A kresten osofamiri e doe sani makandra
„Now mi e froemane oenoe, brada, . . . taki oenoe de wán makandra na wan joisti fasi ini a srefi memre èn ini a srefi fasi foe prakseri.” — 1 KORENTESMA 1:10.
1. San na a situwâsi ini a tori foe wánfasi ini foeroe osofamiri?
NA OSOFAMIRI foe joe na wan di tai kon na wán? Noso a e gersi taki ala sma e teki en eigi pasi? Oenoe e doe sani makandra? Noso pikinmoro noiti oenoe de na a srefi presi na a srefi ten? A srefi wortoe „osofamiri” wani taki wan osofamiri-libi di tjari kon na wán.a Ma tokoe a no ala osofamiri tai kon na wán. Wan Ingrisiman di e hori lezing, ben go so fara foe taki: „Na presi foe na osofamiri de a fondamenti foe wan boen libisma libimakandra, a . . . de a fonten foe ala den sani di no switi gi wi.” Na so a de nanga joe osofamiri? Efoe na so a de, dan dati na a fasi fa a moesoe de?
2. Sortoe sma foe bijbel ben gi boeweisi taki den ben kon foe boen osofamiri?
2 A wánfasi noso pratifasi foe wan osofamiri e anga nofotron foe a sma di de na edeman, efoe a de papa nanga mama noso a papa noso a mama wawan. Ini bijbel ten, osofamiri di ben tai kon na wán èn di ben anbegi Gado makandra, ben njanboen foe Jehovah blesi. Disi ben de so ini Israèl foe owroeten, pe Jefta oemapikin, Simson nanga Samuèl, ibriwan foe den na difrenti fasi, ben sori taki den ben de sma di ben kon foe wan osofamiri di ben dini Gado (Kroetoebakra 11:30-40; 13:2-25; 1 Samuèl 1:21-23; 2:18-21). Ini a ten foe den fosi kresten, dan Timoteus, di ben de a getrow kompe foe Paulus na wan toe foe den zendingrèis di Paulus ben meki, en granmama Lois nanga en mama Eunice ben kweki en nanga wan sabi foe den Hebrew Boekoe foe bijbel. Fa Timoteus ben kon tron wan toemoesi aparti disipel èn zendeling! — Tori foe den Apostel 16:1, 2; 2 Timoteus 1:5; 3:14, 15; loekoe toe Tori foe den Apostel 21:8, 9.
Foe san ede na osofamiri moesoe doe sani makandra?
3, 4. (a) Sortoe eigifasi moesoe de foe si ini wan osofamiri di tai kon na wán? (b) Fa wan oso kan de moro leki soso wan oso?
3 Foe san ede a boen gi osofamiri foe doe sani makandra? Bika a e bow a froestan di den e froestan èn a lespeki gi makandra. Na presi foe hori wisrefi farawe foe makandra, wi e tan krosibei foe makandra èn e gi makandra jepi. Wan artikel di no so langa pasa ben kon na doro ini a tijdschrift Family Relations (Matifasi ini na osofamiri), ben taki: „Wan prenki di krin nofo ben kon de foe si, èn dati ben sori difrenti eigifasi foe ’tranga osofamiri’. Den sortoe eigifasi dati abi na ini toe a froetrow ini makandra èn a warderi gi makandra, wan firi foe kolokoe èn foe de krosibei foe makandra, boen komunikâsi, a man di sma man loesoe problema èn wan jeje fasi foe denki di de wan tranga penti ini libi.”
4 Te den eigifasi disi de ini wan osofamiri, na oso no de moro langa leki wan servicestation, wan presi pe sma e stòp foe teki oli. A de moro leki soso wan oso. A de wan presi di e kari sma kon èn di e hari osofamiri memre. A de wan lanpresi foe lobi nanga waran firi, sari-atifasi nanga a froestan di den e froestan makandra (Odo 4:3, 4). A de wan presi pe osofamiri wánfasi de foe feni, no wan nesi foe broeja pe trobi nanga pratifasi de. Ma fa sma kan doro a marki disi?
