Horibaka gi a Kownukondre wroko na ini yu eigi kondre èn na heri grontapu

NELEKI fa Yesus ben taki na ini wan profeititori fu den lasti dei, dan Yehovah Kotoigi preiki a bun nyunsu „te na den moro farawe presi fu grontapu” (Tori 1:8; Mat. 24:14). Fu man du disi den gebroiki furu fu den ten nanga krakti fu fruteri tra sma den boskopu fu Gado. Fu di den abi a frutrow taki Yehovah o sorgu gi den wrokoman fu en, meki den e tan poti Gado Kownukondre na a fosi presi na ini den libi (Mat. 6:25-34; 1 Kor. 3:5-9). Den bun bakapisi di den abi e sori krin taki Yehovah feni den bun èn taki a e blesi den.

SORGU GI A KOWNUKONDRE WROKO NA HERI GRONTAPU

² Te wi e prati Bijbel nanga buku di e taki fu Bijbel, sondro fu aksi moni, dan son sma e aksi densrefi: „Pe den e feni a moni fu du a wroko dati?” A tru taki furu moni de fanowdu fu meki den buku disi èn fu meki Bijbel. Wi abi moni fanowdu tu fu bow Betel-oso èn fu sorgu gi den, fu di na drape den sma e tan di e yepi meki den buku fu wi, di e luku taki a preikiwroko waka bun, èn di e du difrenti tra wroko di de fanowdu fu panya a bun nyunsu go moro fara. Boiti dati, kring-opziener, zendeling, spesrutu pionier, nanga trawan di e du a spesrutu furuten diniwroko e kisi pikinso moni tu, so taki den kan du a wroko fu den go doro. A de krin taki na ini a ten disi furu moni de fanowdu fu prati a bun nyunsu na ini wi eigi kondre èn na tra presi na grontapu. Ma pe a moni dati e komoto?

³ Furu sma di e warderi en taki Yehovah Kotoigi e gi Bijbel leri, de klariklari fu gi wan bijdrage fu horibaka gi a wroko disi di e du na heri grontapu. Ma toku na den Kotoigi srefi e horibaka gi a wroko moro furu. Sonwan e seni bijdrage go na a bijkantoro fu Yehovah Kotoigi na ini a kondre fu den. Den e tyari densrefi neleki den futuboi fu Gado na ini owruten di ben de klariklari fu gi bun furu sani fu yepi bow a presi pe sma ben kan go fu anbegi Yehovah (Eks. 35:20-29; 1 Kron. 29:9). Son brada nanga sisa e skrifi tapu papira taki baka te den dede na organisâsi musu kisi na oso, a gron, noso a moni fu den. Na a tra sei, tra brada nanga sisa, gemeente, nanga den difrenti kring e gi moni tu. Te wi moksi ala den bijdrage disi kon na wán, dan den nofo fu meki a diniwroko go doro.

⁴ Yehovah Kotoigi e si en leki wan grani fu gebroiki a moni nanga den tra gudu fu den fu meki a preikiwroko go na fesi. Yesus nanga den disipel fu en ben abi wan monikisi. Disi e sori taki den ben e kisi moni fu bai sani di den ben abi fanowdu (Yoh. 13:29). Bijbel e fruteri wi taki wan tu umasma ben sorgu gi Yesus nanga den disipel fu en (Mark. 15:40, 41; Luk. 8:3). Na apostel Paulus ben de nanga tangi te a ben e kisi sani fu sma di ben wani taki a bun nyunsu prati na ala sei èn di ben wani horibaka tu gi a diniwroko fu en (Fil. 4:14-16; 1 Tes. 2:9). Neleki fa den Kresten fu fositen ben du, na so Yehovah Kotoigi e tan du a diniwroko fu den fayafaya èn den e gi furu sani fu horibaka gi a wroko dati. Na a fasi dati, reti-ati sma kan kisi „a watra di e gi libi èn di de fu kisi fu soso”, awinsi pe den de.​—Openb. 22:17.

SORGU GI DEN SANI DI YU GEMEENTE ABI FANOWDU

⁵ Den bijdrage di a gemeente e kisi e meki taki den brada man pai den kostu fu a gemeente. Den no e piki moni, den no e taigi yu omeni moni yu musu gi ibri mun, èn den no e begi moni tu. Na presi fu dati, boksu de pe ibri sma di e kon na den konmakandra kan poti moni, „soleki fa a bosroiti na ini en ati”.​—2 Kor. 9:7.

