O tranga fanowdoe na tem foe wi de?
„Ala sortoe soema sa habi ogri-ati foe oen foe mi (Jezus) nem ede. Ma na soema di hori doro to na a kaba, hem sa kisi libi”. — Markus 13:13.
1. Sortoe benawtoe Jezus ben taki na fesi gi Gado pipel, en tapoe soema disi kon troe en fa?
LEKI wan foe dem pisi foe hem profeeti-tori foe na „bosroiti foe na seti foe sani”, Jezus ben taki: „Dan dem sa gi oen abra na benawtoe en kiri oen, en ala naatsi sa habi ogri-ati foe oen foe mi nem ede” (Matth. 24:9) Tapoe sortoe wan enkri pipel dem wortoe disi ben kon troe ini disi tem? We, tapoe dem kristen kotoigi foe Jehovah! Foe ala dem kerki groepoe di de, dem de dem enkri wan di tapoe heri grontapoe ben pasa moeilijkheid foe na see foe dem nazi, dem communist, dem sroedati dictatuur en srefi dem sokari democratisch kondre.
2. Fa Jehovah Kotoigi ben moe si na stree-aksi na ondro dem ai ini Afrika? (Ps. 37:39)
2 Winsi nanga kiri, verkrachting, fon-fon, nanga strafoe-oso, na vaste bribi foe dem Malawi Kotoigi ini dem jari di pasa no ben kisi wawan na respeki nanga froewondroe foe dem kristen brada foe dem, ma ooktoe di foe soema na heri grontapoe di lobi vreede. Aladi na situatie ini Malawi kande kenki pikinso, tra Afrikan kondre e verteri fa vervolgoe e kon moro bigi gi dem.
Ini wan njoen naatsi dem e aksi foe ala borgroe, dati dem weri wan politiek insigne. Ini wan tra kondre wan falsi „brada” ben tori na gemeente tapoe na neti foe na Memre-fesa, sodati skowtoe ben kon en lontoe na konmakandra-presi, aladi dem skowtoe foe wan ofoe tra reden ben poti dem prakseri spesroetoe tapoe na bakasee-doro. Di dem kon jere dati sani ben de so, dem kotoigi ben kon si dati na fesisee-doro no ben habi skowtoe di e hori wakti, sodati alamala ben kan lon gwe en ben kan gwe ini na neti, boiti toe foe dem. Dem toe kristen disi, dem ben naki nanga ogri-ati, ma na bribi foe dem ben de vaste en wan toemsi moi moi kotoigi dem ben gi na fesi foe na kroetoe.
Ini wan tra kondre dem ben naki loyaal kotoigi en poeroe dem ini dem dorpoe, bikasi dem ben weegri foe bari wan kondre wortoe. Nanga spotoe dem ben taki gi son wan foe dem: „Oen kan go alape, srefi na a Jehovah foe oen”. A de kon moro moeilijk foe waka foe na wan presi go na a trawan, en dem opzieners di e waka foe na wan gemeente go na a trawan dem ben kisi. Tokoe mankeri no de ini jeje „njanjan” ini dem strafoe-kampoe. Dem kotoigi disi di dem poti ini benawtoe ben e loekoe srefi foe njan boen foe na „Victori bribi”-congres.
Wan tra Afrikan kondre e verteri dati 22 Kotoigi dem ben kisi, tapoe wan falsi fasi dem taki dati dem teki prati na politiek afersi, dem ben naki dem nanga ogri-ati, poeroe ala krosi na dem skin, boiti dem ondro-broekoe en wan moen langa hori dem ini strafoe-oso ini na soso-skin fasi disi. Ini ete wan tra kondre dem ben naki dri kotoigi kiri en difrenti trawan foe na neutraliteit-afersi kroetoe ben leesi strafoe dati dem moe dede; foe na strafoe disi dem aksi foe go na wan moro hee-kroetoe. Ini wan tra Afrikan kondre wan koptische priester ben kragi Jehovah Kotoigi falsi, dati dem de ini na politiek foe na Midden-Oosten, san meki dem kisi poti na strafoe 13 man nanga 20 oema Kotoigi. Wan foe dem ben de nanga bere en wan trawan ben habi wan pikin oema-pikin nanga hem.