Doe sani makandra na a ten foe na osofamiri studie
5. San wi e gebroiki foe kan leri troe anbegi?
5 Wi e leri a troe anbegi foe Jehovah foe di wi e gebroiki a man di wi man taki-go-taki-kon foe sani noso e gebroiki a „krakti foe overtoigi sma” (Romesma 12:1). Firi di e opo ede kon foe wan sjatoe pisi ten no moesoe tiri a fasi fa wi e tjari wisrefi, so leki den firi di e kon nanga jepi foe den preiki di den telefisi domri e hori nanga hei èn grati wortoe. Na presi foe dati, a doronomo studie foe wi èn a prakseri di wi e prakseri dipi foe bijbel nanga bijbelstudie poeblikâsi, di „a getrow èn koni srafoe” e gi, e boeweigi wi (Mateus 24:45). A fasi fa wi e tjari wisrefi leki wan kresten de a bakapisi foe na abi di wi abi a denki foe Krestes na ibri situwâsi noso tesi di kan opo ede kon. Ini a tori dati, Jehovah na wi Bigi Leriman. — Psalm 25:9; Jesaja 54:13; 1 Korentesma 2:16.
6. Sortoe eksempre foe osofamiri studie na heri grontapoe wi abi?
6 Na osofamiri bijbelstudie e prei wan prenspari ròl ini a jeje fasi foe denki foe ibri kresten osofamiri. Oten joe abi joe osofamiri studie? Efoe sani e doe na okasi noso bosroiti foe studeri e teki sondro foe seti dati na fesi, dan kande na osofamiri studie no sa hori foeroetron, noso a no sa hori srefisrefi. Doe sani makandra ini na osofamiri studie e aksi wan doronomo, fasti schema. Dan ala sma sabi sortoe dei èn na sortoe joeroe sma e froewakti foe den taki den moesoe de drape foe njanboen foe wan osofamiri konmakandra na jeje fasi. Den moro leki 12.000 memre foe a Bethel famiri na heri grontapoe sabi taki na osofamiri studie foe den de tapoe moende mofoneti. Fa a e naki na ati foe den Bethel friwani wrokoman disi, te den e memre taki den alamala abi wan prati na a srefi studie, ala di a dei e doro en kaba, na den èilanti foe a Bigi Se èn Njoen Selanti, dan safrisafri baka makandra, na Australia, Japan, Taiwan, Hong Kong, baka dati wi e abra go na Asia, Afrika nanga Europa èn te foe kaba den Amerkan kondre. Ala di doesoendoesoen kilometer èn foeroe tongo e prati den, na osofamiri studie disi e gi den Bethel famirimemre disi wan firi taki den e doe sani makandra. Na joe eigi pikin fasi joe kan kweki a srefi firi nanga jepi foe joe osofamiri studie. — 1 Petrus 2:17; 5:9.
7. Fa wi moesoe si a wortoe foe waarheid, so leki fa Petrus e taki?
7 Na apostel Petrus e gi wi a rai: „Kweki leki njoen gebore pikin, wan lostoe gi a merki di no falsi èn di de foe a wortoe, so taki nanga jepi foe dati, oenoe kan gro foe kisi kibri efoe oenoe ben tesi taki Masra boen” (1 Petrus 2:2, 3). Fa Petrus ben tjari wan moi prenki kon na ini wi prakseri nanga jepi foe den wortoe disi! A ben gebroiki a Griki werkwortoe e·pi·po·theʹsa·te, di ini akroederi nanga a Linguistic Key to the Greek New Testament, e kon foe wan wortoe di wani taki „wani foe, angri foe, abi wan tranga lostoe gi”. A wani taki wan tranga angri. Joe ben si fa wan pikin foe wan meti e soekoe a bobimofo foe a mama fajafaja èn fa wan libisma beibi de nanga satisfaksi te a e soigi a bobi foe en mama? Wi moesoe abi a srefi lostoe gi a wortoe foe waarheid. A Griki sabiman William Barclay ben taki: „Gi na opregti kresten, a studeri foe Gado wortoe a no wan wroko, ma wan prisiri sani, bika a sabi taki drape en ati sa feni a njanjan di a wani.”
