Gi tra sma A sroto gi wan kolokoe osofamiri
1 Na osofamiri na a fondamenti pisi foe a libisma libimakandra, èn difrenti osofamiri e meki dorpoe, foto, distrikt, nanga heri nâsi. Na ini a ten disi, na osofamiri de na ondro druk moro leki oiti na fesi. Sani abi wan tranga krakti na tapoe na osofamiri èn den de wan kefar gi na osofamiri libi troetroe. Wi de tangi srefisrefi taki Jehovah, a Sma di seti na osofamiri, gi wi bodoi so taki wi kan abi kolokoe na ini na osofamiri! Den sma di e gebroiki den tiri foe en e si taki problema de moro mendri èn taki den sa abi wan osofamiri di e waka boen. Na ini a moen september wi abi a grani foe gi tra sma a boekoe A sroto gi wan kolokoe osofamiri. Waka go na sma èn bigin taki foe na osofamiri libi. Abi switifasi, de positief, èn abi koni foe man si sani krin. San joe ben sa kan taki?
2 Joe ben kan bigin foe poti wan aksi soleki:
◼ „Joe si taki foeroe osofamiri e feni taki a moeilek foe horidoro na ondro a druk foe a libi? [Gi okasi foe piki.] Njoensoe e sori taki foeroe sma e ondrofeni problema na ini den oso. San joe e denki taki ben sa kan jepi osofamiri foe de moro tranga èn foe feni moro foeroe kolokoe? [Gi okasi foe piki.] Foe di na Gado ben seti na osofamiri, a no ben sa de reidelek foe ondrosoekoe sortoe tiri a gi? [Leisi 2 Timoteus 3:16, 17.] Den sortoe bodoi disi di e gi winimarki, poti na ini a boekoe disi, A sroto gi wan kolokoe osofamiri.” Aksi na sma dan san a e denki taki de wan algemeen osofamiri problema, èn sori a kapitel di e taki foe a problema dati, èn pristeri a boekoe.
3 Na a gobaka, joe ben sa kan soekoe foe doro a marki foe bigin wan bijbelstudie, te joe e taki:
◼ „Mi prakseri foe den sani di joe ben taki foe na osofamiri libi, èn mi tjari wan sani gi joe di mi denki taki joe sa njan boen foe en. [Sori a San Gado e aksi-brochure, èn go na bladzijde 16 èn leisi den siksi aksi di skrifi na tapoesei.] A de krin taki ibri sma na ini na osofamiri moesoe doe wan sani foe en sei so taki a kan jepi foe meki kolokoe de na ini na osofamiri. Efoe joe abi feifi miniti nomo, mi sa sori joe fa joe kan abi moro foeroe wini foe a bodoi disi.” Bigin dan foe studeri lès 8.
4 Wan tra fasi foe bigin wan takimakandra, na te joe e kari wan problema, foe di joe e taki kande:
◼ „Ala di ibri sma wani firi wan tevrede fasi èn satisfaksi, tokoe a sori taki foeroe osofamiri no man feni disi srefisrefi. San joe denki taki ben sa jepi den foe feni troetroe kolokoe? [Gi okasi foe piki.] Langa ten pasa kaba, bijbel ben tjari kon na krin sortoe problema wi ben sa si na ini den osofamiri na ini a ten disi. [Leisi 2 Timoteus 3:1-3.] Ma bijbel e taigi den osofamiri toe san den moesoe doe foe loesoe den problema disi èn foe feni têgo kolokoe. Den gronprakseri foe en poti na ini a boekoe disi, A sroto gi wan kolokoe osofamiri.” Baka dati, sori a sma na overzicht boksoe na a kaba foe wan kapitel di fiti, leisi en èn pristeri a boekoe.
5 Te joe go baka, gebroiki a „San Gado e aksi”-brochure foe bigin wan studie. Joe ben kan taki:
◼ „Mi ben breiti taki joe ben wani foe ondrosoekoe den bijbel gronprakseri di abi foe doe nanga na osofamiri libi. Ondrofeni sori taki wi kan abi moro boen bakapisi te wi e gebroiki a praktis rai di de foe feni na ini bijbel. Djaso joe abi wan sempel fasi foe froeklari foe san ede dati de so.” Leisi a fosi paragraaf foe lès 1 na ini a San Gado e aksi-brochure, èn so srefi Psalm 1:1-3 noso Jesaja 48:17, 18. Efoe na okasi de, loekoe a tra pisi foe a lès toe. Aksi foe kon baka foe studeri a tra lès nanga en.
6 Meki wi doe ibri moeiti di wi man foe froeteri tra sma a sroto gi wan kolokoe osofamiri—foe di wi e gebroiki den bodoi di poti na ini Gado Wortoe.—Ps. 19:7-10.