamiri foe Gado, meki wi e kari makandra „brada” nanga „sisa”, spesroetoe tapoe den gemeente konmakandra. Na tapoe den sortoe jeje okasi disi, a sma di de fesiman foe a konmakandra e sori warderi gi den sma di dopoe foe di a e gebroiki a wortoe „brada” noso „sisa” èn a famiri nen foe a sma di a e kari na en nen.
San moesoe pasa te wan sma di no dopoe ete wani abi wan prati na tapoe den konmakandra? Te wan sma de nanga Jehovah pipel foe wan pisi ten kaba èn de foe teki dopoe, èn e si ensrefi leki wan kotoigi foe Jehovah, dan a no ben sa de wan problema foe gebroiki a wortoe „brada” noso „sisa” fosi a famirinen. Disi ben sa de spesroetoe troe efoe a sma tron wan preikiman di no dopoe ete.
Na a tra sei, sma di abi belangstelling èn bigin foe fisiti den konmakandra foe wi no so langa ete, no ben teki den bosroiti ete pe sma ben sa si den leki memre foe na osofamiri foe Gado. Wi no sa kari den sma disi „brada” noso „sisa”, foe di den no abi a jeje banti nanga na osofamiri foe Gado. So boen, na tapoe den konmakandra wi ben sa kari den na wan moro formeel fasi foe di wi e gebroiki wan fasi di fiti, soleki „meneer”, makandra nanga a famirinen foe den.
A gebroiki di wi e gebroiki den wortoe „brada” noso „sisa” na tapoe den gemeente konmakandra foe wi, e sori go na wan banti di moro krosibei èn di warti moro leki iniwan banti pe sma e kari trawan na den fesinen. A e memre wi foe a matifasi di blesi pasa marki, èn di wi abi leki jeje osofamiri na ondro a wán Tata, Jehovah Gado. A e memre wi so srefi na a dipi lobi èn firi di wi abi gi makandra. — Ef. 2:19; 1 Petr. 3:8.