Fa yu kan seti wan osofamiri di tranga na yeye fasi?
1 Wi musu prèise Kresten osofamiri fu di den e ’sori taki den e gi densrefi na ini a dini fu Gado ini den eigi oso’ (1 Tim. 5:4). Ma fu di so furu sani de lontu wi di kan pori a bribi fu wi, meki a de tumusi prenspari taki osofamiri du trutru muiti fu tan tranga na yeye fasi. Fa yu kan doro a marki dati?
2 Du yu edeman-wroko neleki Krestes: Edeman fu osofamiri musu waka baka na eksempre fu Yesus Krestes na ini a fasi fa den e tranga na osofamiri fu den. Di Yesus dede leki wan srakti-ofrandi, dan a no ben wani fu sori lobi gi wi na a wán okasi dati nomo. Na presi fu dati Yesus e tan ’gi a gemeente nyanyan èn a e tan boboi en’ (Ef. 5:25-29). Lobi-ati papa nanga mama e waka baka na eksempre disi fu di den e sorgu ibri dei na wan switi fasi gi ala sani di den osofamiri fu den abi fanowdu na yeye fasi. Disi wani taki tu dati ibri wiki den e hori wan osofamiri-bijbelstudie, taki den e teki ibri okasi di den feni fu taki finifini fu yeye sani, èn dati den e taki fu problema te a de fanowdu.—Deut. 6:6, 7.
3 Na ini a preikiwroko: Ala sma fu na osofamiri musu frustan bun taki wan prenspari pisi fu na anbegi fu den na fu fruteri trawan fu Yehovah èn fu den sani di a abi na prakseri (Yes. 43:10-12). Efu unu leki papa nanga mama wani taki den pikin fu unu musu tron getrow Kotoigi fu Yehovah, dan unu musu bigin fu sreka na ati fu den gi a preikiwroko te den yongu ete. Taki fu san ede a de fanowdu fu de klariklari fu du ala san wi man na ini a preikiwroko èn fu san ede wi musu du dati ibri wiki (Mat. 22:37-39). Baka dati a bun fu seti sani na so wan fasi, taki den kan de nanga yu na ini a preikiwroko doronomo.
4 Yepi yu osofamiri sosrefi fu kon si moro krin taki a preikiwroko prenspari trutru. Du dati fu di yu e teki pikinso fu a ten fu na alawiki osofamiri-studie fu unu, fu sreka èn oefen wan tu bun fasi fu pristeri sani. Leri iniwan fu den pikin fu yu aparti fa fu du a preikiwroko bun. Na so fasi yu kan yepi den fu go na fesi akruderi a yari fu den èn akruderi den sani di den man du. Baka te unu wroko makandra na ini a preikiwroko, dan a bun fu taki nanga den fu luku fa den leki pikin ben kon si a bun-ati fu Yehovah a dei dati. Fruteri ondrofenitori di kan gi deki-ati. O moro wan osofamiri „tesi kaba taki Masra bun”, o moro bun a matifasi fu den nanga Yehovah sa de, wan sani di sa gi den krakti fu kakafutu gi „ala sani di takru”.—1 Petr. 2:1-3.
5 Na den konmakandra: A switi srefisrefi te memre fu wan osofamiri e yepi makandra fu de na den gemeente konmakandra, spesrutu efu wan fu den firi weri, lasi-ati, noso efu sani de di e moro en! „Te mi papa kon na oso baka wroko, dan a weri”, na so wan yongu sisa e taki. „Ma dan mi e taki nanga en fu wan moi sani di sa kon na fesi na a konmakandra a neti dati, èn dati e gi en deki-ati baka fu go. Wan tra leisi te mi e firi weri, dan en now e gi mi deki-ati fu go na a konmakandra.”—Hebr. 10:24, 25.
6 Du sani makandra: Osofamiri musu du sani makandra, fu eksempre den kan wroko makandra fu du osowroko. A no de fu taki dati den musu poti ten na wan sei tu fu meki prisiri na wan fasi di fiti. Den kan go sidon nyan na wan presi, prei difrenti sani nanga makandra èn den kan koiri go luku tra famiriman noso mati. Den sani disi kan de prisiri momenti èn den kan meki den prakseri nanga prisiri baka fu a ten disi.—Preik. 3:4.
7 Osofamiri di tranga kan wini den aladei tyalensi di den e miti na yeye sei. Fu di den e kon kisi wan moro bun matifasi nanga Yehovah, meki den e ondrofeni a krakti di Yehovah srefi e gi.—Ef. 6:10.