Aksi di opo kon
◼ San na a moro bun fasi fu gi moni noso tra sani leki bijdrage, na pôti brada nanga sisa di abi dati fanowdu na ini tra kondre?
Ten na ten, wi e yere taki den brada na ini wan tra kondre kon de na ini nowtu fu di sma e frufolgu den, fu di wan rampu pasa, noso fu di den kon de na ini wan tra muilek situwâsi. Son brada seni moni noso tra sani go langalanga na den bijkantoro na ini den sortu kondre dati èn den e aksi fu gebroiki a moni dati gi wan spesrutu sma di abi yepi fanowdu, gi wan spesrutu gemeente, noso gi wan spesrutu bow-wroko.—2 Kor. 8:1-4.
A de fu prèise taki brada nanga sisa e broko den ede na so wan lobi-ati fasi nanga den kompe bribiman. Ma toku a de so furu tron taki tra moro prenspari sani de fanowdu leki san a sma ben abi na prakseri di a gi a bijdrage. Son leisi te wan sma gi wan bijdrage fu horibaka gi wan spesrutu sani, dan a kan de so taki den brada ben sorgu gi a sani dati kaba. A no de fu taki, dati wi de seiker taki a bijdrage di wan sma e seni go na a bijkantoro fu horibaka gi a wroko di e du na heri grontapu, noso a bijdrage gi a Kownukondre zaal fonsu, noso gi brada nanga sisa di abi yepi fanowdu na presi pe wan rampu pasa, sa gebroiki soleki fa a sma wani dati.
Den brada na ala bijkantoro kisi bun leri fa den kan du sani esi-esi fu yepi den brada nanga sisa di kon de na ini nowtu sondro taki den ben fruwakti dati. Awansi san e pasa, a bijkantoro e tan fruteri a Tiri Skin fa a tori dati e waka. Efu a bijkantoro abi moro yepi fanowdu, dan a Tiri Skin kan aksi tra krosibei bijkantoro fu yepi, noso na edekantoro srefi kan seni sani go langalanga fu yepi den brada.—2 Kor. 8:14, 15.
Fu dati ede, ala den bijdrage di sma e gi fu horibaka gi a wroko di e du na heri grontapu, den bijdrage gi den bow-wroko di e du na ini tra kondre, noso den bijdrage fu yepi den brada na presi pe wan rampu pasa, musu seni go na a bijkantoro di de na ini a kondre pe yu e libi. Yu kan gi a bijdrage sosrefi na ini a gemeente, noso yu kan seni en go langalanga na a bijkantoro na ini a kondre fu yu. Na so, sani kan waka na wan fasi di fiti, fu di „a getrow èn koni srafu” kan gebroiki den seti di a Tiri Skin poti na ini na organisâsi fu sorgu gi den sani di den brada nanga sisa na heri grontapu abi fanowdu.—Mat. 24:45-47; 1 Kor. 14:33, 40.