Abi wan prati na ini a wroko di no o doe noiti moro
1 Na tapoe difrenti ten na ini a heri historia foe libisma famiri, Jehovah ben feni taki a ben de fanowdoe foe tjari kroetoe kon na tapoe den feanti foe en. Ma, foe di a ben abi sari-ati, a ben gi den reti-atisma wan okasi foe kisi froeloesoe (Ps. 103:13). A fasi fa den ben handri na tapoe a sari-ati foe en, ben bepaal san ben o pasa nanga den.
2 Foe eksempre, fosi a Froedoe na ini 2370 b.G.T., Noa ben de „wan preikiman foe regtfardikifasi”. Den sma di ben lasi libi ben de den wan di no ben arki a warskow foe Gado (2 Petr. 2:5; Hebr. 11:7). Fosi a pori foe Jerusalem na ini 70 G.T., Jesus ben taki krinkrin san iniwan sma ben sa moesoe doe foe lowe gi a pori di ben o kon na tapoe a foto. Ala den sma di no ben arki a warskow foe en ben ondrofeni toemoesi takroe bakapisi (Luk. 21:20-24). Den sortoe warskow nanga kroetoe disi foe Gado ben gi foeroe tron baka na ini a heri historia.
3 Wan warskow wroko na ini a ten disi: Langa ten pasa kaba Jehovah ben taki dati a ben sa loesoe en atibron na tapoe a godelowsoe sistema foe a ten disi èn taki soso den safri-ati wan ben o tan na libi (Sef. 2:2, 3; 3:8). A ten di de foe preiki a warkow boskopoe disi e kon sjatoe esi-esi! A „bigi banawtoe” de leti na wi fesi, èn den safri-ati sma e tjari kon na makandra now. Ija, den „veld weti foe koti”. Foe dati ede, no wan tra wroko de so prenspari èn so serjoesoe leki disi.—Mat. 24:14, 21, 22; Joh. 4:35.
4 Wi moesoe abi wan prati foe meki tra sma jere a warskow di e bari now na ini a ten disi gi trawan, „a no abi trobi efoe den no sa jere noso efoe den no sa teki en”. Disi na wan toewijzing di wi kisi foe Gado di wi no moesoe teki leki wan soso sani (Esek. 2:4, 5; 3:17, 18). Na abi di wi abi wan prati na ini a wroko disi doronomo e gi wan boen demonstrâsi foe a dipi lobi di wi abi gi Gado, na opregti broko-ede di wi abi gi wi birtisma, èn a fasti bribi foe wi na ini wi Froeloesoeman, Jesus Krestes.
5 Now na a ten foe doe wan sani: Baka den kroetoe di Jehovah ben tjari na ini a ten di pasa, godelowsoe fasi ben opo ala ten baka foe di Satan nanga den ogri jeje foe en ben de aktief ete. Ma a leisi disi, a sa de tra fasi. A krakti di Satan abi sa pori gowe. Wan warskow na heri grontapoe foe wan „bigi banawtoe” di sa kon heri esi, noiti no sa de fanowdoe moro (Openb. 7:14; Rom. 16:20). Wi abi a spesroetoe grani foe abi prati na ini a wan wroko di no sa doe noiti moro. Now na a ten gi wi foe gebroiki na okasi disi na a moro boen fasi.
6 Foe a preikiwroko foe en na apostel Paulus ben taki nanga foeroe overtoigi: „Mi krin foe a broedoe foe ala libisma” (Tori. 20:26). A no ben firi no wan broedoe-paiman na en tapoe foe di a no ben gi a warskow. Foe san ede? Bika a ben kan taki foe a diniwroko foe en: „Foe a sani dati foe troe mi e wroko tranga, mi e doe tranga moeiti” (Kol. 1:29). Meki wi abi a srefi satisfaksi foe abi prati te nanga pe wi man, na ini a wroko di no sa doe noiti moro!—2 Tim. 2:15.