Foe san ede den e doe en?

¹ Foe Krestes, a ben taki na fesi taki ’faja gi na oso foe Gado ben sa njan en krinkrin’ (Ps. 69:9). A faja di Jesus ben abi gi a troe anbegi foe Jehovah ben poesoe en foe poti a diniwroko na tapoe a fosi presi (Luk. 4:43; Joh. 18:37). A srefi faja disi foe gi kotoigi foe a waarheid, de foe si na ini a ten disi na ini a diniwroko foe Jehovah Kotoigi. A dienstjari di pasa, wan gemiddelde foe 645.509 sma na heri grontapoe ben teki prati na wan fasi foe a pionierwroko ibri moen. Te wi e hori na prakseri taki wi gi wisrefi abra na Gado, ibriwan foe wi moesoe ondrosoekoe na ondro begi efoe wi kan seti wi situwâsi na so wan fasi taki wi kan dini leki wan jepi-pionier noso leki wan gewoon pionier.​—Ps. 110:3; Preik. 12:1; Rom. 12:1.

² Foe di wi e libi na ini wan sistema foe sani pe sma e soekoe materia sani gi densrefi nomo, meki foeroe sma na ini grontapoe e feni en moeilek foe froestan foe san ede wan sma ben sa wani foe wroko so tranga na ini a diniwroko gi wan sani di no e tjari no wan wini na moni sei èn di no e gi no wan glori. Foe san ede pionier e doe en? Den sabi taki den e doe wan wroko di e kibri sma libi. Foe di wan dipi lobi gi Jehovah èn gi den kompe foe den e troesoe den, meki den e firi wan tranga persoonlijk froeplekti foe jepi foe kibri den libi foe sma (Rom. 1:14-16; 1 Tim. 2:4; 4:16). Wan pionier trowpaar ben taki en heri boen, di den ben e taki: „Foe san ede wi e pionier? Wi ben sa kan gi Jehovah wan boen froeklari foe san ede wi no ben pionier?”

³ Wan tra sisa ben skrifi disi foe a bosroiti di a ben teki foe bigin pionier: „Mi masra nanga mi ben meki plan foe libi nanga wán salaris nomo, èn dati ben wani taki dati wi ben moesoe libi sondro den sani di no de prenspari. Tokoe Jehovah ben blesi wi foeroe, noiti a ben gowe libi wi foe kon pôti noso taki wi ben abi sani fanowdoe . . . Mi feni wan troetroe reide foe libi​—taki mi kan jepi den sma di abi sani fanowdoe na jejefasi, foe kon leri sabi taki Jehovah, a troe Gado, no de fara foe den sma di e soekoe en.” Foe di den e si a serjoesoefasi foe a ten, meki pionier de tevrede nanga den prenspari sani di den abi fanowdoe foe libi, ala di den e soekoe serjoesoe foe kisi goedoe na jejefasi, di sa tan foe têgo.​—1 Tim. 6:8, 18, 19.

⁴ Efoe joe persoonlijk omstandigheid e gi pasi foe doe dati, dan foe san ede joe no e moksi joesrefi nanga den foeroe hondrohondro doesoen foe joe brada nanga sisa na heri grontapoe di e pionier? Na a fasi dati joe kan ondrofeni a srefi prisiri foe den.