3. Fa Jehovah dienstknegti ben panja dem bribi?
3 Aladi wi sori dja spesroetoe tapoe sani di no langa pasa kaba pasa ini Afrika, ini foeroe tra kondre ooktoe moro druk e poti tapoe Jehovah kotoigi, sodati a kon moro moeilijk foe preeki alatem en hori kristen kongres. Difrenti kondre seni dem zendeling gwe, en a de kon moro moeilijk foe meki zendeling kon ini njoen presi. A de precies soleki Jehovah ben taki nanga mofo foe hem profeeti Jeremia: „Dem sa stree troetroe nanga joe.” En dati dem de doe troe troe toe! Ma aladi bita propaganda nanga vervolgoe de, tokoe Jehovah dienstknegti e tan gi wan grondig kotoigi. Dem e poti troe troe bribi ini na pramisi foe Jehovah: „Dem no sa wini joe, bikasi ’Mi (Jehovah) de nanga joe . . . foe fri joe.’”. — Jer. 1:19.
„SOLEKI DEM DEE FOE NOACH BEN DE”
4. Foe sainde Noach ben kan hori doro? (Jak. 1:2-4)
4 Na famiri-edeman Noach ben libi ini wan toemsi moeiliki tem. Hem spesroetoe wroko foe sreka hemsrefi tapoe na zondoe-vroedoe, kande ben teki 60 jari — ongeveer net so langa leki na preeki foe wi foe Gado koonoekondre di opo ini disi tem. Aladi „na grontapoe ben pori ini na ai foe na troe Gado . . . en ben foeroe nanga ogridoe”, tog Noach ben kan hori doro, foedi hem bribi ben go makandra nanga wroko. Soleki Jehovah Kotoigi ini disi tem, a ben tan nanga faja leki „wan preekiman foe retidoe” foe doe diniwroko. — Gen. 6:11; 2 Petr. 2:5.
5, 6. (a) Sortoe akroederi de mindri na tem foe Noach nanga wi tem? (b) Sortoe sani moe teki na tem foe kristen soema en foe sainde?
5 Na moro bigi pisi foe dem soema ini na tem dati, ben de soleki na grontapoe foe libisoema ini disi tem. „Dem no ben poti prakseri na tapoe, te leki na vroedoe ben kon en figi dem alamala poeroe.” Lukas e taki foe dem wortoe disi foe Jezus tapoe na fasi disi:
„Dem ben njan, dem ben dringi, mansoema ben trow, dem ben gi oemasma foe trow, te leki na dee di Noach ben go ini na ark en na vroedoe ben kon en pori dem alamala.”
Now na beslissende „bigi benawtoe” di o kon na heri grontapoe de e wakti wan ogri grontapoe di habi na srefi fasi! — Matt. 24:21, 37-39; Luk. 17:26, 27.
6 Dem wortoe di wi skrifi dja foe Jezus na tapoesee, wani taki, dati kristen soema ini disi laatste dee no e doe boen te dem njan, dringi en trow? Nono, a no dati Jezus ben taki. A de wan joisti sani foe prisiri nanga boen njanjan en no dringi pasa marki. Ooktoe na trow libi de wan seti foe Jehovah gi libisoema. Ma Jezus ben taki dati wi no moe si dem sani disi leki dem moro prenspari sani foe na libi en no moe meki dem teki wi tem so foeroe, dati jeje afersi e poti na wan see (1 Petr. 4:3; 1 Kor. 7:8, 29). Wi moe seti wi libi so, dati na a fosi presi tem e poti gi na prenspari „preeki foe na boen njoensoe foe na koonoekondre di opo”, soleki disi ben sa pasa bifo na kaba „leki wan kotoigi”. — Matt. 24:14.
