Abi Furu Lespeki gi a Moi Nen fu Yehovah
1 Satan ben pori a nen fu Gado di a ben kori wi fosi papa nanga mama fu du sondu. Didibri ben taki na wan triki fasi taki Yehovah ben lei gi Adam (Gen. 3:1-5). Fu di a nen fu Gado abi fu du nanga a man di A man du san a e taki, meki san Satan ben taki ben de a moro takru ogri-ati lei. Yehovah e meki den prakseri fu en kon tru safrisafri, èn nanga dati a ben krin en nen fu ala syen èn ben meki a kon moi.—Yes. 63:12-14.
2 Wi na den sma di Yehovah ’kari na en nen’ (Tori 15:14, 17). Disi e gi wi na okasi fu sori fa wi e denki fu a santafasi fu en nen. Wi e feni taki a nen fu Yehovah moi trutru, fu di a e prenki ala sani di bun, di abi switifasi, di abi lobi, di abi sari-ati nanga regtfardikifasi. Wi abi furu lespeki gi a bigi di a glori nen fu Gado bigi (Ps. 8:1; 99:3; 148:13). San dati musu pusu wi fu du?
3 Santa a Nen fu Gado: Gado en nen no kan kon moro santa leki fa a de now kaba. Ma nanga a krin fasi fa wi e tyari wisrefi èn nanga a Kownukondre preikiwroko, wi kan sori taki wi abi kefalek furu lespeki gi a nen fu Gado. Meki wi bari taki: „¡Taigi Yehovah tangi, un pipel! Kari en nen. Meki den sani di a e du bekènti na ondro den pipel. Fruteri dati en nen hei srefisrefi” (Yes. 12:4). Fa wi kan du disi?
4 Wi kan meki bun gebroiki fu ibri okasi fu meki a nen fu Yehovah bekènti èn ala san a wani taki. Awansi na formeel fasi noso na okasi, oso fu oso noso wenkri fu wenkri, na tapu strati noso nanga telefon, a preikiwroko fu wi e gi Yehovah grani. Te wi feni sma di abi belangstelling èn di e arki, dan wi musu meki faste mofo fu fisiti den baka èn leri den moro fu Yehovah. Dati wani taki dati wi musu hori wisrefi na den mofo dati di wi meki èn tan du muiti fu bigin oso-bijbelstudie. A de wan prisiri taki ibri yari hondro dusundusun sma e kon sabi a moi nen fu Yehovah èn e lespeki en èn e santa en.
5 A du di wi e du a wroko fu santa a nen fu Gado nanga wi heri ati, e sori krinkrin sortu sei wi teki na ini a strei di Satan ben bigin na ini Eden. Disi na a moro bun, lespeki wroko di wi kan du. ¡Meki wi abi furu lespeki gi a moi nen fu Yehovah èn tan prèise en fayafaya!—1 Kron. 29:13.