Kisi tranga nanga na libi howpoe foe wi
„Dati meki wi e wroko tranga en wi e span wisrefi, bikasi wi ben poti wi howpoe tapoe wan libi Gado. di de wan Jepiman foe ala sortoe libisoema, moro spesroetoe foe den getrouw wan.” — 1 Timoteus 4:10.
1. Foe san ede na wortoe foe Gado moe gi wi tranga foe doe wan sani?
INI na wortoe foe Gado wi e feni „toemsi moi Wortoe” en „na skrifi foe joisti wortoe foe waarheid” (Pred. 12:10). Den wortoe disi de spesroetoe toemsi moi, foedi den e wiki wan libi howpoe ini wi — na howpoe tapoe tégo libi inisé foe na seti foe sani foe na Kownoekondre, di na Soeverein Masra Jehovah ben meki kon tapoe so wan lobifasi nanga jepi foe hen Manpikin, Jezus Kristus (Joh. 3:16; Rom. 15:12, 13). Soleki na prekiman (na tjari-kon-makandra-man) ben taki disi, dan den „wortoe foe den koniman de . . . leki maka gi mankaw”, di e gi den arkiman foe hen tranga foe doe wan sani. Den wortoe foe koni nanga howpoe di wi e lési ini na Wortoe foe Gado, moesoe gi wi na soboen tranga foe wroko tranga en foe span wisrefi foe dini den afersi foe hen regtvaardiki kownoekondre. — Pred. 12:11.
2. Na kon foe san den soema nanga bribi ben loekoe foe?
2 Foe sensi na ten di Jehovah Gado ben gi na pramisi foe Eden dan soema nanga bribi loekoe na a kon foe na kroetoedé, pe na Messiaans Siri ben sa masi na ede foe na Sneki (Gen. 3:15; Rom. 16:20). Dati ben sa de na kroetoedé foe na grontapoe foe Satan, nanga na hémarki na verloesoe foe ala soema di ben poti na howpoe foe den ini Jehovah kownoekondre ini anoe foe hen Kristus. — 2 Tim. 4:1, 18; Luk. 21:28.
WAN VERZEKERDE HOWPOE
3. (a) Foe san ede disi de wan verzekerde howpoe? (b) San moe gi wi tranga foe meki na howpoe foe wi bekenti na publiki?
3 Ini na bijbelboekoe Hebreeër, kapitel 11, wan langa lijst e gi foe man nanga oema di e sori wan bribi di de wan eksempel. Den ben abi „wan verzekerde verwakti foe sani di den ben howpoe na tapoe”. Na howpoe dati ben de wan troe troe sani gi den, en den ben handri akroederi nanga dati, aladi den „verwakti na foto di abi troe troe fundamenti, en foe na foto dati Gado de na Basi nanga Mekiman”. Aladi den no ben si na kon troe foe den pramisi ini na ten foe den, tog „den ben si en ben taki odi na hen farawe en den ben meki bekenti na publiki dati den ben de vreemde soema nanga wakaman ini na kondre” (Hebr. 11:1, 10, 13). Ini na ten disi na howpoe dati no de moro langa wan sani di den e si „farawe”, bikasi na Kownoekondre de krosibé! Omeni moro wi abi foe datede reden foe meki na publiki na howpoe foe wi bekenti! — Matt. 24:14, 33.
4. Sortoe sani Henoch ben taki na fesi, en fa disi abi waarde gi wi ini disi ten?
4 Son wan foe den getrouw man dati di ben abi na „verzekerde verwakti foe sani di den ben howpoe na tapoe”, ben libi ini wan ten foe na kroetoe foe Gado, soleki wi toe e libi now ini wan pisiten foe kroetoe. Jehovah ben gebroiki den foe ben warskow den ogri soema. Na so Henoch ben taki na fesi ini den dé bifo na Froedoe foe den pori fesi soema: „Loekoe! Jehovah ben kon nanga hen santa myriaden foe tjari a kroetoe kon tapoe ala soema en foe verteri den ogri soema dati den fowtoe nanga ala den ogridoe di den ben doe tapoe wan ogri fasi en foe ala den takroe sani di ogridoe sondari ben taki gi hen” (Jud. 14, 15). Na kroetoe dati de wan agersi fasi foe na kroetoe di Gado sa tjari kon tapoe na disiten grontapoe, di e seki joe ini hen ogridoe.