„SOLEKI A BEN PASA INI DEM DEE FOE LOT”
7. Sortoe tranga fanowdoe situatie ben doe kon ini dem dee foe Lot?
7 Di Abraham nanga Lot ben doe diniwroko tapoe grontapoe leki kotoigi foe Gado, Jehovah ben warskow dem foe na kroetoe di a ben sa tjari kon tapoe Sodom nanga Gomorra. Joe no ben kan feni srefi 10 retidoe soema drape! Di Jehovah engel ben sreka demsrefi tapoe na pori di ben taki na fesi, Lot ben gi tranga na dem man di ben sa trow nanga hem oemapikin, someni tron nanga dem wortoe: „Opo! Komoto foe na presi disi, bikasi Jehovah o pori na foto!” Ma soleki dem soema foe na immoreel grontapoe foe wi tem, dem oemapikin-man foe Lot ben poti dem gado warskow na wan see en dem ben si hem leki wan spotoe sani soso. Ma tem no ben de foe lasi. „Dem engel ben gi tranga na Lot, en dem ben taki: ’Opo! Teki joe oema nanga joe toe oemapikin, di de dja, foe dem no moe figi poeroe ini na sondoe foe na foto!” — Gen. 19:14, 15.
8. (a) Sortoe „sondoe” ben tjari pori kon tapoe Sodom nanga Gomorra? (b) Foe sainde disi moe de leki van warskow gi wi ini disi tem?
8 San ben de „na sondoe” dati? A ben de bigi hoeroedoe, di de so wan prenspari pisi foe na libi foe foeroe foto foe na grontapoe foe na tem foe wi en srefi tapoe toneel nanga filmdoekoe de sori leki boen sani. „Sodom nanga Gomorra nanga dem foto di didon lontoe ben doe . . . bigi hoeroedoe en dem ben waka baka skin . . . tapoe wan fasi di no fiti.” En sondro foe prakseri Gado retidoe „dem ben njan, dem ben dringi, dem bai sani, dem ben seri sani, dem ben prani en dem ben bow”. Dem eegi gridi fasi foe libi ben teki dem abra. En san ben miti dem? „Wan alen foe faja nanga swarfoe ben komoto foe hemel en a ben pori dem alamala.” Jezus ben warskow, dati wan srefi kroetoe a sa tjari kon te djonsro a sa kon na krin leki „Soemapikin”. — Gen. 19:24-26; Luk. 17:28-30; Judas 7.
9. Sortoe tranga fanowdoe fasi foe libi ai aksi now foe wi, en fa wi kan kisi kibri?
9 Meki wi de leki na retidoe man Lot foe meki bekenti Jehovah kroetoe-boskopoe foe wi tem leki wan tranga fanowdoe afersi. En meki wi no de leki na wefi foe Lot, ma kibri wisrefi moro foeroe foe drai loekoe baka nanga na lostoe foe dem winimarki foe goedoe foe na grontapoe disi di sa pori (Luk. 17:31, 32). Te wi meki na doe foe na wani foe Gado teki wi abra krin krin, disi sa de leki wan kibri gi wi. Hori na prakseri dati Petrus ben taki foe na fri foe Lot: „Jehovah sabi foe fri soema di frede Gado nanga dem heri ati poeroe dem foe tesi, ma foe kibri onregvaardiki soema gi na dee foe na kroetoe foe koti dem poeroe.” — 2 Petr. 2:6-9.
GI WAN „GRONDIG KOTOIGI”
10. (a) Sortoe tranga fanowdoe situatie ben de di Jezus nanga hem apostel ben de na grontapoe? (b) Fa en nanga sortoe prakseri Jezus ben leri hem discipel?
