Waka leki koni sma
1 Di Yesus aksi fo fisiman fu tron en bakaman, dan den no draidrai, ma „wantewante den . . . waka na en baka” (Mat. 4:18-22). Na so a ben de tu nanga Saulus fu Tarsus. Di a ben teki a Kresten bribi èn a ben kon si baka, dan a no draidrai, ma „wantewante a bigin preiki na ini den snoga taki Yesus na a Manpikin fu Gado” (Tori. 9:20). A ten no e wakti wi, èn te a pasa kaba, a no e drai kon baka. Fu dati ede a de prenspari gi wi fu „waka leki koni sma”, te a abi fu du nanga a fasi fa wi e gebroiki wi ten.—Ef. 5:15, 16.
2 Sani di e pasa sondro taki wi fruwakti dati: A kan taki den okasi di wi abi tide fu anbegi Yehovah, wi no o abi tamara (Yak. 4:14). Wi alamala kan ondrofeni wan ’sani di e pasa sondro taki wi fruwakti dati’ (Preik. 9:11). Boiti dati, wi alamala e kon owru, èn na ini a grontapu sistema disi wi no man wai pasi gi „den muilek dei” di wi e kisi te wi e kon owru. Leki bakapisi fu dati, wi no man du so furu moro na ini a diniwroko fu Yehovah (Preik. 12:1). Fu dati ede a no de wan koni sani fu draidrai fu gi wisrefi abra na Gado, noso fu wakti a yoisti situwâsi fu du moro na ini a diniwroko, aladi wi man du moro nownow kaba (Luk. 9:59-62). Abraham ben firi korostu di a kon grani, èn a dede leki wan man di ben „de tevrede nanga en libi”, fu di a ben libi na wan koni fasi, iya, a ben de wan sma di ben du a wani fu Yehovah en heri libi langa.—Gen. 25:8.
3 A ten kon syatu: Wi wani gebroiki wi ten na wan koni fasi tu, fu di „a ten di tan abra kon syatu” (1 Kor. 7:29-31). Heri esi na owru grontapu sistema disi sa kon na wan kaba. A kotiwroko fu ’a nyanyan fu grontapu’ o kon na wan kaba heri esi, èn wi no o abi okasi moro fu teki prati na a wroko fu tyari den sma di de leki skapu, kon na wán (Openb. 14:15). Wi musu luku bun taki wi no e lasi wi ten nanga den broko-ede fu a libi èn nanga tra sani di kan puru wi prakseri fu a diniwroko, fu di wi kan gebroiki a ten dati moro bun na ini a diniwroko (Luk. 21:34, 35). A sa de wan prisiri sani te wi e memre bakaten fa wi ben e du a kotiwroko fayafaya!
4 Wi musu tan na ai doronomo, so taki wi no e misi den okasi di kan opo kon fu du difrenti sani na ini a diniwroko di e gi prisiri. Meki wi abi a fasti bosroiti fu du ala san wi man fu dini Yehovah ’solanga wi kan taki ete fu „Tide”’ (Hebr. 3:13). Te wi e du disi, dan wi e sori taki wi koni trutru, fu di „a sma di e du a wani fu Gado sa tan fu têgo”.—1 Yoh. 2:17.