Yonguwan—Leisi Gado Wortu!
1 Te wi yongu wi e kisi furu problema èn wi musu teki prenspari bosroiti. Ibri dei furu yongu Kresten e kisi tesi di kan meki taki den tyari densrefi na wan fasi di Gado no feni bun. Bifo yu teki bosroiti di abi fu du nanga skoro, wroko, nanga a trowlibi, yu musu poti marki gi yusrefi na yeye fasi. Soso te yu e du dati, yu sa man teki tra bosroiti di sa meki yu libi waka bun. Te yu abi spesrutu marki na yeye fasi, dan yu o man handri na wan koni fasi, èn sani sa waka bun nanga yu. Te yu e leisi èn te yu e prakseri dipi fu Gado Wortu doronomo, dan yu sa kisi a deki-ati fu handri akruderi den rai fu Gado, èn yu sa abi bun bakapisi te yu e meki muiti.—Yos. 1:8; Ps. 1:2, 3.
2 Fa yu sa kisi wini fu dati? A grontapu fu Satan lai nanga triki di e hari sma fu du ogri (1 Yoh. 2:15, 16). Kande yu sabi wan tu pikin na skoro, noso tra pikin di abi a srefi yari leki yu, di kisi bigi problema fu di den brokokindi gi druk fu den speri fu den. Te yu e hori yusrefi na rai di komoto fu Bijbel, dan yu sa man tyari yusrefi na wan bun fasi èn yu sa kisi krakti na yeye fasi di sa yepi yu fu kakafutu gi wan sondu fasi fu libi. Moro fara, rai di komoto fu Gado Wortu kan yepi yu fu wai pasi gi den trapu fu Satan (2 Kor. 2:11; Hebr. 5:14). Yu sa kisi trutru koloku te yu e waka na tapu a pasi fu Yehovah; yu sa prisiri nanga a fasi fa yu e libi.—Ps. 119:1, 9, 11.
3 Den gronprakseri di skrifi na ini Gado Wortu èn di no e kenki noiti, bun moro a koni fu libisma (Ps. 119:98-100). Te yu sabi Bijbel gronprakseri, te yu e prakseri dipi fu a wani fu Yehovah, èn te yu e begi nanga yu heri ati, dan dati kan yepi yu fu kon kisi wan krosibei banti nanga Yehovah Gado, a Skrifiman fu Bijbel, di koni moro ala sma. A e pramisi wi: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu.”—Ps. 32:8.
4 Poti ten na wan sei fu leisi Bijbel: Wan yongu Kresten uma ben poti leki marki fu leisi a heri Bijbel, èn a ben du dati na ini wán yari. Sortu wini a kisi? A e taki: „Mi leri so furu fu Yehovah; mi leri sani di meki mi kisi wan moro krosibei banti nanga en èn di meki taki mi wani abi frede gi en mi heri libi langa” (Yak. 4:8). Yu leisi a heri Bijbel kaba? Efu yu no e du dati, dan fu san ede yu no e poti dati leki marki? Fu tru, Yehovah sa blesi den muiti di yu e meki, èn yu sa kisi furu winimarki.