10 Di Jezus nanga hem apostel ben de na grontapoe, a ben de tranga fanowdoe, dati ini na pisi tem dati foe kroetoe wan grondig kotoigi ben gi. Tapoe na wroko disi, Jezus srefi ben gi na eksempel foe go „foto foe foto nanga dorpoe foe dorpoe, aladi a ben preeki na boen njoensoe foe na koonoekondre foe Gado”. Dem twarfoe apostel nanga trawan, pe ben de na ini oemasma, ben waka go nanga hem. Foe sainde? Foe a ben kan gi dem leri foe bow dem libi lontoe na diniwroko foe Gado. Na so fasi dem ben sa habi ooktoe wan prati foe meki soema jere na warskow foe na pori foe na djoe seti foe sani di ben kon en foe troostoe dem soema di dem ben kwinsi. Moro fara dem ben sa kisi jepi foe weri kristen eegi-fasi en sori dem srefi retidoe, loyaal eegi-fasi, di dem ben si na dem Meester. — Matt. 9:35-10:15; Luk. 8:1, 2; 9:1-6; 10:1, 13-15; Ef. 4:24.
11. Fa dem discipel ben sori dati dem ben leri dem les boen?
11 Dem fositem discipel dati ben leri dem les boen. Nanga dem heri ati dem ben gi dem srefi foe doe faja faja kownoekondre-diniwroko, aladi nanga foeroe sari-ati dem ben go na mindri dem soema, pe dem disi ben de toe — tapoe dem wowojo nanga tra publiki presi, ini dem djoekerki (leki fa a ben de nanga na gwenti foe na tem dati) en na dem oso. Srefi di dem ben panja leki wan bakapisi foe vervolgoe, dem ben go gewoon doro foe „meki na boen njoensoe foe na wortoe bekenti”. — Tori foe dem Apostel 5:42; 8:4; 16:13; 17:17.
12. Sortoe kotoigi ben gi ini dem dee foe dem apostel en nanga sortoe bakapisi?
12 Na a kaba foe foeroe langa jari foe faja preeki, Paulus ben kan taki gi hem kompe-owroeman: „Mi no ben hori misrefi na baka foe verteri joe ala sani di ben boen en foe leri joe ini publiki nanga oso-foe-oso. Ma mi ben gi na djoe en na Griki grondig kotoigi tapoe na tori foe berouw na Gado nanga bribi ini wi Masra Jezus” (Tori foe dem Apostel 20:20, 21). Na wortoe „grondig” e kon someni tron ini na tori foe na tranga fanowdoe kotoigi di dem apostel nanga dem kompe-wrokoman ben gi (Tori foe dem Apostel 2:40; 8:25; 10:42; 20:24; 23:11; 28:23). San na „grondig” kotoigi ben tjari kon? Alape pe na boen njoensoe ben preeki gemeente foe bribiman ben kon en dem gemeente disi ben bloei. En te opziener di ben waka lontoe foe visiti dem bribiman disi foe gi dem tranga ini dem diniwroko, dem gemeente ben kon tranga. „Alatem dem ben kon vaste ini bribi en dee na dee dem ben kon moro bigi”. — Tori foe dem Apostel 15:36-16:5.
13. Sortoe kroetoe Jehovah ben tjari ini na fosi eeuw, ma foe sainde na kristen gemeente ben tan?
13 Leki wan kon troe foe na warskow, di Jezus nanga hem discipel ben gi, di na reti tem ben doro Jehovah ben tjari na kroetoe kon tapoe na „kron geslacht” foe djoe, na geslacht di ben kiri „Na Moro Prenspari, Wrokoman foe Libi”, Masra Jezus Kristus (Tori foe dem Apostel 2:40; 3:15). Ma fa a ben go nanga na kristen gemeente — na groepoe dati, di ben hori demsrefi faja faja foe jere na komando foe na Meester foe dem foe „preeki na boen njoensoe disi foe na kownoekondre tapoe heri grontapoe leki wan kotoigi”? Di na kaba ben kon troe troe, dan na faja bribi foe dem ben wani taki redding gi dem. Na hori-doro foe dem ben kisi pai. — Matt. 24:13-16.
