Bijdrage gi a wroko foe a Genootschap na heri grontapoe e horibaka gi a gro
Soleki fa ben taki na fesi na Jesaja 54:2, 3, a soifri anbegi foe Jehovah e tan gro na heri grontapoe. Disi de so srefi na den difrenti kondre foe Afrika èn den èilanti na ini a kontren dati. Na ini den lasti tenti jari di pasa, den skotoe di ben poti gi a Kownoekondre wroko ben poeroe na den kondre soleki Angola, Ekwatorial Ginea, Etiopia, Kameroen, Madagaskar, Malawi, Mosambik, nanga Togo. Na ini den kondre disi èn tra kondre pe a veld weti foe koti, hondrohondro zendeling foe Gilead, sma di komoto na a Bedinari Skoro, memre foe a Bethelfamiri, nanga tra sma teki toewijzing. — Mat. 9:37, 38.
A de krin, taki a gro di den troe anbegiman e gro na ini Jehovah en organisâsi, e meki a de fanowdoe taki hondrohondro njoen Kownoekondre zaal moesoe bow. A de fanowdoe toe foe meki plan gi a bow foe kongreshal nanga njoen bijkantoro noso foe meki den bijkantoro moro bigi. Foeroe foe den bijdrage gi a wroko foe a Genootschap na heri grontapoe gebroiki foe pai gi den wroko disi èn so srefi foe meki a Kownoekondre wroko tan go na fesi, no soso na Afrika, ma so srefi na tra kontren foe grontapoe.
Den prenki èn tekening na tapoe toe bladzijde foe na inlegvel disi, e gi joe wan prakseri foe den moeiti di a Genootschap e doe na ini a veld foe Afrika. Den sani di a e sori, na wan toe foe den bow wroko di e doe na a momenti disi èn wroko di sa bigin heri esi.
Te joe e loekoe tapoe a tabel foe velddienst na ini a Jaarboek 1996, joe kan froestan moro boen san den preikiman na ini den kondre disi e doe na ini a diniwroko. Kefalek bigi gro feni presi na ini foeroe kondre, èn a gro di a kan gro ete, de foe si na ini den toemoesi aparti nomroe foe sma di ben fisiti a Memrefesa. Te wi e hori na prakseri san e doe leki wan pisi foe a Kownoekondre preikiwroko na heri grontapoe èn a wroko foe meki disipel na ini tra pisi foe grontapoe, a e naki wi ati foe si sortoe grani wi abi foe horibaka nanga materia sani gi a boen foe a troe anbegi. — Luk. 16:9; 1 Tim. 6:18.
[Prenki na tapoe bladzijde 3]
Kownoekondre zaal na KwaZoeloe-Natal, Zuid Afrika, di bow na ini 9 dei
[Prenki na tapoe bladzijde 3]
Kownoekondre zaal na Nigeria di abi ston skotoe di meki na fesi èn di boenkopoe
[Prenki na tapoe bladzijde 3]
Kongreshal na Mosambik nanga stoeroe gi 1500 sma, di moesoe klari na a kaba foe 1996
[Prenki na tapoe bladzijde 3]
Bijkantoro foe Mosambik, di moesoe klari foe gebroiki na a herfst foe 1996
[Prenki na tapoe bladzijde 3]
Bijkantoro foe Sièra Leon, de tapoe schema foe klari a zomer disi
[Prenki na tapoe bladzijde 3]
Wan kongreshal na Mauritius di abi wan daki, ma a no abi skotoe, makandra nanga bijkantoro, moesoe klari na a mofojari foe 1997
[Prenki na tapoe bladzijde 4]
A bijkantoro foe Zimbabwe e bow ete
[Prenki na tapoe bladzijde 4]
Wan kongreshal di no abi daki èn wan njoen bijkantoro e bow ete na Senegal
[Prenki na tapoe bladzijde 4]
Njoen bijkantoro na Kenia, na ini a mamafoto Nairobi
[Prenki na tapoe bladzijde 4]
Bijkantoro foe Madagaskar, moesoe klari heri esi
[Prenki na tapoe bladzijde 4]
Bijkantoro gi Malawi, na a fasi fa den prakseri foe meki en