San wan bijkantoro e du?

Den memre fu den Betelfamiri e wroko na difrenti afdeling. Den afdeling disi e sorgu gi sani di de fanowdu fu du a preikiwroko na ini wán noso moro kondre. Den memre e du vertaalwroko, den e druk tijdschrift nanga buku, den e wroko na a afdeling di e seni buku gi den gemeente, den e meki CD nanga video, noso den e sorgu gi tra sani di de fanowdu na ini a kondre di den e luku.

Wan Bijkantoro Komte e luku fa a wroko e go. A Tiri Skin gi a frantwortu na wan Bijkantoro Komte fu luku a wroko na wan bijkantoro. Na ini wan Bijkantoro Komte yu abi dri noso moro lepi owruman di abi ondrofeni. A komte e fruteri a Tiri Skin fa a wroko e go na ini a kondre di a bijkantoro e luku. Den e fruteri a Tiri Skin tu efu problema de. Den sani disi e yepi a Tiri Skin fu bosroiti fu sortu sani den o taki na ini den buku nanga tijdschrift, na den gemeente konmakandra, èn na den bigi konmakandra. A Tiri Skin e seni brada di e teki presi gi den, go na den bijkantoro. Den brada disi di na edekantoro seni kon, e gi den Bijkantoro Komte rai di e yepi den fu tyari a frantwortu fu den moro bun (Odo 11:14). Na ini wan spesrutu programa, den brada disi e hori wan lezing fu gi deki-ati na den sma di e libi na ini a kondre pe a bijkantoro e luku a wroko.

Den e yepi den gemeente na ini a kondre. Te wan nyun gemeente musu seti, dan den brada na a bijkantoro di abi frantwortu e gi primisi fu du dati. Den e luku sosrefi a wroko fu den pionier, den zendeling nanga den kring-opziener di e dini na ini a kondre di a bijkantoro e luku. Den e orga bigi konmakandra nanga kongres, den e seti sani fu bow nyun Kownukondre zaal, èn den e sorgu taki nofo buku nanga tijdschrift e seni go na den gemeente. Ala den wroko di e du na wan bijkantoro e yepi fu meki a preikiwroko du na wan fasi di orga.​—1 Korentesma 14:33, 40.

• Fa den Bijkantoro Komte e yepi a Tiri Skin?

• Sortu wroko sma e du na wan bijkantoro?