PE WI DE INI DEM SANI DI E PASA?
14. O fara, te wi agersi hem nanga fositem, na „boen njoensoe” ben preeki en nanga sortoe boen bakapisi?
14 Agen, tapoe na heemarki foe dem tem, na „boen njoensoe . . . ben preeki . . . ini heri na schepping di de ondro hemel” (Kol. 1:23). Ma ini na tem disi na gron, pe wi moe preeki, de na heri „grontapoe pe soema e libi”, pe de na ini na kondre foe na „kownoe foe Noordsee” nanga na „kownoe foe Zuidsee”, nanga foeroe tra kondre ini Afrika, Noord- nanga Zuid- America, Azië, Australië nanga dem eilanti ini dem grontapoe-se. Dati ini so wan sjatoe tem foe ongeveer 60 jari so wan kotoigi na heri grontapoe ben kan gi, soso wi kan taki tangi na a geest foe Jehovah. En ete njoenwan e tan kon ini Jehovah organisaatsi! Na gebied de moro bigi leki ini na tem foe dem apostel, di moro pikinso leki 40 jari ben de fanowdoe foe gi na laatste warskow na a djoe pipel di ben panja alape.
15. Foe sainde dem ben hori dem „fo winti” foe Openbaring 7?
15 Pe wi de now ini dem sani di e pasa? Openbaring 7 e verteri wi disi. Djaso na apostel Johannes „ben si na dem fo oekoe foe grontapoe fo engel tanapoe, di ben hori dem fo winti foe grontapoe steefi”. Disi de winti foe pori sani, bikasi te na a reti tem, dem sa „doe ogri na grontapoe nanga na se en dem bon”. Ma fosi dem srafoe foe wi Gado moe kisi wan zegelmarki ini dem fesi-ede. Ini na tem dati ini 1914, di „na kownoekondre foe grontapoe ben tron na kownoekondre foe wi Masra (Jehovah) en foe hem Kristus”, dem srafoe disi ben wani dati na kaba ben sa kan kon, sodati dem ben sa tjari kon makandra ini hemel na dem Masra. Ma nono — Jehovah ben habi dja na grontapoe ete wan wroko gi dem foe doe. Demsrefi ooktoe ben moe kon krin en dem ben moe sreka foe na priester wroko, di dem ben sa doe ini na doesoen jari kownoekondre di e kon. Foe datede dem ben tapoe dem „fo winti foe na grontapoe” foe no kon wan pisi tem. — Openb. 7:1-4; 11:15.
16. Sortoe tra groepoe ben kisi wini dati dem engel „ben hori dem winti steefi” en sortoe hoopoe dem habi?
16 Ini hem bigi sari-ati nanga lobi boenfasi Jehovah ben gebroiki dem „srafoe” disi foe hem jeje Israël, „na Israël foe Gado” foe doe wan bigi wroko foe na boen foe wan tra groepoe — wan „bigi ipi . . . di komoto foe ala naatsi nanga lo nanga pipel nanga tongo”. Baka te ala 144000 memre foe na jeje Israël ben teki dem diniwroko foe doe ini hemel, dan na kownoekondre „foe wi Masra en foe hem Kristus” moe tan rigeri dja tapoe na libisoema-famiri na grontapoe. We, foe sensi na mindri foe dem jari dritenti na „bigi ipi” disi ben kon na fesi, sodati now moro leki toe miljoen soema habi na grani foe alatem doe diniwroko leki grontapoe borgroe foe na Kownoekondre. Dem de na koko foe na „njoen grontapoe”, wan retidoe libisoema maatschappij, di ondro na soevereiniteit foe Jehovah Gado sa tan libi foe teego (Openb. 7:9, 10; 21:1, 3-5; 2 Petr. 3:13). Dem engel de hori te now ete dem „fo winti foe na grontapoe steefi”. Foe sainde?
