Wan brifi fu a bijkantoro

Lobi Kownukondre preikiman,

Yu sa warderi en fu yere taki a bijkantoro na ini Amerkankondre seni boskopu fu meki unu kon sabi fa dusundusun brada nanga sisa kisi yepi na wan lobi-ati fasi. Den sma disi ben kisi fu du nanga den bigi ogri winti di ben pori difrenti kontren fu Amerkankondre na ini 2005.—Yoh. 13:35.

Wan brada di ben musu froisi fu a presi pe a bigi ogri winti Katrina ben wai, ben taki: „Wi ben abi soso den krosi na wi skin. Den brada nanga sisa no draidrai fu yepi wi. Den ben meki taki wi firi korostu. Den ben wani taki wi tan nanga den.”

Moro leki 8000 brada nanga sisa ben wroko na ondro a tiri fu 60 difrenti Bowkomte. Den ben gi den ten, a koni fu den, moni nanga tra sani fu yepi den sma di ben de na nowtu. Den yepi fu meki 86 Kownukondre zaal nanga 4178 oso kon bun baka. Den musu wroko ete na 5 Kownukondre zaal nanga 722 oso. Trutru wi e warderi a wroko di den du na wan lobi-ati fasi!—1 Tes. 5:18.

No so langa pasa, wan tu liba na ini Sranan ben frudu wan heri kontren na tapusei, èn a watra pori wan tu sani fu den brada nanga sisa fu wi. Den Kotoigi ben de den fosi sma di ben kisi yepi na ini a kontren dati, èn den ben prati sani nanga grontapu sma. Ma a moi fu si taki ala seti di abi fu du nanga na anbegi ben go doro. A preikiwroko nanga den konmakandra ben go doro leki noti no ben pasa. Disi ben meki taki a koranti, Dagblad Suriname, skrifi: „A frudu no tapu Yehovah Kotoigi fu hori den konmakandra.”

Wi e aksi unu fu tan begi gi ala den lobi brada nanga sisa disi, iya, gi den sma di ben abi yepi fanowdu èn sosrefi den sma di e gi yepi.—2 Kor. 1:11.

Un brada,

Bijkantoro fu Sranan