8. Sortoe tjalensi e tanapoe na fesi na osofamiri edeman te a moesoe hori na osofamiri studie?
8 Na osofamiri studie e poti wan bigi frantiwortoe tapoe na edeman foe na osofamiri. A moesoe sorgoe taki a studie abi a belangstelling foe ala sma èn taki den alamala kan teki prati na dati. Pikin no moesoe abi a firi taki a studie de troetroe soso gi den bigiwan. A kwaliteit foe a studie de moro prenspari leki na ipi materiaal di moesoe studeri. Meki bijbel kisi libi. Jepi den pikin foe joe, pe a fiti, foe si den kontren nanga den spesroetoe presi foe Palestina pe den sani di oenoe e taki foe den, ben feni presi. Alamala moesoe kisi a deki-ati foe go ondrosoekoe sani densrefi èn foe prati dati nanga na osofamiri. Na a fasi disi pikin toe kan ’gro kon bigi nanga Jehovah na prakseri’. — 1 Samuèl 2:20, 21.
Doe sani makandra ini na evangeliumwroko
9. Fa a preikiwroko kan kon tron wan switi osofamiri ondrofeni?
9 Jesus ben taki: „A boen njoensoe moesoe preiki fosi na ala nâsi” (Markus 13:10). Den wortoe dati e gi ibri opregti kresten wan toewijzing — foe doe na evangeliumwroko, foe prati a boen njoensoe foe Gado Kownoekondre tiri nanga trawan. Foe doe disi makandra leki wan osofamiri, kan de wan prisiri ondrofeni di e gi deki-ati. Mama nanga papa kan firi prisiri èn kolokoe foe a pristeri di den pikin foe den e pristeri a boen njoensoe. Wan trowpaar di abi dri manpikin, di abi na mindri 15 te leki 21 jari, e froeteri taki den ben abi ala ten a gwenti foe go ibri dridewroko baka skorojoeroe èn ibri satra mamanten nanga den pikin foe den ini a poebliki preikiwroko. A papa ben taki: „Ibri leisi wi e leri den wan sani. Èn wi e overtoigi wisrefi taki a de wan prisiri ondrofeni di e gi deki-ati.”
10. Fa papa nanga mama kan meki den pikin foe den abi wini ini a diniwroko?
10 Foe wroko makandra leki wan osofamiri ini a preikiwroko èn foe gi sma leri, kan de wan sani di e gi foeroe wini. Sontron sma e doe sani na wan moro positief fasi tapoe na eenvoudig ma fajafaja pristeri foe wan pikin. Dan mâ noso pâ de drape foe jepi den efoe dati de fanowdoe. Papa nanga mama kan overtoigi densrefi taki den pikin foe den e leri sani ibritron pikinso moro èn e tron na so fasi boen bedinari „di no abi foe sjen foe noti, di e handri a wortoe foe waarheid na wan joisti fasi”. Foe preiki makandra na a fasi disi e gi papa nanga mama pasi foe man foe si a fasi fa den pikin foe den e tjari densrefi, a boen bakapisi di den abi èn den boen maniri foe den ini a diniwroko. Foe di den abi so wan doronomo gwenti, den e si fa a pikin e go na fesi èn den e gi wan fasti leri nanga deki-ati foe tranga a bribi foe a boi noso oemapikin. Na a srefi ten, den pikin e si taki a papa nanga mama foe den na boen eksempre ini a diniwroko. Ini den moeilek èn ogri ten disi, foe wroko leki wan osofamiri di tai kon na wán èn foe lobi makandra, kan gi den srefi wan marki foe firi leki den de sondro kefar ini den birti pe foeroe ogridoe de. — 2 Timoteus 2:15; Filipisma 3:16.
