Oen pikin — Oenoe na a fonten foe wi prisiri!
1 Jongoe boi nanga oemapikin, oenoe sabi a komando foe Jehovah taki oenoe abi wan prati toe ini den aktiviteit foe a gemeente? (Deut. 31:12; Ps. 127:3) A de wan prisiri foe abi oenoe na wi sei te wi e dini Jehovah makandra! Te oenoe e sidon pî na den konmakandra èn e arki heri boen, dan dati e waran wi ati. A e prisiri wi spesroetoe te oenoe e proeberi foe gi piki nanga oen eigi wortoe. A heri gemeente e prisiri te oenoe e hori oen toewijzing di oenoe kisi tapoe a theokrasia diniwroko-skoro, te oenoe e wroko fajafaja makandra nanga wi na ini a velddienst, èn te wi e jeri taki oenoe e gi kotoigi sondro foe frede na oen skoromati nanga den skoromeester nanga skoromisi. — Ps. 148:12, 13.
2 Wi wani taki oenoe sabi dati wi e prisiri nanga oenoe te wi e si den boen maniri foe oenoe, a sorgoe di oenoe e sorgoe oensrefi boen, a tjari di oenoe e tjari oensrefi na wan krin fasi, èn a lespeki di oenoe e sori gi bigisma. A prisiri foe wi bigi spesroetoe te oenoe e sori taki oenoe e ’memre oen Bigi Kriaman’ foe di oenoe e poti theokrasia marki gi oensrefi. — Preik. 12:1; Ps. 110:3.
3 Taigi wi san na den marki foe oenoe: Wan boi di abi aiti jari ben taigi wan distrikt-opziener: „Fosi mi ben sa wani teki dopoe, dan mi ben sa wani jepi na ini a gemeente nanga a geluid èn waka nanga den mikrofoon, mi ben sa wani de wan dienstverlener èn wan sma di e jepi nanga a lektuur, dan mi ben sa wani leisi na den boekoestudie èn na den Waktitoren-studie. Baka dati mi ben sa wani de wan dinari na ini a diniwroko, dan wan owroeman. Mi ben sa wani de wan pionier toe èn go na a pionier skoro. Dan mi ben sa wani go na Bethel, de wan kring-owroeman noso wan distrikt-opziener.” Fa a ben sori foeroe warderi gi a grani foe dini Gado!
4 Ala di oenoe e go na fesi na skin sei èn na jejefasi, wi e prisiri foe si taki oenoe e doro den marki foe oenoe. (Teki gersi Lukas 2:52.) Ibri jari, doesoendoesoen foe oenoe kon tron preikiman di no dopoe ete, èn baka dati den e doro den markitiki foe teki dopoe leki foetoeboi foe Jehovah di gi densrefi abra na en. Baka dati a prisiri foe wi e gro te wi e si taki oenoe wani doe a jepi-pionier wroko, èn bigin srefi nanga a foeroeten diniwroko. Foe troe, oen pikin, oenoe na a fonten foe wi prisiri èn wan toemoesi moi fonten foe prèise gi wi hemel Tata. Meki a de so taki Jehovah e blesi oenoe bogobogo. — Odo 23:24, 25.