Wi e fruteri trawan fu a Kownukondre howpu fu wi
1 Na ini den muilek lasti dei disi, furu sma na grontapu no abi howpu (Ef. 2:12). Trawan no e handri na wan koni fasi, fu di den e poti den frutrow tapu gudu, tiriman, sabidensi, nanga tra sani. Wi breiti srefisrefi taki wi abi wan trutru howpu gi a ten di e kon, iya, a howpu dati na „wan ankra gi a sili, a de seiker èn a tranga”!—Hebr. 6:19.
2 Gado Kownukondre sa meki grontapu tron wan paradijs. Den lobiwan fu wi di dede sa kisi wan opobaka (Tori. 24:15). Pôtifasi, kruktudu, siki, owrudei nanga dede no sa de moro (Ps. 9:18; Mat. 12:20, 21; Openb. 21:3, 4). Disi na wan tu fu den pramisi fu Yehovah di sa kon tru heri esi. Sortu sani di Gado pramisi wi, yu e angri fu si kon tru?
3 Meki bun nyunsu bekènti: Wi no musu hori a Kownukondre howpu gi wisrefi. Lobi gi Gado èn gi tra sma e meki taki wi e teki na eksempre fu Yesus, fu ’meki a bun nyunsu bekènti na den pôtisma, èn fu preiki taki den strafuman o kon fri, taki den breniwan o si baka, èn taki den sma di e kisi kwinsi o gowe leki friman’ (Luk. 4:18). Na apostel Paulus ben preiki a bun nyunsu na wowoyo èn na tra presi pe sma ben de. A ben de fayafaya na ini a preikiwroko (Tori. 18:5). Te wi e teki prati fayafaya na a diniwroko neleki Paulus, dan wi sa sorgu taki ’den broko-ede fu a grontapu sistema disi, èn a bedrigifasi fu gudu’ no sa meki taki wi lasi a tranga howpu di wi abi leki Kresten.—Mark. 4:19.
4 Wi no e lasi a Kownukondre howpu fu wi te wi e miti sma di abi wan mi-no-ke fasi, sma di no wani arki a Kownukondre boskopu, noso te a gersi leki sma e gens wi. Wi e „tan fruteri sma fu a howpu fu wi sondro fu degedege” (Hebr. 10:23). Wi no „e syen gi a bun nyunsu” (Rom. 1:16). A kan de so taki, te son sma e si a bribi fu wi èn a fasi fa wi e horidoro, dan den e arki te fu kaba.
5 Aladi a fiti fu taki fu den situwâsi na grontapu di e kon moro ogri dei fu dei soleki fa Bijbel profeititori e sori, toku wi no e meki sma frede fu di wi e preiki nomo taki wan pori o kon. Na presi fu dati, a moro prenspari sani di wi e preiki na a Kownukondre howpu fu wi, iya, dati na a bun nyunsu fu Gado Kownukondre. Meki wi preiki a bun nyunsu disi fayafaya èn na wan fasi di e sori taki wi abi bribi. Na so wi sa abi a dyaranti te na a kaba, taki a howpu fu wi sa kon tru.—Hebr. 6:11.