5. Sortoe eksempel Noach ben gi tapoe na tori foe wroko bribi?
5 Ooktoe Noach di ben tan na libi di na kroetoe foe Gado ben tjari kon tapoe na ogri grontapoe ini hen ten, ben de „wan prékiman foe regtvaardiki fasi” (2 Petr. 2:5). A ben span hensrefi foe doe wroko foe bribi en ben „bow wan ark leki jepi foe hen osofamiri; en nanga na bribi disi a ben kroetoe na grontapoe” (Hebr. 11:7). Noach ben de wan toemsi moi eksempel gi wi ini disi ten. Heri esi na regtvaardiki kroetoe foe Gado sa de foe si, te den soema „di no sabi Gado . . . sa ondrofeni na reti strafoe foe tégo pori, farawe foe na fesi foe na Masra en foe na glori foe hen tranga”. Now di wi e doro na kon foe na kroetoe, a de moro tranga fanowdoe leki oiti na fesi foe meki bekenti tapoe na heri grontapoe na regtvaardikifasi foe Jehovah! — 2 Thess. 1:5-10.
6. (a) Sortoe fositen kroetoe e poti krakti tapoe na sekerfasi foe na „bigi benawtoe”? (b) Fa wi kan lon komoto foe na kroetoe disi?
6 Na mindri den soema di ben meki den howpoe bekenti na publiki, ben de Abraham nanga Sara, so toe Isaäk nanga Jakob. Abraham ben libi ini na ten di Gado ben tjari na kroetoe kon tapoe Sodom nanga Gomorra. A ben howpoe faja faja dati Sodom ben kan tan fri foe na pori, srefi efoe tin regtvaardiki soema ben sa feni ini na foto dati (soleki hen neef Lot). Te foe kaba Gado ben taigi hen: „Mi no sa pori den foe den tin ede.” Soleki Abraham wi e howpoe now kande , dati boen foeroe soema kan tan na libi foe na pori ini na „bigi benawtoe” di e kon. Ma nono! Na ogri grontapoe disi moesoe foe pori soleki disi ben pasa nanga Sodom nanga Gomorra, foe krin na grontapoe soboen leki wan sreka foe na paradijs di e kon. Na wan enkri fasi foe pasa libi-libi na kroetoe foe Gado, de foe no de wan pisi foe grontapoe, soleki Lot nanga hen famiri ben lon komoto foe Sodom bifo na foto disi ben kisi pori nanga faja. En a ben sa tjari ooktoe rampoe kon foe drai go baka na den sani foe na grontapoe. „Prakseri na oema foe Lot.” — Luk. 17:26-32; Gen. 18:22-32; 19:15-26; Matt. 24:21; Joh. 15:19.
