Fa yu kan yepi baka te wan rampu pasa

Dei fu dei rampu e kon tron wan aladei sani ini a ten di wi e libi now. A bun fu sreka sani bun na fesi so taki wi kan yepi te wan rampu pasa. Fu dati ede a Tiri Skin sorgu taki ala bijkantoro abi wan kantoro di e seti sani fu yepi te wan rampu pasa.

Te den brada fu na afdeling dati yere taki wan rampu pasa, dan wantewante den e bel den owruman di de na a presi pe a rampu pasa, fu kon sabi sortu yepi den preikiman abi fanowdu. Efu a situwâsi ogri so te taki den brada nanga sisa drape no man yepi makandra, dan den brada fu a bijkantoro o poti brada fu teki fesi èn fu go yepi den brada nanga sisa drape. A kan taki den brada disi o aksi friwani wrokoman fu go yepi noso aksi fu gi son sani di den brada nanga sisa o abi fanowdu. Den kan bai den sani disi tu èn prati den gi den wan di abi yepi fanowdu.

A e tyari furu winimarki te wi e du sani na a fasi disi. Te brada nanga sisa e suku fu yepi sondro taki den kisi primisi fu dati, dan dati kan tyari bruya kon èn wi kan pori furu sani noso du dobru wroko.

Den brada di a bijkantoro poti kan bosroiti omeni moni nanga friwani wrokoman de fanowdu fu go yepi na a presi pe a rampu pasa. Den kan taki sosrefi nanga den lantiman fu a presi èn dati kan yepi wi fu du wi wroko na wan moro bun fasi. Fu dati ede brada nanga sisa no musu piki moni, seni sani go na a presi pe a rampu pasa èn den no musu go drape fu go yepi sondro taki bijkantoro aksi den fu du dati.

Ma toku wi wani yepi te wan rampu pasa (Heb 13:16). Wi lobi den brada nanga sisa fu wi. San wi kan du? A moro prenspari sani, na taki wi kan begi gi den wan di de na ini a nowtu disi èn gi den wan di e go fu yepi den. Wi kan gi bijdrage tu fu horibaka gi a wroko di e du na heri grontapu. Den brada fu a Tiri Skin seti sani so taki, den brada na den bijkantoro sabi pe fu grontapu den kan yepi brada nanga sisa moro bun nanga den bijdrage disi. Ma efu wisrefi wani go drape fu yepi, dan wi kan sori taki wi de klariklari fu go fu di wi o ful a DC-50 formulier.

LUKU A FELEM WAN BIGI FRUDU DI PORI FURU SANI NA INI BRASYONKONDRE. BAKA DATI PIKI NA AKSI DISI:

San naki yu ati di yu si fa den Yehovah Kotoigi go yepi den brada nanga sisa baka di wan bigi frudu feni presi na ini Brasyonkondre ini 2020?