Aksi di opo kon

◼ San a brada musu taki fosi wi e singi na a bigin fu a Theokrasia Diniwroko-skoro, a Diniwroko Konmakandra, a Publiki Konmakandra, nanga a Waktitoren-studie, èn suma musu du dati?

Den singi di wi musu singi ibri wiki na a Theokrasia Diniwroko-skoro skrifi na ini a Schema fu a Theokrasia Diniwroko-skoro. Disi de fu feni na ini na inibere pisi fu Wi Kownukondre Diniwroko fu oktober. Den singi di wi musu singi ibri wiki na a bigin èn na a kaba fu a Diniwroko Konmakandra, de fu feni na tapu bladzijde 2 fu Wi Kownukondre Diniwroko. Na so a de tu nanga den singi gi a Waktitoren-studie di wi e hori ibri wiki. Den de fu feni na tapu bladzijde 2 fu ibri Waktitoren. Den singi di wi e singi na ibriwan fu den konmakandra disi, abi fu du nanga a konmakandra di e kon baka a singi. Fu dati ede, na a brada di o teki fesi na a konmakandra musu taki sortu singi wi o singi. A no musu de so taki a brada di du a Theokrasia Diniwroko Skoro e taki sortu singi wi o singi na a Diniwroko Konmakandra. Sosrefi, a brada di de fesiman na a Publiki Konmakandra no o taki sortu singi wi o singi na a Waktitoren-studie.

Fu eksempre, a Theokrasia Diniwroko-skoro opziener o gi den sma wan switikon. A o taki sortu singi wi o singi, a o du a skoro, dan a o kari a fosi takiman fu a Diniwroko Konmakandra fu kon na tapu a podium. A fosi takiman disi fu a Diniwroko Konmakandra o kari a singi di wi o singi na a bigin fu a konmakandra dati.

Na so a sa pasa tu na a Publiki Konmakandra. A fesiman fu a konmakandra dati sa gi ala den sma di de drape wan switikon, èn a sa aksi den fu singi a singi di a takiman fu a publikitaki teki. A fesiman, (noso wan tra lepi brada di den aksi na fesi) sa bigin a konmakandra nanga wan begi. A fesiman o taki suma na a takiman, èn a o kari a nen fu a lezing. Baka a lezing, a fesiman no o taki syatu fu a lezing, ma a sa taki dati wi breiti fu a leri di wi kisi, èn taki wi e warderi a leri dati. A sa kari sosrefi a nen fu a publikitaki di o hori a wiki di e kon, èn a sa gi ala sma di de drape wan kari fu tan gi a Waktitoren-studie. A no de fanowdu taki a fesiman e aksi den arkiman efu den wani seni a lobi nanga odi gi a gemeente pe a takiman komoto. Baka dati a fesiman sa kari a brada di o hori a Waktitoren-studie fu kon na tapu a podium.

A brada di o hori a Waktitoren-studie sa kari a singi di wi musu singi bifo wi bigin nanga a Waktitoren-studie. Na a studie, a musu hori ensrefi na den rai di a getrow èn koni srafu gi. Te a kaba nanga a studie, a sa kari a lasti singi. Nofo tron a brada di e hori a Waktitoren-studie sa aksi a takiman fu a publikitaki fu tapu nanga begi.

Te ala den brada e hori densrefi na den rai disi, dan dati sa meki taki ala den gemeente e hori den konmakandra na a srefi fasi.