7. Sortoe grani, soleki di foe Ezechiël, wi abi ini disi ten, en san wi moe doe ini disi?
7 Na mindri den getrouw „wolkoe foe kotoigi” di Paulus e skrifi foe den ini Hebreeër 11 leki soema di abi „na verzekerde verwakti foe sani di den e howpoe na tapoe” ben de „Samuël nanga den tra proféti”, en fa den ben sori dekati di den ben meki na wortoe foe Jehovah bekenti! (Hebr. 11:32; 12:1). Ooktoe Ezechiël de wan foe den „kotoigi” dati. Komoto foe Babylon a ben taki na fesi foe, na takroe kroetoe foe Jehovah tapoe na Jeruzalem di ben fadon komoto foe bribi — wan kroetoe di ben kon ini 607 bifo G.T. Na ernst foe na wroko foe Ezechiël e kon na krin, foe na „wortoe foe Jehovah” di ben kon na hen tapoe difrenti okasi. A wortoe ben de: „’Foe taki now foe na waktiman, efoe a si na feti-owroe e kon en a no blo troe troe tapoe hen toetoe en na pipel no e kisi srefi no wan warskow en wan feti-owroe e kon en e poeroe wan sili foe den, dan disi srefi sa poeroe gwe foe hen égi sondoe ede, ma na broedoe foe hen mi sa aksi baka foe na anoe foe na waktiman srefi.’ Foe taki now foe joe, o libisoemapikin mi ben poti joe leki wan waktiman gi na oso foe Israël, en foe mi mofo joe moe jere na wortoe en joe moe warskow den foe mi ede” (Ezech. 33:6, 7; 3:17-21). Wi e si now na „Feti-owroe e kon”? Wi e verstan dati na disiten „benawtoe” na mindri den naatsi-sondro pardon sa tjari na feti foe Gado foe Har-mageddon kon? Dan wi moe blo na „warskowtrompeti” en sori den soema na pasi go na Gado kownoekondre — na wan enkri howpoe foe den. Fa a de wan grani foe abi wan prati na a warskowwroko disi ini na kroetoedé foe disi ten, soleki Ezechiël na a ten dati ben abi wan prati ini disi! — Matt. 24:3-8, 14; 25:31, 32; Openb. 16:13-16.
NA „VOLMAKER FOE NA BRIBI FOE WI”
8. Sortoe moi eksempel Jezus ben gi tapoe na tori foe na gi foe wan warskow?
8 Baka di Paulus ben skrifi foe wan bigi „wolkoe foe kotoigi, di foeroe foe den ben préki wan warskow boskopoe ini den ten bifo Kristus, dan a de poti prakseri tapoe na „Moro Prenspari” Fesiman nanga Volmaker foe wi bribi, Jezus”. Na Manpikin disi foe Gado ben meki Gado Kownoekondre sondro frede bekenti ini na ten foe wan kroetoedé — en na tjari kon foe na Kroetoe ben kon nanga na pori foe Jeruzalem ini 70 G.T. Paulus e gi wi, di e libi baka ini wan tra kroetoedé, na dekati foe „hori oen ai boen” en foe „loekoe boen” tapoe na eksempel di Jezus ben gi di a ben tanapoe ondro druk, sodati „wi no ben sa weri en ben sa brokosaka ini wi sili”. — Hebr. 12:1, 7.
9, 10. (a) Sortoe njanjan Jezus ben si leki boen diri? (b) Foe sortoe sani Jezus ben leri hen discipel?
9 No wan soema ben wroko moro tranga gi den afersi foe na kownoekondre foe Jehovah leki na Manpikin foe Gado srefi. Ini disi a ben waka baka na eksempel foe hen Tata ini hemel, bikasi a ben taki: „Mi Tata tan wroko te now ete, en mi e tan wroko.” Na kownoekondrediniwroko ben wani taki moro gi Jezus leki letterlijk njanjan, bikasi a ben taki ooktoe: „Mi njanjan de, dati mi doe na wani foe hen di ben seni mi en foe meki hen wroko kon klari. . . . Loekoe! Mi taki gi joe: „Opo joe ai en loekoe koe den gron, dati de weti foe koti na njanjan foe den. Now kaba na kotiman e kisi pai en e tjari froktoe konmakandra foe na tégo libi.” — Joh. 5:17; 4:34-36.
10 Jezus ben taki dja foe wan kotiwroko tapoe na gebied foe na koti foe soema, den wan di „den ben foefoeroe en di den ben drifi go en drifi kon leki skapoe sondro herder”, en di a ben waka pasa den foto nanga dorpoe en ben leri foe na howpoe foe na Kownoekondre, a ben gi na eksempel foe na kotiwroko disi. A ben de ooktoe wan warskow-wroko, bikasi di Jezus ben seni hen twarfoe apostel, a ben leri den: „Efoe den no teki oen na wan presi ofoe no arki na den wortoe foe oenoe, libi dan na oso ofoe na foto dati en seki trowe na stof foe joe foetoe. Foe troe, mi taki gi joe: A sa de moro makriki (foe tjari) gi Sodom nanga Gomorra leki gi na foto dati tapoe na Kroetoedé.” — Mat. 9:35–10:15.