⁶ Na a fosi presi a moni di sma e gi, na fu pai gi sani soleki watra nanga stroom èn fu sorgu a Kownukondre zaal. Den owruman fu a gemeente kan bosroiti fu teki pikinso fu a moni dati fu seni en go na a bijkantoro fu Yehovah Kotoigi na ini a kondre, so taki den kan gebroiki en fu horibaka gi a wroko di e du na heri grontapu. Efu den o du dati, dan den owruman musu aksi a gemeente fosi efu den e agri nanga a bosroiti di den teki fu seni a moni dati go na a bijkantoro. Na a fasi disi furu gemeente e gi moni doronomo fu horibaka gi a wroko di e du na heri grontapu. Te ala sma e hori na prakseri taki ten na ten sani de fanowdu na ini a gemeente, dan a no o de fanowdu fu memre a gemeente ibri tron baka fu gi bijdrage.

SAN E PASA NANGA DEN BIJDRAGE DI SMA E GI?

⁷ Baka ibri konmakandra, tu brada musu puru ala moni di de na ini den boksu pe sma e poti bijdrage, dan den musu skrifi omeni moni ben de na ini den boksu (2 Kow. 12:9, 10; 2 Kor. 8:20). Den owruman fu a gemeente o seti sani, so taki a moni disi kibri bun teleki den kan seni en go na a bijkantoro noso teleki den gebroiki en fu pai gi sani di a gemeente abi fanowdu. A brada di e sorgu gi den moni afersi fu a gemeente e meki wan raportu ibri mun, so taki den brada nanga sisa sabi fa a de nanga den moni afersi fu a gemeente èn ibri dri mun a fesiman fu den owruman e seti sani fu meki wan tra sma luku efu den moni afersi fu a gemeente du bun.

DEN KOSTU FU DEN KRING

⁸ Ala den kostu di e meki fu hori kring konmakandra nanga tra kostu fu a kring e pai nanga den bijdrage fu den Kotoigi na ini den gemeente fu a kring dati. Na a kongreshal yu abi boksu pe den sma di wani gi moni fu horibaka gi a kring kan poti den bijdrage. Boiti dati, den gemeente kan gi bijdrage na tra okasi tu fu kan pai gi tra kostu.

⁹ A ben o moi srefisrefi efu ibriwan fu den kring e pai den eigi kostu. Efu moni tan abra, dan den kan poti dati gi a wroko di e du na heri grontapu. Son leisi a kan pasa taki a kring no abi nofo moni na bangi fu pai den kostu fu a konmakandra noso fu bigin seti sani gi wan bigi konmakandra di musu kon ete. A kan tu taki a kring musu pai wan moni na fesi fu yuru wan presi fu hori wan konmakandra. Efu dati de so, dan a kring-opziener kan aksi den owruman fu memre a gemeente fu den na a grani di den abi fu gi bijdrage. Den owruman fu den difrenti gemeente o luku a tori èn den o bosroiti o furu moni a gemeente fu den kan gi leki bijdrage gi den kostu fu a kring. Baka dati den o leisi a bosroiti disi gi a gemeente, so taki den preikiman kan taki efu den e agri nanga a bosroiti.

¹⁰ Son leisi den owruman fu wan kring e kon makandra na a dei fu wan kring konmakandra fu taki fu son moni afersi. Efu tra bosroiti musu teki di no abi fu du nanga den kostu di a kring gwenti meki, dan den owruman musu taki efu den e agri nanga a bosroiti dati. Den musu skrifi soifri omeni moni o de fanowdu èn ibri tron te disi o pasa, den owruman fu a kring musu taki efu den e agri nanga dati.

¹¹ Ten na ten a kring-opziener o seti sani fu meki wan tra sma luku efu den moni afersi fu a kring du bun.

SORGU GI DEN PÔTIWAN

¹² Yesus nanga den disipel fu en ben e gebroiki a moni na ini a monikisi di den ben abi fu yepi pôtisma tu (Mark. 14:3-5; Yoh. 13:29). Te now ete Kresten abi a frantwortu dati fu di Yesus ben taki: „Den pôti sma de nanga unu ala ten” (Mark. 14:7). Fa Yehovah Kotoigi e tyari a frantwortu dati na ini a ten disi?

