Kownukondre zaal bow-programa e go na fesi
1 Na den „Kownukondre wánfasi” Distrikt Kongres di ben hori ini 1983 na ini Amerkankondre, den ben meki bekènti taki den ben o seti wan spesrutu fonsu pe den ben o poti moni na wan sei. A moni disi ben o gebroiki gi Kownukondre zaal di musu bow èn Kownukondre zaal di musu meki kon moro bun, na ini heri Amerkankondre nanga Kanada. Na a ten dati, di wi ben bigin du a wroko disi na ini wan tu kondre nomo, dan wi no ben sabi ete sortu blesi ben o kon leki bakapisi fu a wroko. Wi ben bigin ondrofeni moro bun san Psalm 92:4 e taki heri moi: „Bika yu meki mi prisiri, o Yehovah, fu den wroko fu yu ede; mi e bari wan prisiri babari fu den wroko fu yu anu ede.”
2 Wi breiti srefisrefi now nanga den sani di wi man du. Nownowde Kownukondre zaal e bow esi-esi na heri grontapu nanga yepi fu a Kownukondre zaal bow-programa. Wi alamala abi a grani fu teki prati na a wroko disi na wan noso tra fasi. Wi e du disi te wi e gi furu moni noso pikinso moni fu yepi bow moro presi na heri grontapu, pe sma kan go fu anbegi. Furu brada sosrefi e gebroiki den wrokosani fu den, a ten fu den, nanga den koni fu den gi den bow-wroko disi. A heri seti disi e waka bun fu di Yehovah e tiri a wroko, e horibaka gi en, èn e blesi den muiti di wi alamala e du.—Ps. 127:1.
3 Furu bijkantoro du a srefi leki san ben seti gi den Amerkankondre gemeente. Den Kownukondre zaal na ini furu kondre abi wan boksu pe den preikiman kan poti moni gi a Kownukondre zaal fonsu. Wi Kownukondre diniwroko fu maart 1997 gi Amerkankondre, ben meki bekènti taki wan kenki ben o kon ini a programa disi. Na artikel ben taki: „Den brada gi furu moni sensi den ben seti a Kownukondre zaal fonsu fu a Genootschap na ini 1983. Fu dati ede den ben kan leni moni fu bow Kownukondre zaal. Sowan 2700 gemeente na ini a kondre disi [Amerkankondre] kisi wini kaba fu a seti disi. Efu a seti disi no ben de, dan furu gemeente no ben man bow nyun Kownukondre zaal noso meki Kownukondre zaal kon bun baka. Now a de tranga fanowdu fu gebroiki pikinso fu a moni disi fu leni den gemeente na ini kondre pe sani no e waka bun srefisrefi na ekonomia sei. A Genootschap nanga den gemeente di e kisi wini fu a moni di gi, e warderi en trutru taki yu e horibaka doronomo gi a seti disi.”
4 A sani disi di ben meki bekènti ben de wan kari tu fu teki prati na wan Kownukondre zaal bow-programa di e go na fesi fu man bow konmakandra presi. A moni fu a Kownukondre zaal fonsu ben sa gebroiki tu fu tapu a nowtu fu wi brada na ini tra kondre, aladi moni sa leni ete fu bow Kownukondre zaal na ini Amerkankondre. Wan artikel di ben kon bakaten na ini Wi Kownukondre Dienst fu augustus 1997 ben taki: „A de fanowdu ala ten fu bow Kownukondre zaal na heri grontapu. Soso na ini a dienstyari di pasa, 3288 nyun gemeente ben opo. Furu fu den gemeente disi de na ini Afrika, Asia, Mindri-Amerika, Zuid-Amerika, nanga Owstu-Europa.”
5 Sortu bakapisi a seti dati ben abi sensi a ten dati? A Jaarboek 2001 ben fruteri: „Nanga yepi fu a seti disi, dan te nanga now 453 Kownukondre zaal bow kaba na ini 30 kondre, èn 727 zaal e bow ete. Wan prenspari sani di den ben musu seti gi ibri kondre, na wan fasi fu bow Kownukondre zaal leki fa den sma fu a kondre gwenti fu bow, èn nanga yepi fu den sani di den e gebroiki fu meki oso noso tra presi. Na ini Kenia den e gebroiki ston di den koti puru fu bigi ston; na ini Togo den gwenti fu gebroiki ston di meki fu klei, èn na ini Kamerun furu sma e gebroiki ston di meki fu cementi, èn bakaten den e pleister a skotu di meki fu den ston dati. Na a fasi disi, den brada fu a kondre srefi man leri esi-esi den koni di den abi fanowdu fu abi wan prenspari prati na a bow-programa di du na ini den eigi kondre.”
6 Wi kan si buweisi na ini a bigi kontren fu Afrika di e sori taki Yehovah e blesi a bow-programa disi trutru. Te yu luku den prenki fu wan tu Kownukondre zaal di ben bow, dan prakseri a krakti di a bow-wroko disi abi tapu a diniwroko fu Yehovah Kotoigi! A bow-wroko disi abi krakti tapu dri difrenti kontren, namku tapu a wánfasi fu wi bradafasi na heri grontapu, tapu a libimakandra fu a presi pe den du a bow-wroko, èn tapu ala den sma di e go na den gemeente konmakandra. Na inlegvel disi e poti prakseri na Kownukondre zaal di bow na ini Afrika, ma na ini wan tu Kownukondre diniwroko di e kon, wi sa luku fa a Kownukondre zaal bow-programa e go na fesi na ini tra kontren fu grontapu.
[Prenki na tapu bladzijde 3]
REPUBLIEK FU CENTRAAL-AFRIKA
Bimbo, Bangui
Begua, Bangui
[Prenki na tapu bladzijde 4]
Ukonga, Tansania
[Prenki na tapu bladzijde 4]
Akra, Gana
[Prenki na tapu bladzijde 4]
Salala, Liberia
[Prenki na tapu bladzijde 4]
Karoi, Zimbabwe
[Prenki na tapu bladzijde 4, 5]
Alada, Benin—Kownukondre zaal di ben de fosi
Alada, Benin—nyun Kownukondre zaal
[Prenki na tapu bladzijde 5]
Kpeme, Togo
[Prenki na tapu bladzijde 5]
Sokodei, Togo
[Prenki na tapu bladzijde 4, 5]
Fidjrosse, Benin
[Prenki na tapu bladzijde 6]
Lyenga, Sambia—Kownukondre zaal di ben de fosi
[Prenki na tapu bladzijde 6]
Lyenga, Sambia—nyun Kownukondre zaal
[Prenki na tapu bladzijde 6]
Kinsyasa, Kongo
[Prenki na tapu bladzijde 6]
Musambira, Rwanda