11. San makriki kan kowroe a faja di a pikin abi gi waarheid?
11 Pikin-nengre makriki e si a toefesi-fasi foe bigisma. Efoe papa nanga mama no e sori wan troetroe lobi gi waarheid èn gi na oso-foe-oso diniwroko, dan pikinmoro den no kan froewakti foe den pikin taki den sa de nanga faja. So boen, wan gosontoe papa noso mama di a wan enkri velddienst di a e doe, na a alawiki bijbelstudie di a abi nanga den pikin, sa kan ondrofeni takroe bakapisi te den pikin disi kon moro bigi. — Odo 22:6; Efeisesma 6:4.
12. Fa son osofamiri kan kisi wan spesroetoe blesi foe Jehovah?
12 Wan wini foe a de di na osofamiri de „wán makandra na wan joisti fasi ini a srefi memre”, de taki kande den kan wroko makandra, so taki awansi fa no fa wán memre foe na osofamiri kan dini leki wan foeroeten pionier bedinari ini a gemeente. Foeroe osofamiri na heri grontapoe e doe disi èn alamala e kisi wan blesi foe den ondrofenitori nanga den boen bakapisi di a pionier memre foe den abi ibritron baka. — 2 Korentesma 13:11; Filipisma 2:1-4.
Doe sani makandra foe loesoe problema
13, 14. (a) Sortoe situwâsi kan abi krakti na tapoe a wánfasi foe wan osofamiri? (b) Fa joe kan wai pasi gi foeroe osofamiri problema?
13 Ini den moeilek ten disi foe „banawtoe” nanga „kefar”, wi alamala e ondrofeni kwinsi (2 Timoteus 3:1, Revised Standard Version; Phillips). Problema de na wrokope, na skoro, na strati èn srefi na oso srefi. Son sma e pina foe wan takroe gosontoe noso emotioneel problema di e tan langa, di sontron e tjari druk kon èn a froestan di sma no e froestan makandra boen ini na osofamiri. San joe kan doe ini den sortoe situwâsi disi? Foe di ibriwan sma no e taki nanga makandra? Foe di wan sma e hori ensrefi aparti foe a trawan, ala di den de ini a srefi oso nanga makandra? Nôno. Na presi foe dati, wi moesoe taki foe den sani di wi e broko wi ede nanga den èn aksi jepi. Èn sortoe presi de moro boen gi disi leki na ini wan lobi osofamiri? — 1 Korentesma 16:14; 1 Petrus 4:8.
14 So leki fa ibri datra sabi, dan a moro boen foe joe dringi dresi wakti siki. So a de toe nanga osofamiri problema. Foe taki foe sani krin sondro foe hori wan sani na baka, nofotron kan tapoe pasi taki problema e opo ede kon moro serjoesoe. Srefi efoe serjoesoe problema e kon, dan den kan doe wan sani na den èn loesoe den srefi, efoe na osofamiri e go loekoe den bijbel gronprakseri makandra, di de ini a tori. Nofotron trobi kan drai kon tron wan switi matifasi te sma e doe den wortoe foe Paulus ini Kolosesma 3:12-14: „Weri gi oensrefi lobi nanga safoe lobifasi foe sari-atifasi, boen-atifasi, sakafasi foe jeje, safri-atifasi nanga langa pasensi. Tan froedrage makandra èn gi makandra pardon na wan frifasi te a wan abi wan sani foe kragi foe wan trawan. . . . Ma weri gi oensrefi lobi, foe di a de wan volmaakti banti foe wánfasi.”
Doe sani makandra ini ontspanning
15, 16. (a) Sortoe eigifasi moesoe de a marki foe kresten osofamiri? (b) Sortoe sma son kerki e meki èn foe san ede?
