„Tan doe disi foe memre mi”
1 Libisma abi a gwenti foe meki prenspari afersi no sori so prenspari moro te foe kaba. Disi na wán reide foe san ede Jesus ben gi a komando na den disipel foe en, di a ben seti „na avondmaal foe Masra”: „Tan doe disi foe memre mi.” Foe sensi a ten dati, dan na tapoe a srefi dei foe Jesus en dede, kresten gi jesi foe tan „meki a dede foe Masra bekènti, te leki a doro”. —1 Kor. 11:20, 23-26.
2 Jesus sa ontfanga den lastiwan foe a fikapisi foe a „pikin ipi” di e kon moro mendri, heri esi now na ini a hemel tanpresi (Luk. 12:32; Joh. 14:2, 3). A jari disi, a fikapisi foe den salfoewan makandra nanga a bigi ipi foe „tra skapoe” di e kon bigi moro nanga moro, sa abi a grani agen foe hori na Avondmaal foe Masra tapoe 11 april (Joh. 10:16; Openb. 7:9, 10). A warderi di wi abi gi a bigi lobi foe Jehovah di ben seni en wan-enkri Manpikin gi a boen foe libisma, sa kon moro bigi. Krakti sa poti tapoe na eksempre foe Jesus, en lobi, en getrowfasi te na dede di a ben gi a loesoe-paiman, èn a tiri di a e tiri now leki Kownoe foe Gado Kownoekondre di seti, ma krakti sa poti so srefi toe tapoe den blesi di a Kownoekondre sa tjari kon gi a libisma famiri. Disi na troetroe wan okasi foe memre!
3 Sreka now: Meki wi alamala doe moeiti foe meki a pisi ten disi foe a Memrefesa wan ten foe bigi prisiri èn tangi, gi wisrefi èn gi ala den wan di sa abi demakandra nanga wi. Wi kan meki a warderi di wi abi gi a dede foe Jesus kisi moro waarde gi wi, foe di wi e leisi den bijbel pisi di e taki foe den lasti dei foe a diniwroko foe Jesus ete wan leisi, èn den sani di pasa bifo a ben dede. Te wi e hori wi osofamiri-studie na ini den wiki bifo a Memrefesa, dan wi ben kan gebroiki na okasi foe loekoe den kapitel 112-116 baka foe a Moro bigi man-boekoe.
4 Omeni sma di joe sabi, kande sa kon na a Memrefesa efoe joe ben sa bigin foe bow a warderi foe den gi na okasi, foe di joe ben sa gi den wan kari, èn foe di joe ben sa meki den firi taki wi troetroe wani den drape? Meki wan lijst now, èn doe san joe man foe jepi den foe kon. Baka dati, jepi den foe go doro foe gro na jejefasi foe di joe e gi den deki-ati foe fisiti den konmakandra doronomo.
5 Na a ten foe a Memrefesa, spesroetoe sani sa seti so taki ibri sma kan doe moro na ini a preikiwroko. Joe denki taki joe man doe a jepi-pionierwroko na ini april èn na ini mei foe di joe e meki wan boen schema? Wán foe den moro boen fasi fa wi kan sori taki wi e memre nanga foeroe warderi ala san na ofrandi foe Jesus wani taki gi wi, na te wi e taki foe wi Gado, Jehovah, èn foe den blesi di a Kownoekondre tiri foe en Manpikin sa tjari kon. — Ps. 79:13; 147:1.