Fa a de nanga den famiri foe joe?
1 Foeroe foe wi abi wan toe famiri di no de na ini waarheid. Wi e angri fajafaja taki den sortoe lobiwan disi kon nanga wi na tapoe a pasi foe libi! A broko di wi e broko wi ede nanga a têgo tamara foe den, kan bigi moro te den na memre foe wi eigi osofamiri. Ala di wi proeberi jari kaba foe meki den kisi belangstelling gi waarheid, wi no moesoe denki te foe kaba, taki howpoe no de moro.
2 Di Jesus ben e preiki „den brada foe en, foe taki en leti, no ben poti bribi na ini en” (Joh. 7:5). Den famiri foe en ben prakseri wan leisi srefi taki a ben law (Mark. 3:21). Ma tokoe, Jesus no ben tapoe foe jepi den. Baka ten, den brada foe en ben teki waarheid (Tori. 1:14). En afoe brada Jakobus ben tron wan stonfoetoe na ini a kresten gemeente (Gal. 1:18, 19; 2:9). Efoe joe ben sa wani abi a prisiri foe si den famiri foe joe teki waarheid, no tapoe foe gi den a boen njoensoe foe a Kownoekondre.
3 Gi kowroe-ati, no gi den toemoesi foeroe: Te Jesus ben preiki gi trawan dan den arkiman foe en ben firi kowroe-ati, den no ben frede gi a fasi fa a ben taki (Mat. 11:28, 29). A no ben foeroe den nanga leri di den no ben kan froestan. Foe man gi den famiri foe joe kowroe-ati nanga waarheid watra, gi den pikinso nomo ini wan leisi, no toemoesi foeroe! Wan opziener di e rèis ben taki: „Den moro boen bakapisi e kon foe den wan di wiki belangstelling na den famiri foe di den ben gi pikinsopikinso pisi foe waarheid.” Na a fasi disi, srefi sma di ben gens waarheid kan bigin poti aksi èn te foe kaba kweki wan angri gi waarheid.—1 Petr. 2:2; teki gersi 1 Kor. 3:1, 2.
4 Foeroe kresten di trow, gi kotoigi nanga boen bakapisi na den patna foe den di no de na bribi, foe di den ben libi lectuur opo na artikel di ben kan wiki a belangstelling foe den. Wan sisa di ben doe disi, ben studeri so srefi nanga den pikin foe en na wan presi pe a masra foe en ben kan jere den èn ben gi bodoi di ben sa jepi en. Son tron a ben sa aksi en taki: „Tide mi ben leri so nanga so na a studie foe mi. San joe e feni foe dati?” Te foe kaba a masra foe en ben teki waarheid.
5 Abi lespeki, no lasi pasensi: Wan preikiman ben taki dati „srefi famiri abi a reti foe abi den eigi denki èn eigi fasi foe si sani”. So boen, wi moesoe sori lespeki te den e taki fa den e denki noso te den aksi wi krinkrin foe no taki nanga den foe a waarheid (Preik. 3:7; 1 Petr. 3:15). Foe di wi abi pasensi èn lobi èn foe di wi de sma di e arki boen, wi kan soekoe okasi di e fiti foe gi kotoigi na wan koni fasi. A sortoe pasensi disi kan gi boen bakapisi, soleki fa wi kan si dati ini a kefal foe wan kresten masra di nanga pasensi ben horidoro 20 jari langa na ondro a takroe fasi di en wefi, di no de na bribi, ben handri en. So esi leki a ben bigin kenki, a brada ben taki: „Mi de Jehovah tangi srefisrefi taki a ben jepi mi foe kweki langa pasensi, bika mi man si a bakapisi now: Mi wefi bigin waka na tapoe a pasi foe libi!”
6 Fa a de nanga den famiri foe joe? A kan de taki „joe kan wini den gi Jehovah”, nanga jepi foe a boen kresten fasi fa joe e tjari joesrefi èn nanga jepi foe den begi foe joe gi den.—1 Petr. 3:1, 2, foetoewortoe.