Gi Yehovah den moro bun sani
1 A Wet di Yehovah ben gi den Israelsma ben sori krin taki den ben musu tyari „gosontu” meti leki srakti-ofrandi gi en. Yehovah no ben wani siki meti kwetikweti (Lef. 22:18-20; Mal. 1:6-9). Boiti dati, te den ben e tyari wan srakti-ofrandi, dan ala a fatu, sobun den moro bun pisi fu a meti, ben de fu Yehovah (Lef. 3:14-16). Yehovah ben warti fu kisi den moro bun sani fu den Israelsma, fu di a ben de a Tata èn a Bun Masra fu den.
2 Neleki fa a ben de na ini owruten, na so den ofrandi di wi e tyari na ini a ten disi de prenspari gi Gado. A fasi fa wi e du wi diniwroko musu sori taki wi abi a lespeki gi Yehovah di a musu kisi. A no de fu taki, dati a situwâsi fu ibri sma de tra fasi. Ma toku, a de wan bun sani fu ondrosuku wisrefi bun so taki wi de seiker taki wi e gi Yehovah den moro bun sani fu wi.—Ef. 5:10.
3 Diniwroko nanga wi heri ati: Efu wi wani taki a diniwroko fu wi e gi Yehovah grani, èn efu wi wani doro na ati fu den wan di e arki wi, dan wi no musu du wi diniwroko leki wan gwenti nomo. Te wi e taki fu wi Gado, èn fu den moi sani di a abi na prakseri, dan disi musu komoto fu wi ati di furu nanga warderi (Ps. 145:7). Disi e sori wi o prenspari a de fu abi a gwenti fu leisi èn fu studeri Bijbel doronomo.—Odo 15:28.
4 Fu gi Yehovah den moro bun sani di wi abi, wani taki tu dati wi musu lobi sma neleki fa en lobi sma (Ef. 5:1, 2). Lobi gi sma sa pusu wi fu meki muiti fu miti so furu sma leki wi man nanga a nyunsu fu waarheid di e gi libi (Mark. 6:34). A e pusu wi fu broko wi ede nanga den sma nanga suma wi e taki. Lobi gi sma e meki taki wi e tan prakseri den, baka te wi taki nanga den a fosi leisi èn a e pusu wi fu go baka na den sma, so esi leki wi man. Lobi gi sma e buweigi wi fu du ala san wi man fu yepi den fu gro na yeye fasi.—Tori. 20:24; 26:28, 29.
5 „Wan srakti-ofrandi fu prèise”: Wan tra fasi fa wi e gi Yehovah den moro bun sani fu wi, na fu du wi diniwroko nanga faya. Te wi orga sani bun èn te wi e poti ala wi prakseri na wi diniwroko, dan wi kan gebroiki a ten di wi abi na wan fasi di o meki wi kisi a moro bun bakapisi (1 Tim. 4:10). Te wi sreka wisrefi bun, dan wi o man taki moro krin èn nanga moro overtoigi, èn na so wan fasi wi kan meki taki moro sma o wani arki wi (Odo 16:21). Te wi e prati a bun nyunsu nanga trawan dan wi kan taki trutru dati wi e tyari wan „srakti-ofrandi fu prèise” fu di wi e taki sani di komoto fu wi ati.—Hebr. 13:15.