Fa wi kan gi yepi?
1 Nofo tron te Yehovah Kotoigi yere taki wan rampu pasa na wan presi na grontapu, dan den e aksi: „Fa wi kan gi yepi?” Soleki fa Tori fu den Apostel 11:27-30 e sori, dan Kresten na ini a fosi yarihondro ben yepi den brada nanga sisa di ben e tan na ini Yudea, fu di wan angriten ben de drape.
2 Na ini a ten disi, na organisâsi fu wi gi primisi taki den brada gebroiki moni fu yepi sma di de na nowtu, èn fu horibaka gi den sma di e pina fu di ala sortu rampu noso nowtu miti den.
3 Fu eksempre, na ini a yari di pasa, furu brada nanga sisa gi moni fu yepi sma di ben kisi fu du nanga a tsunami-rampu na a zuidsei fu Asia. Fu di someni sma ben de klariklari fu seni moni gi na organisâsi fu yepi den trawan di ben de na nowtu, meki a ben de krin fu si taki den ben e firi gi den trawan, èn wi e warderi dati trutru. Ma te sma e seni moni gi wan spesrutu rampu, dan na ini son kondre den wet e taki dati a moni dati musu gebroiki soso gi a rampu dati, èn a musu gebroiki na ini wan spesrutu pisi ten nomo. A moni no mag gebroiki gi tra sani, awansi moni tan abra, baka di den brada di de na nowtu kisi ala yepi di den ben abi fanowdu.
4 Fu dati ede, a moro bun fu no seni moni spesrutu fu yepi trawan di de na nowtu, ma fu seni en fu horibaka gi a wroko di e du na heri grontapu. A moni disi no de fu yepi Kresten brada nanga sisa na yeye fasi nomo, ma a de sosrefi fu yepi sma di de na ini nowtu. Ma efu wan sma wani seni moni fu yepi sma di de na nowtu, èn a wani seni en aparti fu a moni di a e seni go gi a wroko di e du na heri grontapu, dan a kan du dati fu di wi sa gebroiki dati fu yepi sma di de na nowtu awansi pe den de. Toku, a ben o moro bun gi wi efu sma seni moni sondro taki den skrifi spesrutu gi sortu sani wi musu gebroiki en.
5 A reide fu san ede wi wani taki sma seni a moni, spesrutu fu horibaka gi a wroko di e du na heri grontapu, na taki disi e meki taki moro moni de fu horibaka gi ala Kownukondre wroko di e du, na presi taki a moni e tan soso fu yepi sma di kan kon na ini nowtu na ini a ten di e kon. Disi e kruderi nanga san skrifi na Efeisesma 4:16, taki wi e wroko makandra fu gi san de fanowdu, so taki ’a heri skin kan gro kon tranga fu di a abi lobi’.