„MORO BIGI WROKO LEKI DISI”
11. San Jezus ben taki sjatoe bifo a ben spikri na wan paal?
11 Tapoe na neti bifo den ben spikri Jezus na wan paal, a ben verteri hen discipel foe na krosbé wanfasi foe hen nanga hen Tata ini na doe foe wroko en a ben taki moro fara: „Foe troe mi taki gi joe taki: na soema di sori bribi ini mi, sa doe hensrefi den wroko di mi e doe; en a sa doe moro bigi wroko leki disi, bikasi mi e go na a Tata” (Joh. 14:9-12). Jezus ben sori tapoe sortoe wroko? Fa den disi ben sa kan de moro bigi leki di na Manpikin foe Gado srefi ben doe en di ben wroko ini wanfasi nanga hen Tata?
12. Fa Jezus ben sori san den „moro bigi wroko” disi ben sa de?
12 Wan toe dé na baka, baka na dede nanga opobaka foe hen, Jezus ben sori hensrefi na hen discipel ini Galiléa en a ben sori san den „moro bigi wroko” disi ben sa de, di a ben taki: „Go foe datede en meki discipel foe soema foe ala naatsi en dopoe den ini na nen foe na Tata en foe na Manpikin en foe na santa jeje en leri den foe hori ala sani di mi ben gi joe komando. En loekoe! mi de nanga joe ala dé te nanga na bosroiti foe na seti foe sani.” Fo-tenti dé langa Jezus ben tan leri den foe na kownoekondre foe Gado en, let bifo a ben opo go na hemel, a ben taigi den: „Oenoe sa kisi krakti te na santa jeje kon na oenoe tapoe, en oenoe sa de kotoigi foe mi ini Jeruzalem en ini heri Judéa en Samaria en te na den moro farawe presi foe grontapoe.” — Matt. 28:16-20; Tori foe den Apostel 1:3-8.
13. Sortoe „gi kotoigi fini-fini” ben gi ini na ten foe den apostel?
13 Na so fasi Jezus ben taki foe wan toemsi bigi kotoigi- nanga leriwroko di ben sa panja hensrefi go ini ala oekoe foe na grontapoe. Na prékiwroko disi ben bigin, nanga na blesi foe Jehovah, baka di nanga Pinksteren santa jeje ben kanti trowe tapoe hen discipel. Disi ben abi leki bakapisi „na gi kotoigi finifini”, soleki na boekoe Tori foe den Apostel dorodoro e sori. wan foe den soema di ben teki fesi ini na wroko disi, ben de na apostel Paulus, di bakaten ben taki gi den owroe man foe na kristen gemeente ini Efese: „Mi no ben hori mi srefi na baka foe verteri oenoe ala san ben boen en foe leri oenoe ini publiki en oso foe oso. Ma djoe soleki na Griki mi ben gi kotoigi fini-fini foe berouw na Gado en bribi ini wi Masra Jezus.” — Tori foe den Apostel 20:20, 21, 24; 2:40; 10:42; 23:11; 28:23.
14. (a) Te o fara na préki ben doe bifo 70 G.T. (b) Fa den wrokoman ben si na dini foe Gado wawan?
