Ipi-ipi sma moro e kon
1 Soleki fa a ben de na ini a fosi jarihondro, a gro di a kresten gemeente e gro na ini a ten disi de wan toemoesi aparti sani (Tori. 2:41; 4:4). A jari di pasa, 366.579 njoen disipel ben teki dopoe, èn dati na wan gemiddelde foe moro leki 1000 disipel ibri dei! Moro leki wán miljoen ben teki dopoe na ini den lasti dri jari di pasa. Ija, Jehovah tan poti ipi-ipi sma di e bribi.—Tori. 5:14.
2 Den foeroe njoen memre di no abi ondrofeni na ini a kresten libi, abi jepi èn leri fanowdoe foe den wan di de tranga na ini a bribi (Rom. 15:1). Na mindri den fosi kresten wan toe sma ben de di, srefi foeroe jari na baka di den ben teki dopoe, no ben „go moro fara foe kon lepi” (Hebr. 5:12; 6:1). Dati na foe san ede, na ini en brifi gi den Hebrewsma, Paulus ben poti krakti na tapoe sani pe kresten moesoe gro na jejefasi. San na den sani disi, èn fa wi kan gi jepi di de fanowdoe?
3 Kweki boen gwenti foe studeri: Akroederi a bodoi foe Paulus, foe de wan boen studenti wani taki dati wan sma moesoe leri na wan aktief fasi, a moesoe loekoe a lès ibritron baka, èn a moesoe gebroiki a „tranga njanjan” di Jehovah en organisâsi e gi (Hebr. 5:13, 14; loekoe A Waktitoren foe 1 augustus 1993, bladzijde 19-24). Te joe e meki den njoen bribiman abi wan prati toe na ini den takimakandra foe jeje afersi èn te joe e prati den toemoesi moi waarheid nanga den, di joe leri foe di joesrefi ben ondrosoekoe sani, dan joe kan gi den deki-ati foe kweki boen gwenti foe studeri. Kande wawan leisi joe ben kan aksi wan njoen bribisma foe kon toe na joe persoonlijk studie noso na joe osofamiri studie.
4 Fisiti den konmakandra doronomo: A getrow eksempre foe joe èn den moi wortoe di e gi deki-ati, sa jepi njoen memre foe a gemeente foe no doe a tra sani di Paulus ben kari—„a gwenti” di son sma abi foe e misi kresten konmakandra (Hebr. 10:24, 25). Jepi den foe froestan taki den konmakandra na a fasi fa a gemeente e hori den na libi na jejefasi. Joe fosi moesoe doe wan sani foe meki den firi taki wi e prisiri foe abi den leki wan pisi foe wi bradafasi.
5 Go na Jehovah nanga froetrow: Foe man wini den swakifasi di wi abi na skinfasi èn swaki eigifasi, wi moesoe soekoe Jehovah na ini begi èn froeteri en den moro dipi prakseri foe wi èn den moro persoonlijk sorgoe foe wi. Den njoen sma moesoe leri taki te den e begi Jehovah tranga gi jepi, soleki fa Paulus ben gi a tranga foe doe, dan den no moesoe draidrai (Hebr. 4:15, 16; 10:22). Te joe e froeteri den persoonlijk ondrofeni foe joe di joe ben abi foe a tori disi, dan dati sa tranga a froetrow foe wan njoen sma taki Jehovah e arki opregti begi.
6 Meki ten gi a diniwroko: Paulus ben sori toe taki te wi e „tjari wan srakti-ofrandi foe prèise gi Gado ala ten”, dan dati e gi krakti na jejefasi (Hebr. 13:15). Joe kan aksi wan njoen preikiman foe kon nanga joe na den alawiki sani di joe seti gi velddienst? Kande joe nanga en ben kan sreka den pristeri noso joe ben kan loekoe wan fasi foe a diniwroko di a njoen sma no proeberi ete.
7 Den ipi-ipi sma di e kon moro, na wan reide gi foeroe prisiri. A gebroiki di wi e gebroiki wisrefi foe leri èn foe froemane den njoen memre foe a gemeente, sa jepi den foe kweki wan tranga bribi di de fanowdoe foe ’hori den sili foe den na libi’.—Hebr. 3:12, 13; 10:39.