15 Jehovah de wan kolokoe Gado èn a waarheid de wan kolokoe boskopoe — wan di e gi howpoe na a libisma famiri. Moro fara, wan foe den froktoe foe a jeje na prisiri. A prisiri disi de heri tra fasi leki a prisiri di wan sportman, di wini wan sportwega, abi wan sjatoe pisi ten. A de a dipi firi foe satisfaksi di e horibaka gi wan sma èn di de pasa marki ini na ati, leki wan bakapisi foe a kweki di wan sma kweki wan krosibei matifasi nanga Jehovah. Na prisiri di abi en gron na tapoe waarde na jeje fasi èn matifasi di e bow sma. — Galasiasma 5:22; 1 Timoteus 1:11.
16 Foe dati ede, leki kresten Kotoigi foe Jehovah, wi no abi no wan reide foe de soi noso foe de sondro a firi foe wani lafoe. Son kerki e meki sma kon tron so, bika a sortoe bribi foe den e poti krakti na tapoe negatief sani. Den leri foe den abi leki bakapisi wan sortoe sari anbegi di de sondro prisiri, di no abi en fondamenti na tapoe bijbel èn di no de ini balansi. Den no e meki kolokoe osofamiri ini a dini foe Gado. Jesus ben si a fanowdoe foe abi ontspanning èn foe wan sma bro en ede. Na wan okasi, foe eksempre, a ben kari den disipel foe en foe go „den wawan na wan tiri presi foe rostoe pikinso”. — Markus 6:30-32; Psalm 126:1-3; Jeremia 30:18, 19.
17, 18. Na sortoe joisti fasi kresten osofamiri kan abi ontspanning?
17 Na a srefi fasi osofamiri abi ten fanowdoe foe njanboen foe ontspanning. Wan papa ben taki foe den pikin foe en: „Wi e doe wan lo prisiri sani makandra — go swen na wan presi, prei bal, orga wan prisiriten na tapoe den bergi. Ten na ten wi abi wan ’pionier dei’ makandra ini a diniwroko; baka dati wi abi prisiri demakandra nanga wan spesroetoe njanjan èn kande wi e gi makandra presenti srefi.”
18 Tra rai di papa nanga mama kan poti prakseri na tapoe, na foe go na presi pe den e kweki meti, go na presi pe joe kan prei, na museum èn na tra presi di moi foe go. Foe go koiri na boesi, foe go loekoe den difrenti fowroe fa den e libi èn foe wroko makandra ini a djari, na wroko di nanga prisiri den kan abi wan prati na dati. Papa nanga mama kan gi den pikin foe den a deki-ati toe foe leri foe prei wan pokoe preisani noso foe go leri wan boen hobby. Foe troe, papa nanga mama di de ini balansi, sa meki ten foe prei nanga den pikin foe den. Efoe osofamiri e prei nanga makandra, dan a de moro seiker taki den sa tan na makandra!
19. Sortoe disiten fasi foe doe sani kan doe wan osofamiri ogri?
19 Wan disiten sani di jongoesma e doe, de taki den wani foe de aparti foe na osofamiri èn doe den eigi sani ini a tori foe ontspanning. Ala di a no de wan ogri sani te wan jongoe sma abi wan hobby noso ten foe abi en persoonlijk ontspanning di a lobi, a no ben sa de wan koni sani foe meki den sortoe belangstelling dati meki a de ala ten aparti foe a tra pisi foe na osofamiri. Na presi foe dati, wi wani foe doe a gronprakseri di apostel Paulus ben taki: „[Hori] ai no soso nanga persoonlijk belangstelling na tapoe soso joe eigi afersi, ma nanga persoonlijk belangstelling toe tapoe di foe tra sma.” — Filipisma 2:4.