14 Den fosi-eeuw kristen dati ben teki na tapoe den foe warskow den soema en foe leri den na „boen njoensoe”, sodati den djoe ben sabi boen na kon krosibé foe na pori foe Jeruzalem — di ben kon wantronso ini 70 G.T. soleki Jezus ben taki na fesi (Matt. 23:37, 38; 24:15-22). Di na ten foe na tjari foe na kroetoe ben kon krosibé, dan na apostel Paulus ben kan skrifi dati na howpoe foe na „boen njoensoe ben préki ini na heri mekisani di de ondro hemel” (Kol. 1:23). Na „gi kotoigi disi fini-fini” troe troe ben abi leki bakapisi „wroko” di ben de moro bigi leki di Jezus ben doe! En soema ben de den wrokoman? A ben de sakafasi man nanga oema di ben poti tapoe na fosi presi ini den libi na dini foe Gado wawan. Makandra nanga na apostel Paulus den ben kan taki: „Na dini foe Gado de boen gi ala sani, foedi a abi wan pramisi foe na disiten libi en na libi foe na ten di e kon. . . . dati meki wi e wroko tranga en wi e span wisrefi, bikasi wi ben poti wi howpoe tapoe wan libi Gado, di de wan Jepiman foe ala sortoe soema, moro spesroetoe foe den getrouw wan” (1 Tim. 4:8-10). Na „gi kotoigi fini-fini” foe den en na teki prati na den „moro bigi wroko” Gado ben blesi boen ini na kroetoedé dati.
DISITEN KOTOIGI
15. Fa den activiteit foe Jehovah kotoigi kenki nanga di foe den religie foe na kristenheid?
15 Ini na laatste kroetoedé disi gi na ogri grontapoe, di ben bigin di den „fasti ten foe den naatsi” ben kon na wan kaba ini 1914 G.T., dan wan bigi ipi kotoigi ben meki bekenti tapoe na langa nanga bradi foe na grontapoe foe Jehovah nen nanga kownoekondre. Na fasi fa den e gi kotoigi foe na howpoe foe den, na kristenheid no e feni boen, soleki den djoe kerki fesiman ben veragti Jezus nanga hen apostel (Luk. 21:24; Joh. 7:45-52; Tori foe den Apostel 5:27-29). Jehovah Kotoigi no e poti den vertrouw tapoe wan toe elitaire kerki fesiman, di de na froktoe foe seminaries ofoe theologische héskoro, foe den disi teki presi gi den tapoe wan kansel ofoe tapoe televisie ofoe radio. Den de moro foeroe densrefi wan genootschap foe prékiman, di de moro leki toe miljoen, di e gi kotoigi nanga jepi foe takimakandra nanga soema. Oso foe oso, tapoe publikipresi en na okasi den e meki na howpoe bekenti foe na „boen njoensoe” di den meki de stéfi ini den ati (Tori foe den Apostel 5:42; 20:20, 21; 1 Petr. 3:15). Tapoe wan getrouw fasi den meki soema jere na warskow, dati na grontapoe disi de ini na kroetoedé foe hen en tanapoe na fosi ‵so wan bigi benawtoe leki no ben kon sensi na bigin foe na grontapoe te leki now, en ooktoe no sa kon moro toe”. — Matt. 24:21, 22.
16. Sortoe soema Jehovah ben teki foe doe hen wroko ini disi ten?
16 Ini disi ten den kristen kotoigi foe Jehovah ben doe na asrefi fasi „moro bigi wroko” nanga jepi foe Gado jeje tapoe wan moro bigi fasi — leki den wroko di Jezus ben doe na na a ten dati. Den de, ibriwan foe den aparti, moro foeroe bréti foe de na sortoe foe soema di ben skrifi foe den: „Oenoe e si na kari foe Gado, brada, dati Gado no ben kari foeroe koniwan na skinfasi, no foeroe maktiwan, no foeroe foe hé gebortoe; ma Gado ben teki den don sani foe grontapoe foe meki den koniwan kisi sjen; en Gado ben teki den swaki sani foe grontapoe foe meki den tranga sani kisi sjen; en Gado ben teki den sani di no abi grani na grontapoe, den sani di soema e veragti, den sani di no de, foe meki kon de noti den sani di de, sodati no wan skin sa meki bigi na Gado fesi” (1 Kor. 1:26-29). Nofo tron joisti wan sakafasi kownoekondre-kotoigi, di de „don” ini na ai foe grontapoe, ma di goedoe ini bribi, sabi foe doro na ati foe den soema di e teki ten foe arki.
SORI NA „LIBI HOWPOE” FOE WI
17. (a) Fa Jehovah ben blesi hen pipel ini na dinijari 1979, akroederi nanga Ps. 145:10-14? (b) San de wan toe foe den bericht di e kon na fesi, di joe e feni tapoe na tabel?
