Fa a waarheid e meki wi kon fri
1 Na wan spesrutu okasi, Yesus taigi den Dyu di ben poti bribi na ini en: „Unu o sabi a waarheid, èn a waarheid o meki unu kon fri” (Yoh. 8:32). A ben taki fu wan fri di bigi moro a fri di ala sma abi. A de wan fri di ala sma kan kisi — gudusma noso pôti sma, sma di go na skoro noso sma di no go na skoro. Yesus ben leri waarheid di ben o tyari fri kon fu katibo na sondu nanga dede. Yesus ben fruklari: „Ibri sma di e du sondu, na wan srafu fu sondu” (Yoh. 8:34). O fa wi e angri trutru fu si a ten te ala libisma di e gi yesi na Gado „o komoto na ini wan katibo di e tyari dede kon èn den o kisi a glori fri fu den pikin fu Gado”!—Rom. 8:21.
2 Te wi kon sabi den tru tori di abi fu du nanga Yesus èn te wi e kon frustan san Yesus abi fu du nanga a kontru fu den prakseri fu Gado, dan wi e kisi a fri disi. Den tru tori disi abi fu du tu nanga a sabi di wi musu kon sabi san na a frulusu-ofrandi di a gi fu a bun fu wi (Rom. 3:24). Sosrefi nownow kaba wi kan de fri fu frede, fu lasi-ati, èn fu ala sortu ogri gwenti te wi e teki den tru tori fu Bijbel èn te wi e du san Bijbel e taki.
3 Fri fu frede nanga lasi-ati: Wi no abi fu lasi-ati fu a fasi fa sani e waka na grontapu, bika wi sabi fu san ede ogridu de èn wi sabi taki heri esi Gado sa figi dati puru fu grontapu (Ps. 37:10, 11; 2 Tim. 3:1; Openb. 12:12). Moro fara, a waarheid e meki wi kon fri fu falsi leri di abi fu du nanga a situwâsi fu den dedewan. Wi sabi taki dedesma no man du wi ogri, taki den no e kisi skin-ati fu têgo èn taki Gado no e meki taki sma e dede soso fu den kan libi makandra nanga en na ini hemel.—Preik. 9:5; Tori. 24:15.
4 Den tru tori disi ben gi wan papa nanga wan mama deki-ati di a pikin fu den ben lasi en libi na wan onkoloku. „Wi e firi sari trutru, èn wi sa tan firi sari teleki wi sa si a boi fu wi baka na a ten fu na opobaka”, a mama taki. „Ma wi sabi taki a pen di wi abi na soso gi wan syatu pisi ten nomo.”
5 Fri fu ogri gwenti: Den tru tori fu Bijbel kan tyari kenki kon na ini a fasi fa wan sma e denki nanga a fasi fa wan sma de, èn disi sa abi leki bakapisi taki a e kon fri fu di a sa man wai pasi gi furu problema (Ef. 4:20-24). Te wi no e bedrigi sma èn te wi wroko tranga dan disi kan yepi wi fu no pina so furu moro (Odo 13:4). Te wi e gi wisrefi fu dini trawan na wan lobi-ati fasi dan wi sa kisi wan moro bun banti nanga trawan (Kol. 3:13, 14). Te wi abi lespeki gi a Kresten seti di e taki dati a masra na a edeman, dan den problema na ini na osofamiri sa kon moro mendri (Ef. 5:33–6:1). Te wi wai pasi gi drungufasi, seks hurudu, tabaka nanga drugs dan dati sa yepi wi fu tan gosontu.—Odo 7:21-23; 23:29, 30; 2 Kor. 7:1.
6 Wan yonguman no ben man broko nanga drugs di a ben gebroiki neigi yari kaba. Wan dei a miti wan sisa di ben du stratiwroko. A teki wan tu publikâsi, èn a sisa seti sani fu go baka na en oso. A ben bigin wan bijbelstudie nanga a man. Baka tu mun a man tapu krinkrin fu gebroiki drugs, èn baka di a kisi leri aiti mun langa, a dopu. Di a brada fu a man disi nanga en wefi si fa a broko nanga drugs, dan densrefi bigin nanga wan bijbelstudie.
7 Yepi trawan fu kon fri tu: Den sma di de na ini katibo fu falsi leri den heri libi langa kan feni en muilek fu frustan fa den kan kon fri soleki fa a Wortu fu Gado e taki. Efu wan leriman wani doro den ati, dan a sa musu abi furu faya èn a sa musu sreka ensrefi bun (2 Tim. 4:2, 5). Now a no a ten fu du a wroko fu wi safrisafri, te wi musu ’taigi den katibosma taki den fri’ (Yes. 61:1). A fri fu Kresten na wan warti sani. Wan sma di kon fri na a fasi disi, sa kisi libi fu têgo.—1 Tim. 4:16.