Aksi boksoe

◼ San moesoe doe te wan rampoe pasa di abi troetroe takroe bakapisi gi den brada foe wi?

Efoe wan rampoe pasa na ini joe birti: No broeja. Tan rustig èn poti prakseri na tapoe san de troetroe prenspari​—libi, èn no den sani di joe abi. Sorgoe gi den sani di joe osofamiri abi fanowdoe na tapoe a momenti dati. Baka dati, go piki den owroeman foe a situwâsi foe joe èn pe joe de tapoe a momenti dati.

Den owroeman nanga den dinari na ini a diniwroko e plèi wan toemoesi prenspari ròl na ini a jepi di de fanowdoe. Efoe warskow ben gi na fesi foe a rampoe, soleki nanga wan toe bigi storm, dan den brada disi moesoe sorgoe taki ibri sma de na wan kibripresi èn efoe ten libi, den moesoe soekoe foe kisi èn prati den sani di kan de fanowdoe.

Baka dati, den boekoestudie leider moesoe soekoe ibri osofamiri èn aksi den efoe den e meki en boen. A fesiman opziener noso wan tra owroeman moesoe jere foe a situwâsi foe ibri osofamiri, srefi efoe ala sma e meki en boen. Efoe wan sma kisi mankeri, dan den owroeman o proeberi foe seti sani so taki a kan kisi datra jepi. Den sa sorgoe toe gi sani na materia sei, soleki njanjan, krosi, sribipresi, noso tra sani di wan osofamiri abi fanowdoe (Joh. 13:35; Gal. 6:10). Den owroeman foe a gemeente sa gi jepi na jeje sei èn emotioneel sei na a gemeente èn sa sreka sani so esi leki a kan foe bigin baka nanga den gemeente konmakandra. Baka te den loekoe a sani finifini, dan wan owroeman moesoe meki kontakti nanga a kring-opziener, nanga a primisi foe a skin foe owroeman, foe gi en verslag foe iniwan mankeri, sani di broko na a Kownoekondre zaal, noso sani di broko na den oso foe brada, èn so srefi foe sani di den abi spesroetoe fanowdoe. A kring-opziener sa bèl a bijkantoro foe gi wan verslag foe a situwâsi. A bijkantoro sa orga den bigi jepi di de fanowdoe foe gi foeroe jepi.

Efoe wan rampoe pasa na wan tra presi: Prakseri den brada nanga sisa na ini wan rampoe gebied na ini joe begi (2 Kor. 1:8-11). Efoe joe wani gi jepi na moni sei, dan joe kan seni joe bijdrage go na a Genootschap pe wan fonds de gi a reide dati. Na adres na: Garnizoenspad 239, Distrikt Wanica (Tori. 2:44, 45; 1 Kor. 16:1-3; 2 Kor. 9:5-7; loekoe De Wachttoren foe 1 december 1985 bladzijde 20-22). No seni materiaal noso sani di sma abi fanowdoe go na a presi pe a rampoe de te den brada di de frantiwortoe no aksi spesroetoe gi dati. Disi sa sorgoe taki tapoe wan ordefasi jepi sa gi èn taki sani sa prati tapoe wan joisti fasi (1 Kor. 14:40). Grantangi, no bèl go na a Genootschap efoe dati no de fanowdoe, foe di disi kan tapoe a lin, di de fanowdoe foe behandel den telefon foe sma di e bèl foe a presi pe a rampoe de.

Baka te a Genootschap loekoe san pasa troetroe, dan den o bepaal efoe den moesoe opo wan jepi-komte. Den sa piki den brada di de frantiwortoe gi dati. Ala sma moesoe wroko makandra nanga den owroeman di e teki fesi so taki den e sorgoe na wan joisti fasi gi ala den sani di den brada abi tranga fanowdoe.​—Loekoe Jehovah’s Getuigen​—Verkondigers van Gods Koninkrijk, bladzijde 310-315.