Kon sabi den brada foe joe
1 Bijbel e taki foe wan troe mati leki wan sma di de moro krosibei leki wan brada, di e tan sori en lobi nanga loyaalfasi èn di e kon foe jepi en kompe na ini ten foe banawtoe (Odo 17:17; 18:24). Wi no sa mankeri den sortoe mati dati na ini a gemeente efoe wi e tan meki moeiti foe kon sabi èn foe lobi makandra. — Joh. 13:35.
2 Bifo èn baka den konmakandra joe abi heri boen okasi foe kon sabi joe brada. Foe san ede joe no e kon pikinso moro froekoe èn e tan pikinso moro langa baka konmakandra so taki joe kan abi wan waran èn switi matifasi? Soekoe difrenti sortoe brada foe abi takimakandra nanga den, so srefi owroewan, di abi foeroe ondrofeni nanga jongoewan, noso den wan di e sjensjen.
3 Bigin takimakandra: No taigi joe brada wan odi nomo dan joe e pasa gowe. Joe kan bigin wan takimakandra foe di joe e froeteri den, wan sani di joe ondrofeni na ini a diniwroko, wan tori na ini wan njoen tijdschrift di den abi belangstelling gi, noso wan komentaar di abi foe doe nanga a konmakandra di kaba djonsrode. Joe kan kon sabi foeroe sani foe joe brada efoe joe na wan boen arkiman, efoe joe e gi den deki-ati foe taki foe den ondrofenitori foe den èn foe den sani di den e leri. Na aksi wawan fa wan sma kon leri sabi Jehovah kan tjari foeroe kon na krin. Sonwan foe den pasa ondrofeni ini a libi foe den di tranga den bribi, ala di trawan e horidoro na ondro situwâsi nownowde di kan de tranga gi foeroe sma foe man prakseri dati. Efoe wi e kon froestan a sani disi, dan disi sa jepi wi, leki troe mati, foe wi ati naki wi èn foe wi doe wan sani tapoe den nowtoe foe trawan.
4 Handri leki mati foe makandra: Baka a dede foe en pikin, wan sisa ben feni en wan hebi sani foe singi Kownoekondre singi di ben taki foe na opobaka. A e memre: „Wan leisi, wan sisa di ben sidon na a tra sei ben si taki mi ben e krei. A ben kon na mi, ben poti en anoe lontoe mi èn a ben singi san ben tan abra foe a singi nanga mi. Mi ben firi so foeroe lobi gi den brada nanga sisa èn mi ben firi so kolokoe taki wi ben kon na den konmakandra, foe di mi ben kon kisi misrefi taki na drape jepi di gi wi, drape na a Kownoekondre zaal.” Wi moesoe handri leki mati foe wi brada foe di wi e gi den trowstoe te a de fanowdoe èn foe di wi e gi den deki-ati ala ten. — Hebr. 10:24, 25.
5 Ala di na owroe grontapoe disi e kwinsi sma moro nanga moro, meki wi teki a bosroiti foe kon sabi wi brada moro boen. A gi disi di wi e gi makandra opregti deki-ati sa sori foe de wan blesi gi wi alamala. — Rom. 1:11, 12.