17 Ini na dini jari 1979, Jehovah ben blesi na kotoigi-activiteit foe hen pipel tapoe na heri grontapoe tapoe wan wondroe fasi en a ben jepi den agen baka foe doe „moro bigi wroko” winsi verbodsbepaling, vervolgoe nanga economische druk ben de. Agen wan bigi kotoigi, ben gi foe Jehovah nen nanga na kownoekondre soleki joe kan si tapoe na tabel ini na Bakra-tongo Wachttoren foe 1 april 1980, bladzijde 18 te nanga 21.
18. (a) Fa a de nanga den dopoe? (b) Fa na kownoekondrediniwroko meki froktoe? (c) San na bericht e sori foe na Memrefesa en sortoe howpoe wi abi foe den foeroe soema di ben de drape?
18 Ini na bericht spesroetoe den soema di ben dopoe e kon na fesi: 113.672 — 19,6 percent moro foeroe kotoigi ben wroko ooktoe ini na velddienst en moro foeroe joeroe di ben gi na a Kownoekondre-diniwroko, moro foeroe go-baka di ben tjari gi soema di abi belangstelling en moro foeroe bijbelstudie di ben hori ini na oso foe den soema disi di gersi skapoe. Na studi-wroko disi e tjari froktoe kon en disi wi kan si, foedi na nomroe foe den soema di ben de tapoe na moro prenspari konmakandra foe na jari — na Memrefesa foe memre na dede foe Jezus — ben de moro bigi leki ini wan ten, foe taki 5,323.766 soema, 4,4 percent moro foeroe leki na jari na fesi. Wi e howpoe dati den dri miljoen soema di no de Kotoigi sa go na fesi foe doe wan „publiki bekenti foe redding”. — Rom. 10:8-10.
19. (a) Sortoe moi bericht de foe na pionieractiviteit? (b) Na sortoe fasi na pioniersdienst e jepi foe doe „moro bigi wroko”?
19 A de wan switi sani foe si o moro foeroe-ten pionierwrokoman foe na kownoekondre e tan kon, bikasi na ala moen gemiddelde foe 127.588 pioniers de 10,5 percent moro foeroe leki 1978. Den ben gi wan bigi jepi dati ini „na ten disi foe na kaba” „moro bigi wroko” ben kan doe en foeroe foe den ben go tapoe na toe-wiki pionierskoro, di ben hori tapoe na heri grontapoe en disi ben de wan blesi gi den en ben bow na activiteit foe den (Dan. 12:4). Foeroe trawan ooktoe e sori belangstelling foe go doe foeroeten-diniwroko leki gewone pioniers. Soso ini augustus wawan 896 Kotoigi ini Amerkankondre en 777 Kotoigi ini Japan ben seni aksi foe na dienst disi. Boen foeroe kondre e verteri ooktoe foe wan hé marki ini na nomroe foe prékiman di e teki prati na a jepi-pionierwroko — doe moro foeroe ini wan ofoe moro moen — en na dienst disi e tan gi den gemeente tranga foe „moro bigi wroko”.
20. (a) Sortoe dekati wi kan kisi foe na dienstbericht foe 1979? (b) Foe datede, fa wi kan handri nanga na libi howpoe foe wi?
20 Ala nanga ala wi kan taki dati na dienstbericht foe na jari 1979 e gi Jehovah kotoigi alape na grontapoe krakti reden foe prisiri. A de gi ala soema sondro foe poeroe wan, dekati foe teki prati so meni leki den kan na „den moro bigi wroko”, aladi ten de ete. A moe gi wi dekati foe „sondro degedege hori fasti na a publiki bekendmaking foe wi howpoe”, sodati nanga jepi foe Jezus, „wi kan tjari alaten gi Gado wan slagti-ofrandi foe prijse, da foe taki na froktoe foe den mofoboeba di e meki na publiki hen nen bekenti” (Hebr. 10:23; 13:15). Ja, meki alaten na „libi howpoe” foe wi de wan troe sani gi wi!