17. Foe sainde dem engel e „tan hori dem winti steefi”?
17 Na wan enkri reden moesoe de, dati Jehovah habi moro wroko foe doe ete gi hem kotoigi dja na grontapoe. Moro memre foe na „bigi ipi” moe tjari kon na wan ete. Dati na wroko foe tjari kon wan makandra no kaba ete, e kon na krin te joe loekoe dati miljoen miljoen soema ben de na a hori foe na Avondmaal, en ooktoe ini na kon moro nanga moro foeroe foe Kotoigi ini foeroe kondre foe Azië, eilanti ini dem grontapoe-se en Katholiek kondre foe Europa. A de toemsi prenspari dati wi alamala foe Jehovah pipel tan gi dem srefi faja faja tapoe na diniwroko te na a kaba. — Mark. 13:10; Ef. 5:15, 16.
18. (a) Sortoe soifri foe sani gersi foe de now? (b) Foe sainde wi moe poti joisti prakseri tapoe Paulus rai ini 2 Korinte 13:5?
18 En net soleki ini na decennium baka 1914 wan bigi soifri ben kon ondro na fika-pisi, a gersi dati now wan soifri foe sani de na mindri son wan di taki dati dem de foe na „bigi ipi”. Spesroetoe gi wi alamala ini disi moeiliki tem dem wortoe foe na apostel Paulus de troe: „Tan tesi efoe joe de na ini bribi, tan sori dati dem feni joe boen” (2 Kor. 13:5). Wi habi troe troe waarderi foe na gi di wi gi wi srefi abra na Jehovah — na krosbee matifasi di wi tanapoe nanga hem en di kan nanga jepi foe na slagti-ofrandi foe Jezus? Wi habi waarderi foe na wanfasi foe wi nanga na Tata en na Pikin ini na moro bigi wroko di wi kan habi wan prati na ini ini disi tem? Wi de doe wi diniwroko troe troe nanga lobi gi Jehovah en gi wi naaste? Ofoe wi e doe hem soso foe wi no lasi wi libi ini na feti foe Har-mágeddon? Efoe wi de foe na „bigi ipi”, wi sa tan dini Gado krin krin pasa na „bigi benawtoe”? Ofoe wi sa meki na tan na ai foe wi kon slap en gi pasi dati Satan masra wi nanga jepi foe prisiri, hoeroedoe ofoe dem sorgoe foe na libi?
19. (a) Foe sainde wi kan prisiri dati dem engel te leki now „ben hori dem winti steefi”? (b) Soleki 2 Korinte 13:11 e sori, fa wi kan tan go na fesi nanga na organisaatsi foe Gado ini disi tem?
19 Dem fo engel no sa tan hori dem fo winti foe na grontapoe. Wi kan prisiri, dati te now ete dem ben doe dati, foedi disi tjari na redding foe miljoen miljoen soema foe na libisoema-famiri. Na tem e kon esi na wan kaba. Wi moe de nanga ai en tan nanga ai en go alatem na fesi nanga na organisaatsi foe Gado na grontapoe. Fa a de gi wi wan bigi prisiri foe kan de wan pisi foe na wan enkri brada-fasi na heri grontapoe di ini na moeiliki tem disi habi vreede en di e prijse Jehovah nem ini wanfasi! Foe wi kan tan go na fesi, wawan tron wi moe sa kan kenki kande wi eegi fasi ofoe eegi fasi fa wi de si sani. Ma meki wi de klari alatem foe doe disi nanga sakafasi foe wi kan doe diniwroko nanga wan firi i a de tranga fanowdoe en hori na prisiri di wi habi nanga na heri pipel foe Gado. A de soleki Paulus ben gi rai: „Te foe kaba, brada, go na fesi foe prisiri, foe kon boen, foe troostoe, prakseri gelijk, libi ini vreede; en na Gado foe lobi en foe vreede sa de nanga joe.” — 2 Kor. 13:11.