20. Fa bigi konmakandra nanga kongres kan de prisiri ten?
20 Fa a de wan prisiri gi wi alamala foe si osofamiri e sidon makandra na kongres èn bigi konmakandra! Na a fasi dati, den moro owroe pikin nofotron sa kan jepi nanga den moro jongoe pikin. So wan seti e tapoe pasi toe gi a firi di son jongoewan abi, foe go sidon ini groepoe makandra na den lasti rij èn foe poti pikinso prakseri na tapoe a kongres programa. Srefi te na osofamiri e rèis go-kon na den bigi konmakandra, a kan de wan prisiri sani te den e aksi na osofamiri sortoe pasi den sa teki, sortoe presi o de foe si te den de na pasi èn pe den sa tan. Prakseri fa a ben moesoe de wan prisiri ten gi osofamiri ini Jesus ten, foe den ben rèis makandra go na Jerusalem! — Lukas 2:41, 42.
Den blesi foe di na osofamiri e doe sani makandra
21. (a) Fa wi kan doe moeiti foe abi boen bakapisi ini a trowlibi? (b) San na den fo boen rai gi wan trowlibi di e tan?
21 Trowlibi di abi boen bakapisi èn osofamiri di tai kon na wán, noiti ben de wan makriki sani foe sma kisi, èn den no e kon foe densrefi toe. A sori leki son sma feni en moro makriki foe ’tapoe foe doe moeiti’, foe broko a trow èn foe proeberi foe bigin njoenjoen baka. Ma tokoe, den srefi problema dati nofotron e kon baka ini wan di foe toe noso wan di foe dri trow. Wan moro boen loesoe de a kresten wan: Doe moeiti foe abi boen bakapisi, foe di den e doe bijbel gronprakseri di abi foe doe nanga lobi èn lespeki. Osofamiri di tai kon na wán, e anga foe wan jeje foe gi èn foe teki, foe no prakseri ensrefi nomo. Wan man di e gi rai ini a tori foe trowlibi ben gi wan makriki lin foe meki trowlibi tan. A ben skrifi: „Den fo moro prenspari sani di de foe feni ini pikinmoro ala den boen trowlibi, na a wani di den wani foe arki, a man di den man taki den no ben abi leti, a man di den man gi boen jepi na emotioneel sei èn na angri foe fasi makandra na wan lobifasi.” Den sani dati foe troe kan jepi wan trowlibi tan, bika den abi den fondamenti toe na tapoe gosontoe bijbel gronprakseri. — 1 Korentesma 13:1-8; Efeisesma 5:33; Jakobus 1:19.
22. San na wan toe foe den wini te joe abi wan osofamiri di tai kon na wán?
22 Efoe wi e waka baka a rai foe bijbel, dan wi sa abi wan boen fondamenti foe wan osofamiri di tai kon na wán, èn osofamiri di tai kon na wán na a fondamenti gi wan gemeente di tai kon na wán èn di tranga na jeje fasi. So boen, wi sa kisi blesi pasa marki foe Jehovah te wi e gi en moro prèise ini wánfasi.
[Foetoewortoe]
a „Osofamiri komoto foe a L[atino]tongo familia, biginbigin dati ben de den foetoeboi nanga srafoe foe wan bigi oso, baka dati na oso srefi nanga en meester, misi, pikin — nanga a heri groepoe foe wrokoman.” — Origins—A Short Etymological Dictionary of Modern English, di Eric Partridge skrifi.
Joe e memre disi ete?
◻ Foe san ede a de wan wini gi osofamiri foe doe sani makandra?
◻ Foe san ede wan doronomo osofamiri bijbelstudie de prenspari?
◻ Foe san ede a de boen gi papa nanga mama foe go makandra nanga den pikin foe den ini a velddienst?
◻ Foe san ede a e jepi te sma e taki foe problema na ini na osofamiri libi?
◻ Foe san ede kresten osofamiri no moesoe de nanga sari èn sondro prisiri?
[Prenki na tapoe bladzijde 14]
Joe osofamiri e njanboen awansi fa a no fa, foe njan makandra wan tron wan dei?
[Prenki na tapoe bladzijde 15]
Go koiri nanga na osofamiri moesoe de wan ontspanning èn joe moesoe njanboen foe en