Aksi di opo kon

◼ Fa wi musu du den wroko di wi e kisi fu du na ini a gemeente?

Wan gemeente fu a pipel fu Yehovah man drai na wan fasi di orga, fu di ala sma na ini a gemeente e wroko makandra (1 Kor. 14:33, 40). Prakseri omeni sani musu du fu man hori wán gemeente konmakandra nomo. Boiti taki sma e seti a programa srefi, dan brada nanga sisa e du furu difrenti wroko bifo èn baka a konmakandra. Sma e du tra wroko tu di trawan no e si, ma toku den wroko disi de prenspari. Fa ibriwan fu wi kan horibaka gi a seti disi?

De klariklari fu gi yusrefi. Den sma di de klariklari fu gi densrefi sa feni furu sani fu du (Ps. 110:3). Sori taki yu e broko yu ede nanga den sikiwan èn nanga den owruwan. Yepi fu krin a Kownukondre zaal. Wi kan du furu bun sani sondro taki sma kon aksi wi fosi. Wi musu wani fu yepi nomo.

Dini nanga sakafasi. Sma di abi sakafasi e prisiri fu dini trawan (Luk. 9:48). Te wi abi sakafasi, dan wi no sa teki tumusi furu wroko na wi tapu di wi no sa man du. Boiti dati, sakafasi sa yepi wi fu no go du sani fu san wi no kisi a frantwortu.—Odo 11:2.

De wan sma di trawan kan frutrow. Moses ben kisi a deki-ati fu suku „man di de fu frutrow”, fu man tyari frantwortu na ini Israel fu owruten (Ex. 18:21). Na ini a ten disi, a de fanowdu fu abi a srefi fasi dati. Ibri leisi te yu e kisi wan wroko fu du, meki ala muiti fu du en bun (Luk. 16:10). Efu yu no man du wan wroko, dan sorgu taki sani seti na so wan fasi taki wan tra sma kan du a wroko dati te yu no de.

Du ala san yu man. Kresten e kisi a frumane fu du a wroko fu den nanga den heri sili, srefi efu na grontapuwroko (Kol. 3:22-24). We, moro reide de fu du wi wroko nanga wi heri sili te a wroko dati na fu meki a tru anbegi go na fesi. Srefi te a gersi leki wan wroko no de so prenspari, toku a gemeente e kisi furu wini te a wroko du bun.

Ibri wroko di wi e kisi fu du e gi wi na okasi fu sori taki wi lobi Yehovah nanga den brada fu wi (Mat. 22:37-39). Meki wi du wi wroko na wan getrow fasi, awansi sortu wroko wi e kisi fu du.