Preiki a Kownoekondre
1 Wi e kisi a tranga na ini Hebrewsma 10:23 foe „hori fasti na a meki di wi moesoe meki a howpoe foe wi bekènti na poebliki”. Èn wi poti a howpoe foe wi na tapoe a Kownoekondre foe Gado. Jesus ben komanderi spesroetoe taki a boen njoensoe foe a Kownoekondre moesoe preiki na ala den nâsi (Mark. 13:10). Wi moesoe hori disi na prakseri te wi e doe a diniwroko foe wi.
2 Te wi e go taki nanga sma, dan wi e proeberi foe bigin wan takimakandra di e go foe wan sani di den abi belangstelling gi noso di den e broko den ede nanga dati. Moro foeroe wi e taki foe sani di den sabi heri boen, soleki takroedoe na ini a birti, den problema foe jongoe sma, broko-ede foe wroko moni foe sorgoe joesrefi noso wan problema ini grontapoe afersi. Foe di moro foeroe foe den sma poti a prakseri foe den tapoe den „broko-ede [disi] foe a libi”, meki te wi e sori taki wi e broko wi ede nanga den èn taki wi e froestan den, dan foeroe tron den sa froeteri san de na ini a prakseri foe den (Luk. 21:34). Disi kan opo a pasi gi wi foe prati a howpoe foe wi nanga den.
3 Ma efoe wi no loekoe boen, dan a takimakandra kan go so fara taki wi e tan taki foe negatief sani èn no doro a marki foe san ede wi go na a sma, namkoe, foe preiki a Kownoekondre boskopoe. Ala di wi e poti prakseri na tapoe den takroe situwâsi di e tjari so foeroe banawtoe kon, tokoe a marki foe wi de foe poti a prakseri foe sma na tapoe a Kownoekondre, di te foe kaba sa loesoe ala den problema foe a libisma famiri. Wi abi wan troetroe toemoesi moi howpoe di sma moesoe jere foe en nomonomo. So boen, ala di na ini a bigin wi kan taki foe wan toe sani foe den „moeilek ten [disi] . . . di tranga foe pasa”, tokoe wi moesoe poti a prakseri esi-esi na tapoe a moro prenspari boskopoe foe wi, a „têgo boen njoensoe”. Na a fasi disi wi sa doe a diniwroko foe wi dorodoro. — 2 Tim. 3:1; 4:5; Openb. 14:6.