¹³ Son leisi, sma na ini a gemeente di e dini Gado fayafaya kan abi yepi fanowdu fu di den kon owru, fu di den siki, noso fu di den kisi tra problema. Den osofamiri, tra famiriman, nanga trawan di si dati o wani yepi den. Te den e du disi, dan den e du san na apostel Yohanes taki: „Efu wan sma abi nofo gudu èn a e si taki en brada de na nowtu, ma a e weigri fu abi sari-ati gi en, dan fa wi kan taki dati a lobi Gado? Un pikin, wi no musu taki nanga wi mofo nomo taki wi lobi makandra, ma nanga wan krin ati wi musu du sani fu sori taki wi lobi makandra” (1 Yoh. 3:17, 18; 2 Tes. 3:6-12). Na ini a tru anbegi wi e sorgu tu gi den brada nanga sisa fu wi di de na nowtu.​—Yak. 1:27; 2:14-17.

¹⁴ Na ini a fosi brifi di na apostel Paulus ben skrifi gi Timoteyus, a ben fruteri fa wi kan yepi den wan di e frudini dati. Yu kan leisi a rai di a ben gi na ini 1 Timoteyus 5:3-21. Na a fosi presi, ibri Kresten abi a frantwortu fu sorgu gi en eigi osofamiri. Owrusma noso sikisma musu kisi yepi fu den pikin fu den, den granpikin fu den, noso fu tra krosibei famiri. Son leisi a de so taki lanti noso tra organisâsi na ini a kondre seti sani fu yepi den sma disi. Sobun, famiriman noso tra sma kan sorgu taki den kisi a yepi dati. Ma wan situwâsi kan opo kon pe a de fanowdu taki a heri gemeente abi fu suku wan fasi fu yepi so wan brada noso sisa di e dini Gado wan heri pisi ten kaba. Efu a sma no abi wan osofamiri noso tra famiriman di kan yepi en èn efu lanti noso tra organisâsi no abi seti fu yepi den sortu sma disi, dan den owruman fu a gemeente kan luku san de fanowdu fu yepi a brada noso sisa dati. Leki Kresten wi e si en leki wan grani fu prati san wi abi nanga den wan di de na nowtu.

¹⁵ Furu brada nanga sisa fu wi e kisi fu du nanga frufolgu, orloku, gronseki, bigi frudu, angriten, noso tra rampu di e pasa na ini den muilek ten disi (Mat. 24:7-9). Kande den gemeente na ini a kontren no abi noti fu prati nanga makandra. Te dati de so,dan den brada fu a Tiri Skin e seti sani fu meki brada nanga sisa fu tra kontren sorgu gi den sani di de fanowdu. Na a srefi fasi den Kresten fu Pikin Asia ben gi nyanyan na den Kresten fu Yudea di ben miti angriten (1 Kor. 16:1-4; 2 Kor. 9:1-5). Te wi e teki na eksempre fu den, dan wi e sori krin taki wi lobi den brada nanga sisa fu wi èn taki wi na trutru bakaman fu Yesus Krestes.​—Yoh. 13:35.

A FASI FA WI E PRATI DEN BUKU FU WI

¹⁶ Wán prenspari fasi fu panya a Kownukondre boskopu, na fu prati Bijbel nanga buku di e taki fu Bijbel. Nofo tron den owruman fu a gemeente e gi wan dinari ini a diniwroko a frantwortu fu sorgu gi sani soleki den buku, brochure nanga tijdschrift. Den brada di kisi den frantwortu disi e si a wroko fu den leki wan seryusu sani. Den e skrifi soifri sortu buku den abi èn omeni fu den buku dati de ete, so taki ala ten den brada nanga sisa kan kisi den buku nanga tra sani di den abi fanowdu.

¹⁷ Leki Kresten di gi wisrefi abra na Gado, wi sabi taki wi ten, wi frustan, wi krakti, a koni fu wi, den gudu fu wi èn srefi a libi fu wi, na kado di Gado gi wi. A wani taki wi gebroiki den sani disi na ini a diniwroko fu en (Luk. 17:10; 1 Kor. 4:7). Te wi e gebroiki ala den sani disi na wan yoisti fasi, dan wi e sori Yehovah o tranga a lobi fu wi de gi en. Wi wani gi Yehovah grani nanga den warti sani fu wi, fu di wi sabi taki a e breiti nanga iniwan presenti di wi e gi en fu sori taki wi e dini en nanga wi heri ati (Odo 3:9; Mark. 14:3-9; Luk. 21:1-4; Kol. 3:23, 24). Yesus taki: „Unu kisi sondro fu pai, sobun un musu gi sma sondro fu meki den pai” (Mat. 10:8). Te wi e tan wroko gi Yehovah èn wi e gebroiki den gudu fu wi fu du a wroko fu en, dan wi o de moro koloku.​—Tori 20:35.